أنا لله أحب الناس وأكرههم كذا لله.. )'
-
عَبدالله الكايد* ،
منّ أهَم الشْعراء الذيِن يسِيرون علىَ خُطى وَاثقه ﯛ مَليئة بالشعر ..
عَبدالله الكَايد ..
منّ الشّعراء الذيينّ يستطيعون أن يحولون الفضاء إلى قصيده ،
لا أستطيع أن أختصره أبداً ، وشهادتي فِيَھ مَجروحه أترككم فقط لـَ تتنفسوا وجوده الجمَيل فِي هذه القصآئد الذي اسّتمتعت بَــ قرآئتها كثيراً :) :
تلعن فراغ الكاسّ
والفارغة عينك
حاول تحب الناسّ
لو بينك و بينك,!
لو قلت ،بالنجم اهتدى من تاه و أعياه السهاد
البارحة والريح ما تبّت عن اطرافي يدا
من يهتدي يا سيّدة للضوّ من تحت الرماد؟
من يستمع صوتي ؟ ومن يحبس عن الصوت الصدى؟!
يا آهتي جيتي تعريني من ثياب الحداد؟!
أنا الحداد اللي على وجهي من غيابك ، بدا
جيتي مطر يستغفر الرحمن عن ذنْب العباد
وانتي ذنوب عباد ما مرّوا على درب الهدى
جيتي من اقصى حنجرة فلاح في موسم حصاد
اعياد شكر و ذكر و خشوع و تناهيد و حدا
فدا ، يغني ما غدا للطير ؟ في يوم المعاد
ان عاد ؟ ما له غير أغنّي له، على عيني فدا
جيتي غرور ام بـ طفل يكره يحاصره المهاد
كانت تغنّي له عشان يدوزن الخطوة ( هدا
هدا )، وثارت، ما هدا باله من الدنيا ..عناد
استقبل الشمس وحذف بـ عيونها ( سن ) و عدا!
لليل؟ للمجهول؟ للبرد؟ لـ عيونك؟ للبعاد؟
للضفّة اللي ما لعابرها من الضفّة جدا؟
والله تشتّتّ اجمعك منّك وفي الظلما بلاد
مافيه للظامي بها ليلة يبلله الندى
أنا اشتهيتك ( غطرفة) تفهق عن الليل السواد
آه اشتهيتك ( رقص ) يتسلطن على أكباد العدا
أولاد ابعتقهم معك لله عن ظلم القياد
يمكن تكون أيامهم ، وجهك و صوتي و المدى
لله أنا ، من ينزع اطرافي من اطراف البراد؟
النجم تاه وتاه من بالنجم يا رب اهتدى !
أنا (انطفيت) وما بقى تحت الرماد الا رماد
أنا (انتهيت) وما على شفاهي حبيبي ، ماعدا
يارب ، عطني من تطرف ليلتي (ساعة حياد)
ما انتظر فيها ولا أفقد من الدنيا ، حدا
خطا هالكاس، يوم انه ، ظما ، وانهار لترابك
خطا ، سبابتي ، صحوة ، تراعي غفوة ابهامي
تخاون لظما ، كفي، وكفّ الكاس بـ اسبابك
مصيبة ، من خبر ظامي ، يقوده للظما ، ظامي
من اللي في يد (الاول) تحطم شوق لعتابك
من اللي في يد (الثاني) حزين وخاطره ، دامي
عزاه .. اني اردد. له . ترى ما صابني ، صابك
عزاي أنه .. يردد.لي . حطامك .. يشبه حطامي
بعد ، ما قفّن رياح الجفاف الهوج بـ اسرابك
على (بعضي).. طغى..(بعضي) وظمّت عيني.. اكمامي
وغبت .. بداخلي ، غيبة بقايا عطر .. بثيابك
ادوّر للأمل فيني سحابة .. تغرق آلامي
واسابق روحي الولها من اسبابك على .. بابك
واقول الروح تلحقني واشوف الروح .. قدامي
على بابك تسابقني .. تسب وتلعن غيابك
ولا .القى للصدى .. صوتِ يردّ الروح لـ احلامي..!
دخيلك ، لايجي للريح .شرهه. تجرح ابوابك
دخيلك لا يجي للبرد ما يغريه بـ عظامي
دخيل الليل . وطعون الغرام. و(سكرة) اهدابك
دخيل الضعف .. يا (ذنبي) وكل ما (يجرح صيامي)
طلبتك.. لاتخليني اجوعك حب .. اظما..بك
مدام اني على بابك تسابق روحي . اقدامي ..!
عزا .هالكاس .. يوم انه ظما .. واحتاج لـ ترابك
وانا... ما بلل اكمامي .. عطايا وحشة ايامي..!
مثل ما مُتّ في جوّك غرام آموت بـ ترابك
ويبقى عذري الواهي يراعي غفوة ابهامي
(صعب أسهل ) بدايات الرجوع لـ سكة المجهول
بعيني والرجوع (اصعب) بداياتي من (اسهلها)
من اول رحلتي فيني .. طعن زهر الشباب ،ذبول
وش آخرها.؟ مدام اقسى طعوني جت ، من اولها!!
(خيالي ، واقعي) شفته يحيّر في فضاه عقول
من المعقول يرسم لي حقايق.. ما تخيلها
ترى ما يجرح العاقل من الدنيا .. سوى المعقول!!
وانا المجروح من دنياي ..لو ما كنت عاقلها
ورى مستقبلي الماضي إلى الحاضر ، وش المحصول
إذا الماضي من ايامي أشوف الظلم بـ اعدلها
هنا.. ضمّتني احزاني ..بعد ما غبت لي كم حول
هنا.. سكّين لـ معانق شرايين الفرح ولها
هنا.. علّقت دمعاتي على اقدام الليال .. حجول!!
هنا .. ما حنّت البسمة علي وقلت ازعلّها
هنا.. والا (هنا).. يكفي ، عجزت اوصف ، عجز آقول
عجزت اجمع ألم بابل .. حزن دجله واموّّلها
عجزت آروّض بـ صدري صدى جرح وجموح خيول
أنا مدري غضب والا بـ قلبي تلعب وتلهى
وقفت ..وما وقفت الا .. ادوّر للحلول ..حلول
ابعثر ما ورى نفسي ..إلين اثقلت كاهلها
تعبت احمل من الذكرى على المتن النحيل ..حمول
وانا نفسي وهي نفسي وربي ..ما تحملها
لأني كل ما أقرب ، اشوف ان الطريق يطول
وهو صعبٍ علي ارجع .. والاصعب كيف اكمّلها؟!!
أخاف ارجع والاقيني على هاك الـ (هنا) مقتول!!
واخاف امشي لآخرها واشوفه .. يشبه اولها
غَافَل النسناس ، شعلة في بدايات النهاية
توّها تنعس واخذها من فم الجمر وعطاني:
الظلام وهمهة جرح يتوقّد في حشايه
لاخطفني من يدين الليل في فمّه رماني
ان سكت.. تاهت بي الخطوة عن دروب الهداية
وان حكى من خاطره .. أيوووه للظلما حكاني..!
عسعس الليل وتنفّس حِلم مجهول الحكاية
مو عشاني كل ما عسعس عليه الليل جاني،!
له وطن .. ما يحرمه في داخل المحروم .. رايه
له من احساسي بساتين ، ومن افكاري مباني
الوحيد اللي يقف ضدّي واحس انّه معايه
فيه اماني واكثر ايماني يخاف، افقد اماني
له من الليل الهدوء وصوت (متعبّد) بـ آية
ولي من الحلم اليتيم ، الحلم و اليتم وزماني
بـ ابتسامة ..! يخنق انفاسي على صدر الوصاية
(للمرايا حق واحلام ومشاريه وأماني)
قلت والناس؟ .. ورضاهم؟ عن سخطهم فيه غاية
قال من فيهم .. يوقفّني .. ولا يجلس مكاني؟!
يكفي انّك شفت منهم ما عمى عين المراية
كان ودّك تبقى (الاول) لا تكون (الاولاني)!
ما على بالك يموت بـ صمت في نصف الرواية
زلة لسان و تكون انسان .. بس انسان ثاني، !
لا تقول الناس.. لو (فيهم)! خطاك انت وخطايه
عشتهم عمرك و ابيك تعيش لو (ليلة) عشاني
ودي انزع من جناحي (ريش ليل آخِر غواية)
وآخذ من الصبح.. (ريش آخَر ) بدال اللي كساني
وآتنهّد من حطام اسلافي الرحّل .. حداية
تقطف احساس الثريّا ورد ، لـ سهيل اليماني
وآتهيّا للبحر مقهور واضربه بعصايه
(ضربة الخايف) ولو قلبي من القسوة يعاني!
ينفلق (قافين) بـ اذن اللي جبر خاطر ، رضاية
وآتشظى في (شفاه) اطفال خلق الله آغاني
وان تعبت وشفت في وجهي من الغيمة ، ضمايه
بـ اجمع احساسي واغنّي لك "سقا الله من سقاني"
لانّك اطهر وجه اشوفه (غاب) في وجه المراية
واعظم اعظم من يوقفني..، ولا يجلس مكاني
.
تبي تشوف الضياع بصورته ..؟ شفني
شف يا(عيوني).. عيوني ..تعرف اوضاعي
من دون داعي ، تعانق دمعتي جفني
وشلون لا صار يوم وداعك الداعي؟!
( الجرح ) يعطش..؟ وانا الاوجاع تنزفني؟!
ما يعطش الجرح دام الساقي اوجاعي
تزرعني الريح بـ انفاسك .. وتقطفني
وآروح معها ، مثل ما روّح شراعي
هذي (ذراعي) إذا ..حبيت، تخطفني
تحضن ذراعي .. أو انك تلوي ذراعي!
ما دامني معك ، خل الظلم ينصفني!
كل ما تجيبه سماك.. تعيش به قاعي
خذني لحن من ( زمان الصمت) واعزفني
وآصير انا الناي ..لا.. والذيب والراعي
ميل وتمايل قبل ما الدمع يذرفني
وان ضاقت الارض ، تحتك ... هذي اضلاعي
العب طرب فوق هذي العوج .. وارجفني
اطرب عيوني ،قبل لا تطرب اسماعي
وان شفتني آتساقط ..لا توقفني
واعيك ...(غافي حزن) يالغافي الواعي
اجهلك.. واعرف .. كثر ما اجهلك ..تعرفني
الحزن طبعي ..واشوفه أجمل اطباعي
الجرح يظما ؟ وانا الاوجاع تنزفني؟!
وشلون يظما وانا (الما) يشرب اوجاعي ؟
يتوهـ الضو في ليلٍ من الظلما فـ بعضه تاه
مثل ماتوه وآفتّش فـ عين الحرف عن مهرب
على قد الغموض اللي تمادى بي فـ عينه: آآهـ
على هالآهـ ؟! تتمادى عليّ عيونهم وأتعب
عيون الناس و ( الما ) في عيون الناس من يظماه ؟!
على حد الهلاك تغنّي ازهاري ( ظماه أعذب ) !
يـ عين امّي نسيت اذكر وصاة ( أن العيون افواه )
مثل ما ناكل ونشرب تعبنا تاكل وتشرب
أنا أذكر كل ما قلتي ( عشان أرضى عليك أنساه )
أكيد أنساه ؟!وآغمّض عشان رضاك لا يغضب
إلى يومك وأنا هادي مغمّض ما فتحت شفاه
على نفسي ومن نفسي عليها أنطفي وأشتب
أنا لله أحب الناس و أكرههم كذا لله
حسافة ليتني لله منهم أنكره و أنحب
كسوني ثوب جردني من أحلام الطفولة : ياه
كبرت ! وذاك في صدري إلى البارح وهو يلعب
خذوني طفل ما كدّت " اماني " شعرها لولاه
رموني صبّ متهالك مشرّد شاعر و أعزب !
يـ يمه قولي ان قالوا نبي قربه عشان الله
عشان الله خلوني تراني من بعيد أقرب
أنا بي جرح مدري مين ابوه ؟ و ليه ما سمّاه ؟
أنا لي وجه خلاّه الجفاف السرمديّ أشهب
عليه اعتب إذا شفت الوجيه من الوجيه اشباه
أعرفه يستحي مثلي ومن ( مثله) عليه أعتب ؟!
عشان أرتاح قلت أشطب فـ صدري بالكتابة ( آهـ )
كأني ما شطبت و ما كتبت إلاّ عشان أتعب !
لــَ الشاهق / عبدالله الكايد :)'
