قلها قل ما احبك وابشر بصبر جميل
من بغى الفرقى لقاله عذر واسباب ودليل
خل عنك العذر والأسباب دام الحب ضاع
كان ودك بالفراق ابشر عسى عمرك طويل
لاتردد وأنت لك كلمة ولك أمر مطاع
لي عليك انك تبت بكلمة تشفي الغليل
ولك علي لوقف وقفة الرجل الشجاع
لاتجاملني مخافة قال مدري خوف قيل
عمر هرج الناس ماسمن ولايغني جياع
كان قصدك سر حبك أوعدك لأصبح بخيل
وأحمل اسرارك معي للموت قدر المستطاع
بس قلها قل ما احبك وابشر بصبر جميل
لاتحسبني مثل من طبعهم لوي الذراع
صاحبك ماهو كذا ياصاحب القد النحيل
صاحبك طبعه غريب وغربته غربة طباع
في الهوى مايقبل الحل الوسط والا القليل
مثل ماهو لاشرى يشري ليا من باع باع
ثابت لو هي تميل الأرض حدره مايميل
يدري ان الفقر ماهو عيب والدنيا متاع
ماعشق لذة حياته كثر عشق المستحيل
ولاكره حتى مماته كثر كره الأنصياع
كم تعلم من شديد البدو وش معنى الرحيل
وكم تعلم من غروب الشمس وش معنى الوداع
وكم تعلم من سحاب الصيف وش معنى الحصيل
وكم تعلم من ليالي البرد وش معنى الضياع
ايه انا هذا طريقي موحش وصعب وطويل
وانت لامنك تعبت العالم فجوجه وساع
اعتبرني في بداية سكتك عابر سبيل
ورح وانا قلبي معك من وين وجهة الشراع
يكفي إني لاذكرت في سالفة عشاق قيل
عاشر احبابه شجاع وفارق احبابه شجاع
