لاخير باللي ماله أول ولا تالي
عن اللي صفح نصفح ولو كان هو غالي
والاقبال يبشر صاحبه بالنبا العالي
على مامضى بالوقت الأول ومابقى
فلا خير باللي ماله أول ولا تالي
وأنا في سنين مابقى إلا رسومها
وحيد فريد كن ماقيل يبرى لي
الى شفت جفوا من رفيق لقيتني
جزوم على جفواه في كل الأحوالي
ولا بين اسراره وعاره يعورني
اخليه في فاله وأنا اروح في فالي
ولا نيب افاخر بالعطايا وامنها
لو فوتت من شيمتي دق وجلالي
ولا نيب حباب لمن لايحبني
تصير الموده في بلوى وغربالي
كما تاعب يتعب على غير فايده
فهو سابق حفار جحر وهو خالي
ولا بين اسراري لمن لا يسرني
ولو شلت حمل باهض اشوى لي
توريك نفسك بالمجالس وبالرخا
كما لمعة القصدير في طافح اللالي
فلا هقيت إنك تروده وترتوي
فلا تاجد إلا حنظليل به اشكالي
ولا نيب أجازي راعي الطيب بالردا
وأنا خابر ماادركت يذكر من افعالي
اجازيه بالحسنى على الطيب والنقا
واشيع ثنا مجده على روس الاقذالي
ولو حسني تالي زماني وضامني
مقادم كراماته تكفي عن التالي
ولا اطلب ثنا المعروف من غير صاحبه
اقوسه بعقلي واستدله بالامثالي
فلولا الدلايل مااهتدى ساري الدجا
ولولا المعرفه ماادرك الجود رجالي
ولا مهدي شوري لمن لا استشارني
فهو مثل صوت القايله بالخلا خالي
ولا نيب هراج على غير مستمع
تجي رمية العرضه لها فعل وامثالي
ولا ناصح من لا يميز نصيحتي
يصير الدوا مجهول والجرح قتالي
ترى عاذل المشتاق عن راس مقصده
كما اللي يرد السيل يرجع إلى العالي
فلا خير في رجل إلا صار ماله
رفيق يميل مع الدهر حيث ما مالي
ولا نيب جزاع الى شفت كربه
فلا كربه إلا بين فارج وحلالي
واصفح الى شفت الجفا من رفاقتي
وادور بدلهم لي رفاقه ومنزالي
الابعاد عن دار المذله معزه
ولو من ورى تونس مقامي هو احلالي
ولا نيب صداد بوجهي عن الذي
يدور المرضاتي ولا نيب ملالي
