خل الذي غير حنانك يسليك
خل الذي غير حنانك يسليك
يمكن يفيدك لانسيت وتناسيت
ارجوك لاتسال ولاتقول وشفيك
يكفيني اللي ذقت واللي تقهويت
بسير في دربي ولاراح اشكيك
ولحكم ربي قـانـع ٍ ماتحريت
كم كنت انا والشعر دايم نجاريك
اكتبه باسمك لاذكرتك وونيت
انثر شعوري واتسلى بطاريك
واصون حبك لاتباعدت وابطيت
تغلط علي اوقات وانسى واداريك
واشيل همك كل ماصبحت وامسيت
وانتي ولاهمك وربي يجازيك
وش فايده حزني وياليت ياليت
تفضحني الدمعات والعين تبكيك
وتسريبي الضيقاات ياما تشكيت
هذي جزاتي تبعدين بخطاويك
حسبي على حبٍ بدربه تماديت
ياخاينه بالحب ماني براجيك
هذا اختيارك لامنعتك ولا ازريت
غرك زمانك وانكشفتي بتاليك
اصلا متى بالله في عمرك اوفيت
الحين ابرحل واتناسى لياليك
خيبت ظني للاسف يوم ظنيت
اخطيت في حبك ولاعاد ابغيك
فيك الغدر سكان وضلوعك البيت
خلاص من ذكراك وايام ماضيك
جاك الخبر واظنه اللي تمنيت
خل الذي غير حنانك يسليك
وانا بعِـزي عن مقامك تعلّيت
