أحبّك : والـ صمت منفاي ,
حضن أكثر | تفاصيلك !
ندهتك : قلت لي مو جاي ,
وبلّل دمعي منديلك !
ايلين أيقنت بك نسّاي ,
نسيت اش كثر أعني لك !
مَ كنت إلك الظما والـ ماي !
مَ كان الـ قلب | يدعي لك !
يـ صبحٍ تهت به وخطاي .
تعدّتني تنادي لك :
تعال اعزف جروحي ناي ,
تعال اسكني ببكي لك !
يـ آخر فرحتي | رجواي ,
تضوّي فيني قنديلك !
ليه ياضيقي تجي دايم | حنون !
عكس فرحي لاوصل كِنّه حزين ,
تمتلي بي نبض وأصرخ بك تمون ,
إيه خذني لك : ابسلى بك سنين !
ودّي أنسى في متاهاتك | ظنون
ودّي أرحل عن بقايا الـ عابرين !
ودّي أخلق لي فضا يمكن أكون ,
أمنية طارت ولا تدري لـ وين !
من رحل عنّي تلبّست الـ سكون ,
لا دمع ينزل سوى عبرة | تبين !
إن نسيته قصد هزّتني الـ طعون ,
وإن ذكرته كل ماحولي : يشين !
بي حقيقة وصّلتني للـ جنون ,
لين كلّي تاه ب أنفاس الـ آنين !
دايم الأوفى مقدر له : يخون ,
كل فرح ويحضن الذكرى | حنين !
كانت الليلة كئيبة .. والقهر محتاج باب
كانت العتمة مُريبة .. والضّيا همسه خفيف ,
زحمة من حولي تناثر .. بينهم شفتك سراب ,
كلما ألهي بصدّي.. هبّت الذكرى خريف !
أسمعك تنده [ تعالي ] نبتر اطراف الغياب ,
وضعنا صاير رمادي .. يشبه اوقات الرصيف!
وأشعر بدافي حنينك .. يشعل بقلبي عتاب ,
ذوّب أطرافي بـ [ وينك ! ] هالشّتا برده مُخيف ,
عامٍ أقفى من بعادك , صمت .. دمعة .. واغتراب
تاهت أحلامي بـ قُربك .. ليتني ألقاك ضيف !
المباني لك تنادي : لفّها حزنك ضباب !
هو متى ترجع دخيلك..؟! حالنا دونك كسيف !
الأغاني : صارت أقسى , والأماني : شمع ..ذاب ,
والفَقِدْ إني أشوفك ! .. بس كيف أُوصلك كيف !
تدري هالليلة طويلة.. وإحتياجي لك عذاب ,
كل ماناديت [ عجّل ] رددت ظلماي : طيف !
للـ موت أبعث أمنياتي وأغنّي ,
خذني لعندك مابقى شي فيني ..
لامن تعبت وماسأل حد عنّي ,
أحسن لي أسكن بين صمتك وبيني !
قل للحياة المترفة : بس كنّي ,
ماعاد تغري لهفة الـ شوق عيني !
كم لي أبعثر في مدى الصوت ظنّي ,
ظنّك يجيني واشعر إنه يبيني ؟!
