من اللي قبل ما يرحل ترك فقده على بـابي ؟!
يسعد مساكم / صباحكم
هلا بالجميع ...
ولقاء آخر متجدد يجمعنا احبتي واتمنى ماراق لي يروق لكم ...
سما .. خوف الكلام اللي جرح هذا الحديث أنفـاس
بقايا الصوت من ضيقة عتـاب وغيبة أحبابي
سؤال(ن) كـل مـا يطري يطير من الجفون نـعـاس
من اللي قبل ما يرحل ترك فقده على بـابي ؟!
متى صار التعب صوتي ؟! وهي هذي وجيه الناس
حضرت من التعب فيها وأنا الحاضر من غيابي
يا كـل الفقد من بدري غـصـون المغفرة يبّـاس
هنا الأصفر خذا شكل المـلام وجفف عتـابي
أحس إني وحيـد أكثر من أية وحـدة وإحسـاس
أخاف اضيع في الوحدة من الوحدة على مـا بي
يا آخر صمـت في صدري كأن الحـزن له حرّاس
و كنّـي لا تنهـدتك يردونـك وأنـا مـابي
كذا صار الوطن غربـة من الغربـة ولا ينـدّاس
أحـد ماله أحـد حتى ثيـابي مـاهي ثيـابي
رحلت وما رحـل ليل(ن) مـلا هذا السهر وسـواس
ولا ردوا مواويلي وهي توصـل لـ غيّـابي
كثير من الوجع أبيض .. كثير من الخضار إفلاس
كثير اللي بعد غابـوا خطـاويهم على تـرابي
أنـا لي حزن ما يفنى ورا هـذا السؤال أنفـاس
من اللي قبل ما يرحل ترك فقده على بـابي ؟!
طابت لياليكم ..
اخوكم / رايق البال
