قصيدتي زاد بعيوني جمالها *** وأخذت أنقي بالمعاني جزالها
وأكتب معانيها من الشوق والغلا ***لأمي وانا أصغر شاعر من عيالها
كتبتها في غربتي يوم رحلتي ***لما طرى لي بالسفر ماطرى لي
أمي وانا بوصف لها زود حبها ***وان ماحكيت لها قصيدي حكى لها
أمي لها بالجوف والقلب منزله ***مكانة ماكل محبوب نالها
أقرب من ظلالي وانا وسط غربتي***وأنا تراي أقرب لها من ظلالها
ماشافت عيوني من الناس غيرها ***ولا خلق رب الخلايق مثالها
أغلى بشر في جملة الناس كلهم***وأكرم من يدين المزون وهمالها
أتبع رضاها وأرتجي زود قربها***واللي طلبته من حياتي وصالها
الصدق مرساها والأشواق بحرها***والعطف واحساس الغلا راس مالها
أهيم فيها وابتسم يوم قلبها***يسأل وأنا قلبي يجاوب سؤالها
وان طلبتني شيء فزيت مندفع***أموت أنا واحمل تعبها بدالها
اصبر على الدنيا والاحزان والتعب***واحمل على متني فطاحل جبالها
واسهر واعذب راحة القلب بالشقا***واعيش اعاني بس يرتاح بالها
تربية ابوي اللي على الطيب بذكره***اللي وهبني للحياة ومجالها
نور لي دروبي وانا طفل مبتدي***حتى تركني واحد من رجالها
الوالدين اولى بالاحسان لاجلهم***واولى بتكريم النفوس وعدالها
اقولها وانا على الله متكل***والله عليم بقدرتي واحتمالها
ياكلمة اغلى من الناس كلهم ***ياشمس بقلبي بعيد زوالها
يافرحة تملي الكون باكمله ***ياشجرة تكبر ويكبر ظلالها
تضحك لي الدنيا ليا شفت زولها***مثل السماء تزهي بطلة هلالها
والبعد عنها ياهل العرف ماقدره***لاشك ناري زايده باشتعالها
مااعيش ببلاد ولاهي بارضها***ولا بي عيوني كان ماهي قبالها
أرض تدوس بالاقدام رملها***أموت فيها واندفن في رملها
