http://store2.up-00.com/2015-02/1423833540551.jpg
واحد تزوج قبل اكثر من عشرين سنة ... يقول ما شفتها قبل الزواج ولا كلمتها ولا اي شي من هالكلام ،، وكل اللي حولي كذا تزوجوا ومافيه مشاكل ،،، : وانا أثث عش الزوجيه اتخيلها بكل زاوية وراسم شكلها بعقلي ،، وأهلي يقولون حلوه تهبل فاتخيلتها بصورة معينة ،،، يوم الزواج انصدمت بشكلها ما عجبتني مو زي ماتوقعتها وزود كانت حاطه مكياج غريب زيادة عن اللزوووم مادري بس كنها تمثل مشهد كوميدي ،،، ماعجبتني ابدا ،، ومادري كيف اتصرف سبحان الله ما حسيت اتجاهها باي شعور غير النفور ،،،، وكنت مرتب اروح انا وياها الشرقية اسبوع عسل ، وقايل لأخوها اني بمشي ثاني يوم من الزواج مابي عزايم ولا ارتباطات على هالأساس كانت هي مرتبه شنطه لهالسفرة ،، وانا ما ارتحت لها ولا ابغى اسافر معها ما اشتهي حتى اناظرها ،،، وطلعت من البيت صباحية الزواج ودقيت على صديقي من كبينه خارجيه ما كان فيه جوال ذاك الوقت وقلت له يدق علي بالبيت بعد ساعة ويقول لي انه صديقنا فلان سوا حادث ومات عشان انا احزن وابطل السفره واطلع من البيت بسهوله ولو تسألني انت وش فيك ؟ اقول لها حزين على صديقي ،،، المهم اني اشتريت فطور ورحت البيت وسويت شاهي وجلسنا نفطر وانتظر صديقي يدق عى احر من الجمر واخيراً دق ،،وارد بحماس الو ((وكان معي كاسة الشاهي توني صابها حاره)) ،،،هلا ابو عابد ،،،عاد هو طبق الدور صح انه صديقنا كذا وكذا وانا عشان اطبق الدور صح سويت نفسي تفاجأت واهتزيت بس ماحسبت حساب أن الشاهي بيدي وانكب الشاهي على ساقي واصرخ ذيك الصرخه وأصك السماعة وهي كانت جالسة قدامي وتجي بسرعه وتشوف الحرق وتقول بسم الله عليك وتروح تجيب مويه بارده وتكبها على رجلي بحنيه ،،،وتقول وش فيك ؟من كلمك ؟ قلت صديقي مات !! جلست تواسيني ومعليش والدنيا كذا ،، صوتها وأسلوبها دخل قلبي ،،، ومدري وش جاني تغيرت 180درجة حبيتها بكل مافيني ربي قذف حبها في قلبي ،،من أول ما بدت تسمي علي وتواسيني ،، روحها عانقت روحي : قالت خلاص بروح ألبس عبايتي نروح الصيدلية تجيب كريم لرجلك وتوديني أهلي ورح شف أهل صديقك ووقف معهم انا مقدره وضعك ،، قلت ،، أنتي عروس وكذا وسفرتنا قالت عادي أنا مقدره حزنك على صديقك ،، ؛ قلت يابنت الحلال مات خلاص لو رحت معهم ماراح يرجع ،، : واخذنا شناطنا ومرينا الصيدلية ورحنا الشرقية واحلى أسبوع عسل ،،، واللحين هي أم عيالي وشريكة عمري وحبيبتي ، : : انتهت : مو دايم الحب من أول نظره ،، وحب الشكل موحب حقيقي ،،حب الروح هو الحب الحقيقي ، : :
كبت ذاالشاهي صارت خيره ههههههه
هلمو بنا نكبكب الشاهي يمكن فيه حب مابعد طلع ������
اسم الشاهي الجديد سفير الحب النايم
