من يفقد أعصابه على أدناه ماجاه
تأكد إن نفسه حزينة كتومة
لا تسأل اللي منغبن عن نواياه
قدر ظروفه وإن زعل لا تلومه
ولا تحرجه ولا تحده على أقصاه
ولا تجرحه ولا تفرح أخصومه
واضح ولا يحتاج فتره وتقراه
جالس ونظراته تقول محرومة
قلبه جريح وخانه الوقت وأعياه
بـ تهاجمه أجل تحمل هجومه
لا تقول وش علمه ولا تتبع أخطاه
أدخل وسط قلبه وتعرف علومه
تجيه رايق وأنت تجهل خفاياه
وتشين أخلاقه ، وتنبش أهمومه
ياخوي من صمته تبين المعاناة
يمكن لو لحاله ،يشقق هدومه
أركد ترى التهميش واللامبالاة
بالشخص كنك بايعه بأي سومه
تراها مستوية معاه جاه من جاه
شجاع لكن طايحات (ن) عزومه
هذا قبل لو تعرفه ما تعداه
من طيب رأسه من جمايل سلومه
