البارحة وأرسم ملامح .. طفل لو يضحك حزيـن
تمتمت .. واستشرف ممر .. ولا لمحت العابرين
إلا وجيه أشباه ناس .. تشاف لحظة مـا تشـاف
لملمت مني ما بقى .. والقلب لو يصبـح يديـن
شقّق ملامحهم عبث ماهي شجاعة مـن يخـاف
وش تستدر من العطش يا جالس بنهر الحنيـن ؟
تستنزف سيول السراب .. ونظرتك مثل الضفاف
لك من سنينك ما انكتب .. ليه الغرابة ؟ والسنين:
سبعٍ سمان وبعدها يـا صاحبـي سبـعٍ عجـاف
قمت أستشفك ذنبٍ أبيض .. يا عقاب المذنبيـن
وأنااااا .. اتأرجح بين نار المغفـرة والإقتـراف
أرتّبك في داخلـي .. واستوطنـك شـك ويقيـن
وأشك بشكوكي، يقين إنك مـن الحلـم اقتطـاف
البارحة مرت كذا .. والقلب في صمتـه سجيـن
البارحة مرت كذا .. والقلب يرفـض الاعتـراف
البارحة وأرسم ملامح .. طفل لو يضحك حزيـن
في يديه كراسه كتب في صفحة الآخـر "عفـاف"
البارحة وأقرا ملامـح .. طفلـة السـر الدفيـن
في يدينها كراس فاضي من الغلاف إلى الغـلاف
البارحة .. يا البارحة .. يا البارحة .. كم تزرعين
أحلام عاشق في بلاد البعـد وفصـول الجفـاف
يا صاحبي وش هو المطاف إلا قلوب العاشقيـن؟
يا صاحبي وش هو الفراق إلا نهايات المطـاف؟
عمر الندى ساعات .. والا العمر: عمر الياسمين
والبرد ما هو بالضلوع .. البرد من برد اللحـاف
أقسى عليّ من الفراق إلى سألتك: أنت ميـن ؟!
واقسى عليك من السؤال إنك تجاوبني:أخـاف !!
