أشتقتلك ! ماهو كلامن وتعبير
سؤالك اسهل من حروف التعابير
وجوابه اصعب من مواجيع الاضلاع
لو صارت بعيني حروفي مدابير
ماهي ثقل جرحك وهمي والاوجاع
تبغا جوابي ؟ جاك كله تفاسير
يرثي عيونن شمعها حدرها ماع
وحشتني ! رغم الجفا والمخاسير
أصد عنك وخاطري فيك ماطاع
أشتقتلك ! ماهو كلامن وتعبير
لاوالله إلا شوق طايع ومنصاع
من كل صبح إلين هيف بنا عصير
وانت بخيالي اشربك حب واطباع
ومن حزة المغرب إلا حزة الطير
وانا اشبعك شوق وتوجد ومرباع
يعني كذا ولا كذا وين ماسير
حبك تمكن يالغضي بين الاضلاع
يعني احبك واعشقك ويش مايصير
وابقا على طول الدهر فيك طماع
صوتي غدا ماضن يلقاه تبرير
واللي شبعك من الهوى عقبكم جاع
ماني بنادم . لا . ولكن عسا خير
هذي مقاسيمي وهذا الوفا ضاع
