انا بحاجه عمر / عندك عمر ثاني؟!
يسعد مساكم / صباحكم
هلا بالجميع ..
ولقاء متجدد آخر يجمعنا احبتي واتمنى ماراق لي يروق لكم ...
ما طاح دمع الحنين الاّ على الدفتر
ياغلطة الحبر ياكثري على أحزاني
ضاقت بي الأرض وش باقي بعد أكثر
الاّ يضيق الكلام اللي على لساني
قدام عيني اشوف الحلم يتكسر
والخوف طير(ن) يغرد من على اغصاني
من طال ليل الرحيل وغربة المهجر
أيقنت ان الحزن لون(ن) من الواني
ياسكّة الفرح مرّيتي تعبت أنطر
كل شي أحبّه اشوفه راح ماجاني
ماكل درب (ن) مشيته كنت به مبصر
لو تبصر العين مافرحي تعداني
علمني الحزن كم ياخذ ولا يشكر
وعلمته شلون لامن ضاق يلقاني
من وقف العمر دون الضحك مستنكر
ومن علّق الهم صوره فوق جدراني
لو استر الجرح من نزفه بدا يضهر
واجرحك اللي كسرني قبل عدواني
مو رافض تغيب بس عطني وعد واصبر
انك اذا غبت ماياخذك نسياني
محتاج ( كسرة وصل ) والوقت مستكثر
شفت احتياجي لقلبك وين وداني؟!!
متى تحن الليال وترعد وتمطر
طولت ماسالت من الشوق ودياني
في كل دقيقه احس ان العمر يقصر
انا كبرت بغيابك كثر ماعاني
خذني على قد قلبي وانت ماتخسر
والمس جروحي ولو من باب حرماني
ارجع ابسألك عن حاجه اذا تقدر
ماشفت لك قلب(ن) هنيّا وخلاني.!
مازلت ساكت عشان استوعب المنظر
مو كنت ويّاي؟ ليه اليوم وحداني.!؟
بالأمس تجلس معي ونسولف ونسهر
واليوم حتى الحكي حسره على اذاني.!
يوم السوالف تزين بلكنتك اشعر
ان كلمه الحب مخلوقه على شاني.!!
سلمتني للغياب المر مستبشر
انّي مع الوقت انسى صدرك الحاني
من غبت هب الجفا والقلب متبعثر
كنّك فتحت «السما» وآآخذت جنحاني.!!
حاجه ابي منك والمحتاج مايعذر.؟!
انا بحاجه عمر / عندك عمر ثاني؟!
اخوكم / رايق البال
