( كثِير اشتقت )' ..
غريب
وكل ..مافيني .. يناديني
تعال بذمتك يعني
((ولا مره حصل وأشتقت))
(...............)
كثير أشتقت...
ولكني ذخرت العشق للأحلام
وصبيت الوجع للمبعدين أوهام
ولاحسيّت بالغربه
ولا لوّحت
أنا مبعد بدون أحساس
ولكن .. فــقــت
ولا فرقت ...
بين الحزن ..والتمثيل
ويمر الليل
ولا صبح بـ عيوني لاح
ولا أفراح
تقدر عنك تأخذني
وتبعدني
حنينك ..وين ودّاني
على أحزاني
على الذكرى مسيّر بي
ولا ألقاك غير جراح
بقايا أشباح
بقايا أشباح
.................
نسيت أرحل
ولكنّي
قدرت أستدرك غيابي ...وأغيب هناك
نسيت أرحل
ولكنّي
قدرت أستنزع أحبابي ... من الأشواك
وأذا مرّيت
في بالك
بلا أدراك
أذا مريت .. لو بالبال
ترديني ولو بك ضــقــت
كثير أشتقت
مثل من قبّل تراب الوطن ..
أشتاق
وأحس بفراق
وأسولف
عنك للدنيا يمر الوقت
أكثر من الحب ما أقدر ..
ممكن تحبيني أكثر ..
بس أنا أنسان عادي ..
أمسك الطابور مثلي مثل الأغلب في بلادي
أزرع من أول شقى بالشهر غربه
وأنسى نفسي في محطات الرحيل وفي بعادي
أيه عادي
مثل الأغلب في بلادي
أزرع الشهر الطويل أحلام وأدري
في حصادي
تجين أقسّم لك ثمن هالعمر في تالي حصادي
أحسبي لي ..
كم لتر يكفي إرتحالي
إحسبي لي ..
كم شقى كم وجه غالي
رحت عنّه في غيابٍ ما أدري أرجع منه سالم
أو تلقفني يدين الموت ويدين الليالي
أحسبي لي ..
كل لحظه في غيابي
من متى بالظبط مدري ؟
قبل كم ؟ الله وأعلم !
ما حسبت ولا مداني
أذكر أخر حلم يمكن من عمر أو يمكن أكثر
ما مداني
مثل كل البدو أهيجن
بس كنت أمزج مع هذا الغنا بعضي جناني
مو مثل ما تحسبيني
أبسط من اللي توقعتيه وأكثر
أذكر إني طفل وأذكر
بيتنا إيجار في قطعه ثلاثه
وأذكر إني كنت الأكبر
بين سبع أخوان أصغر
أذكر الشارع صغير وأذكر المسجد كبير
وأذكر أذكر
كان صوت أمي ينادي
ياوليدي
قوم لا أعلم أبوك إنك تغيب وأقعد أتململ ولا أبغى ..
يوووه يمّه مدرسه والله تعبنا رغم إني كنت لسّه بأولى واحد ..
طبعاً أمشي لا سلام ولا كلام
ولا حبيبي وين بوسة قبل تمشي
لا عطر لا مشط لا أكوّي ثيابك
يا صباح الخير يا قطعه ثلاثه
يا صباح النور قبل النور يطلع
صدقيني كنت الأبسط
كنت عادي
مثل الأغلب في بلادي
أدري أني قلت بعض البعض لكن باقي أكثر
ما أقدر أقوله ولا أقدر
أكثر من الحب ما أقدر
ممكن إنتي تعرفين الحب أكثر ..
لأن وقتي ما عطاني
وقت أحب ولا أتذكّر لو أغنّي كل هذا الشعر أماني
في ورق وأحرف وأغاني ..
شعر يسلم راسك أصلاً كل حرف وكل معنى من خيالي
أغرب الأشياء إنك
تكتب إحساس الخلايق
وإنت ما عشت الكلام اللي تقوله
بس الأغرب ..!!
إنك أبلغ من مجرّب وأنت ما جرّبت أصلاً
وأكثر أغرب..!!
إنهم يقرونك أبلغ ..!!
لا تناديني كفاني
كل ما أسكن في مدينه
تنبذ أوراقي حزينه
لا تحبيني تراني
ما عرفت الحب يوم العمر توّه
عاد عقب أقفى كثيره
لا كبيره ..
لا كبيره ..
إتركيني
بين الأوراق الحزينه
إتركيني مثل محراب يتعبّد في هدوء
وفي سكينه ..
( ما بجيتك آنا بجّتني السفينه
منين ماهب الرذاذ تريد تبحر )
مدري شـ / دخّل مظفر
بس إحسّ إنه معبّر
أكثر من اللي أقوله
أو من اللي كنت أحاول بس أقوله
أكثر من الحب ما أقدر ..
أكثر من الحب ما أقدر ..
نواف التركي
27-03-08, 12:51 am
تعرفين اللي يغنّي ..
( عيونك أخر أمالي ) ..
تعرفينه ؟
سمعته قبل مدري كم سنه لكن ..
ولا حسيت به لحظه ..
وكان يدندن بعوده ( عيونك أخر أمالي ) ..
( وليلي أطول من اليم ) ..
وكنت أخر من يفكّر يجي يوم وأحس مثله بـ هالأحساس ..
ولا ذكرى ولا عاشق ولا أيّة هم ..
وجيتي مدري من أيّة سحابة تمطرين وكنت ..
أحسب إن المطر نعمه ..
وأبلل في ظلوعي قلب ..
وينبت من سحابك حب ..
.
.
.
( عيونك أخر أمالي )
وصرت أعرف أغنّي مثلهم وآحب ..
وصرتي يم ..
وصار الليل بغيابك مجرد هم ..
وصرتي تستلذيني ..
تغيبين أكثر وأكثر ..
وصرت أشتاق لك أكثر ..
ورحتي تبعدين أكثر ..
وصرتي أخر أمالي ..
وصار الليل مثل اليم ..
وصرت أبحر بلا مرسى ..
تجدّفني يدين الهم ..
.
.
.
ولا ذكرى ولا عاشق ولا أيّة هم ..
لو أرجع بس مثل أول ..
بليّا هم ..
لو أرجع بس مثل أول ..
بلا حب وبلا عشق وبلا أيّة هم ..
لو أرجع بس ..
نواف التركي √√√ .
