ليت قلبي طير لا من ضاق رفرف به جناحه
يسعد مساكم / صباحكم
هلا بالجميع ...
ولقاء متجدد يجمعنا احبتي واتمنى ماراق لي يروق لكم ...
ليت قلبي طير لا من ضاق رفرف به جناحه
لا تضايق حرّك الجنحان لحدود السحابه
يرتفع حتى يبّدل ضيقة الصدر انشراحه
يعتلي النسناس ويعانق به النوّ وضبابه
لو يروح بعيد ما أحد يسأله سبة مراحه
ما هو بمثلي يفجّر ضيقته دمع وكتابه
لا نوى ما هو يحسّب فرق بعد ولا مساحه
ولا يحاتي لا لفى بأرض(ن) بعيده ولا قرابه
ما يفكّر غير في لمة جناحه وانفتاحه
لا بغى ينزل بنهر(ن) وان بغى ينزل بغابه
لأجل قلب(ن) لا طرى له صاحبه داعب جراحه
عانده وجه الزمان وزاد وقته من مصابه
صاحبي والحظ الأ قشر قلّد أيامي وشاحه
يسقي أيامي دموع ويطعم الظلمى كآبه
في رجاء لقياك دارت غربتي في كل ساحه
وعين قلبي في غيابك صدّقت كذب السّرابه
لا أرتسم بعدك هجير(ن) ترتسم لقياك واحه
ولا أرتسم حبك قريب(ن) تصبح اللقيا مهابه
لا جنت فرقاك فرح ولا أثمرت جمعاك راحه
بين حرّ القرب وأحزان الفراق أوجه تشابه
من مساء هاجس لقاك اللي يماطل في صباحه
لين هاجوس الفراق اللي تمادى في عذابه
ليت قلبي طير لا من ضاق رفرف به جناحه
لا تضايق حرّك الشريان لحدود السحابه
اخوكم / رايق البال
