!! قصيده غريبه من نوعها !!
قصيده غريبه من نوعها
يقول الشاعر/
ياقبر قلي عن زمان الاقامه
كم عام يقدر ينتقل منك راعيك
ودي توضح لي شروط السلامه
من ضمتك من ظلمك من بلاويك
رد القبر /
ياذيب من ينشد يثمن كلامه
راجع خطياتك وراجع حسانيك
تبقى بجوفي لين يوم القيامه
محدن يجي عندك ولا يتصل فيك
رد الشاعر /
وان كانت الاعمال خامه وخاه
منها ذهب صافي ومنها سراميك
ممكن تفيد المعذره والندامه
بعد نزولي بالكفن في ضواحيك
رد القبر /
فوقك ليا جات النصايب علامه
ثنتين توضع عند راسك ورجليك
ماعاد ينفعك العتب والملامه
من حين روحك ترتفع عند باريك
رد الشاعر/
ياقبر ما دورت منك الكرامه
ارجو عفو ربي ولاني براجيك
اللي بديه الامر ماسك زمامه
رب الملوك ورب كل المماليك
رد القبر/
ياذيب في هذا التحدي غشامه
بلا عمل ماهو مناسب تحديك
اوصيك عهد الله صون التزامه
مني ومن بعدي من النار ينجيك
رد الشاعر/
ياقبر زودت المخاوف جسامه
زدني نصايح نافعه قبل ما جيك
اخاف اجي لك فوق ظهري غرامه
وتسديدها ما يقبل الدفع بالشيك
رد القبر /
اقرأ كتاب الله وافهم نظامه
وتلقى الذي يعني لغيرك ويعنيك
واختار ما يعنيك وامسك خطامه
ما دمت حي خطام الاعمال بيديك.
