يقولون العرب دار بلا مغليك ماتغريك
أبد والله ..سمعت بطاري عيونك وجيت أغليك
يقول القلب سلملي عليه ويطلب وصالك
حبيبي وش تقول بعاشــق قصــة غرامه فيـــك
نســى الدنيا ومن فيهـا وجا ينشد عن أحـــوالك
حبيبــي جيت لمصـافح مواعيد الفــرح بيــديك
وجيت أعطــي يمينـك حب ماتدريبــه شـمـالك
أشـوفك واسـمعك قبــل أعرفك واشتاقلك وابيك
واحس آمال عمــري من عرفتـك تشبــه آمالك
أنا ماعشت قبـل أعيش باحساسـك وقبل آجيـــك
حبيبــي جيتـك بقلبــي ولو ماجيتــلك جالك
أحاسيس كريمه وانت تستاهل كرم مغليك
ولوما أشرقت شمس وصلك رحت أتبع ظلالك
أنا لاجيت أسولف عن شعوري قمت أسولف فيك
وادري برغم الشوق مامريت ببالك
يقولون العرب دار بلا مغليك ماتغريك
واقول إنك بليا حب كنك عايش لحالك
دريت ان الغلا مثل القدر يرضيك لو يبكيك
ولاينفعك بعلوم الغلا عمك ولاخالك
مابين الحلم والواقع يصيبك حظي ويخطيك
متى تصبح قريب اللي وقف بأماله قبالك
ولاتزعل من اللي لازعل منك رجع يرضيك
ولاتطري كلام البعد فال الله ولافالك
