في صدري حوابيط و عْذوق
يروى تفاصيلي .. و يثمر قوافي
ملّيت اردّد شعري بصوت مخنوق
و جفن الأماني ف / المسافات غافي
مرات اقول ان الشعر سبّة العوق
و مرات اقول انّه خوي ٍ سنافي
مرّ السحاب .. و لاح في صدره بْروق
و انا سنيني تشتكي من جفافي
انا الضعيف اللي من الطين مخلوق
و انا الحزين اللي جرحْه التجافي
لا تطوّل الغيبات يا حادي الشوق
والله ماني من جفاك مْتعافي
البال .. من برد الهواجيس محروق
و سمر الليالي .. مالها حضن دافي
و طيفك يساومني على دمعة الموق
و الدمعه اصغر من سموم الخوافي
جيتك معي قلبي و عمري ف / صندوق
امشي وسِط صُلف المقادير حافي
مالي على الغالي مشاريه و حقوق
ان كان ما هو بالأحاسيس وافي
عذرك معك من غبت يا حادي الشوق
عذرك سمين .. و عْذر شعري جفافي !
