الشعر يزهمني وانا بي جنّي

[عاشق البوادي]

الشعر يزهمني وانا بي جنّي
يا مستلذ القاف ... قرّب منّي


واصدح بصوتك وانتبه يا ميحد
هونك على العشاق يوم تغنّي


لو لاك ما بيّح خفوقي .. كلمه
ولا شفتني اقصد بها واونّي


يا مرحبا ... باللي لفانا عاني
الكل واحد من اباضي وسنّي


ويا مرحبا .... ترحيبةٍ / مليانه
فيها شذى النرجس وريح سمنّي


ومعطره باحلى عطور / فرنسا
وريح المعتّق من حلاه / يخنّي


وتمر الخلاص اللي طعمها سكر
محموسةٍ معها ... دلال البنّي


جينا نسمعكم قصايد / جزله
من كل بحر .. وكل لحن وفنّي


ابغي اصارحكم / ولكن لحظه
كنّي بخبّي شي/ لا مب كنّي


البنت ي اللي جالسه ف الاخر
تبغون شوري؟؟ اخّروها عنّي


لانها تشوّش / عقلي وافكاري
ويشوش راسي وارتبش واجنّي


حتى القصايد ما رضت توصفها
حازت جمالٍ قد تعدى الظنّي

[عاشق البوادي]

مساكم الله بالخير الجميع
والسموحه ع الانقطاع
جصيده من كلماتي عسى تنال اعجابكم

[الشاعر محمد الشامسي]

عاشق البوادي ،،نص جدا بديع

خفيف اللحن جيد المفرده غزير المعني جميل المبني ،،

صح قلبك يامبدع علي كذا جماااال،،

اخوك حرف ،،

[حمد نجد]

الله الله اللله ... اي والله نالت اعجابنا وزد .. صح لسااااانك على هذه المعزوفة الشعرية الراااائعة
غبت عنا وطولت ولكن عوضت غيابك بهذه الدرة فشكرا لك

[نـــــــقــــــــاء]

جميلة جدا أخي
أسعدك الله

[عاشق البوادي]

عاشق البوادي ،،نص جدا بديع

خفيف اللحن جيد المفرده غزير المعني جميل المبني ،،

صح قلبك يامبدع علي كذا جماااال،،

اخوك حرف ،،

هلا بك اخوي
صح الله بدنك
حضورك الاجمل

[عاشق البوادي]

الله الله اللله ... اي والله نالت اعجابنا وزد .. صح لسااااانك على هذه المعزوفة الشعرية الراااائعة
غبت عنا وطولت ولكن عوضت غيابك بهذه الدرة فشكرا لك

ما عليك زود أخوي حمد
تعليقك بحد ذاته وسام
صح الله بدنك ولا هنت

[عاشق البوادي]

جميلة جدا أخي
أسعدك الله

تواجدك بين حروفي هو الاجمل
وياك

[بدر الدجى]

ابغي اصارحكم / ولكن لحظه
كنّي بخبّي شي/ لا مب كنّي

البنت ي اللي جالسه ف الاخر
تبغون شوري؟؟ اخّروها عنّي

لانها تشوّش / عقلي وافكاري
ويشوش راسي وارتبش واجنّي

حتى القصايد ما رضت توصفها
حازت جمالٍ قد تعدى الظنّي

◆ ◆◆ الله عليك ياعاشق....معزوفة رائعة وبوح جميل ...لآهنت ◆◆◆

[بيبرس العماني]

الإنقطاع أيها العاشق جاء بالإبداع

تسلم عزيزي
نص غنائي جميل

تحياتي