فزّ الخفوق وقلت يالله عسى خير
أثر الليالي عاد غايب قمرها
مع شوفته نشوة و فزّة و تخدير
و عيون خلاّن(ن) تعانق نظرها
يفزّ له قلبي كما فزّة الطير
و الرجل كن اللي تحتها غدرها
يا صبح عمري يا صباح التباشير
نوره ملا قلبي و روحي غمرها
عقب الفراق اللي تعدّى المحاذير
يبّس غصون القلب جافي دهرها
ربّع بـروحي عقب ما هي معاسير
سحابة(ن) هلّت بقلبي مطرها
و أسقَى بها زرعة هوانا بتقدير
غرسة غرام(ن) بالمحبة بذرها
يا عاذلين العين و الله مخاسير
و اللي درَى عن حال عيني عذرها
تشوم عيني عن جميع الغنادير
وإن ناظرت عيني فؤادي نهرها
يا ناس أحبه و المحبة مقادير
هذا هوَى نفسي و هذا قدرها
و الحب ماله يا أهل الحب تفسير
قلبين و الله بالمحبة أمرها
لا جيت اصوّر حالة الحب تصوير
و أرد عن حالي لخلّي خبرها
لقيت وجدي فوق كل التعابير
كل الشعر قطره و شوقي بحرها
