يا صلاله خبرينا // عن قلوباً 'تهتوينا'

[نوارة الكون]

متابعين لك إستاذه نواره واصلي

تسلم اخوي ومشكور ع المرور

[نوارة الكون]

((الجزء الخامس ))

(( انتظرني يالجنوب.. تاق قلبي..وصاب ظني..

اني تايه من زمان...ومالي مأوى...غير حضنك..))!

جسمي مااا عاد احس فيه ..خدر عاام ..الآن احنا فالجنوب ..في صلالة بالتحديد..
العمران في صلالة راقي ..وافضل بوايد مما كنت اتخيل...
حركة السير بالشوارع هادية جداً ..والسبب معروف لأنا بمنتصف الليل ..
عيوني تفتح وتقفل والنوم داخلني بقوة..ما اقدر اركز كثير..بس احس بالسيارة وانعطافاتها الكثيرة ..اللي سببت لي غثيان ..لأني ما متعودة على السياحة الداخلية..ولا على ركوب السيارة لسااااعااات..رجعت راسي للخلف وارخيته ...واغلقت عيوني ...وتنفست بعمق ..شهيق ..زفير..شهيق ..زفير...تذكرت باسل اللي متأكده من انه يعيش حالة صدمة الحين ..كان يتوقع اني راح احط له شور في حياتي....منشان يجي ويفرض رأيه علي..!!
ليش ..؟؟! هو ولد عم لا جاء ولا راح ..وما تعارفنا الا من هاليومين..!!

فكرتي ورأيي عنه انه انسان محب للتسلط بس مو علي أنا...انا حره وبنفسي اقرر ويش اللي اريده واللي ما اريده..تحصيلي العلمي طوال ذيك السنوات مستحيل ارضى انه يروح هدر.. ولكن ما يمنع اني أأجل هالسنة الدراسية ..منشان اكون اقرب من اهلي اكثر..وعموماً راح ارتب اموري بمساعدة من خالتي ....خلال الأيام المقبلة ....انتهى تفكيري ..لما توقفت السيارة اخييييييييييراً....!!.

قال عمي ( الحمدلله اللي وصّلنا بالسلامة ..الحمدلله على السلامة يا عليا ..ويا مرحبا بك بوسط هلك )
وصلنا اذاً ......طار النوم ...طار الغثيان ..رجع الخوف والتوتر..من المجهول ..من الناس اللي راح اعيش معهم ..خلال الفترة المقبلة...

قال باسل ( عمي بوخالد ..بتبات ( بتمسي ) هنيه ..ولا تباني اوصلك بيتك )

قال عمي ( ابا انزل اسلم على الوالدة ..ادري بها مستحيل تغمض جفونها..وهي تعرف انه احنا جايين)

نزلت من السيارة وكل مفاصلي تشتكي من الجلوس اللي اتعبها..!!
بديت اتنفس بقوة ..وعدلت الغشوة ..رفعت طبقة خفيفة من الغشوة وبقيت وحده فوق عيوني ..حتى اقدر اشوف زين ..لأني ما متعوده على تغطية وجهي وعيوني..اول ما بديت امشي ..كنت متأكده ان منظري مضحك بشكل فظييع..لأن العباية بحرررر..طويلة حيل ..!!!
ما ادري ليش عندي احساس انه باسل ماخذ هالعباية على قياسة العملاق..!!

لما بدت تتضح الصورة اكثر...وجهت نظراتي على المنزل الفخم ..الواسع ..بلونه الأبيض وجذبتني الأضواء المنعكسه بدفئ على السياج اللي محاوط اشجار خضراء كبيرة من الجانبين....و مع التدرج المذهل للبلكونات من الطابق الثاني والثالث والنوافذ والأبواب الفرنسية الزجاجية ..كان المكان قطعة من الخياااال ..تصميم مبهر..متقن لأبعد حد..حسيت المنزل اسطوري ..!! على الرغم من انه ما يزيد عن ثلاث طوابق ..ومساحاته مو كبيرة لدرجة ...كان متوسط لكن التصميم فعلاً حلوووو...
ذبحني الفضول من حبي للهندسة المعمارية والديكور....وتسائلت اذا كان هذا شكله بهالروعة من الخارج ..فكيف من الداخل...!!

بديت امشي ورى عمي بالضبط ..اتبع كل خطواته بتوتر...!! دخل من الباب الزجاجي الواسع ودخلت وراه بخطوات مستقيمة ....لحد ما صرنا بوسط الصالة الواسعة ...

الفخامة الشرقية كانت تغلب على المنطقة..بسجادها الفاخر..والألوان الذهبية ..الممزوجة بخفة مع اللون الأبيض والعودي ...

حاولت اشغل نفسي بالنظر للوحات المعلقة ...اللي تحمل مناظر تراثية قديمة ..مطلية من جوانبها بلون الذهب ..لكن من دون فاايدة فرغم ذلك ..التوتر كان يشدني..والهدوء الغالب على المنزل كان غريب ويزيد الجو توتر.....!

اظن ان الكل نايم ..!!لكن من اعني انا بالكل ...؟؟؟!!!

من موجود هنيه..ومن اللي عايش ..!انا ما اعرف اي معلومه عن هلي للأسف...!!

صوت حاني لحرمة عوده ( كبيرة ) فالعمر كسر الصمت

: ( حيا الله ...حيا الله من ضوى علينا..حي ذا الشوف)

قبلها عمي بوخالد فوق راسها وهو مبتسم ( الله يحييك يا امي..رغم اني عارف ان هالسلام ما مخصوص لي انا الليلة )
ابتسمت في وجهه ..ثم التفتت ناحيتي..بنظره كلها فرح ، ألم , شوق , مزيج مختلط من المشاعر..لحظات صمت مرت وما حسيت إلا وانا مسجونة بين يدين والدة ابويه ..بأحضان جدتي ...جدتي رددت في نفسي....بين يوم وليله اكتشفت انه معي جده...!!

لا حرف ولا كلمة ولا ادنى صوت ...باستثناء صوت بكاء يصدر من جدتي بين الفترة والأخرى ....اما انا ....في قلبي ودي اقول لها اشياء كثيييرة ..!
لكن لما جيت انطق ...ما ساعدني اي حرف بالظهور...!!

الى ان قال عمي بوخالد( لا إله إلا الله ...يكفيك الدمع اللي سكبتيه طوال هالسنين يا امي ..اليوم افرحي ..هذي بنت المرحوم بين يديك..)

بعد دقايق ..خففت جدتي من احتضانها لي ...معقول انها تحبني ..وصار لها سنين وهي تتمنى تلمني بحضنها ....وانا ما اعرف عنها شي...والله لو اني اعرف كان جيت وركعت تحت رجلها من سنين ..ولا احرم نفسي واحرمها من المشاعر اللي تجمعنا كحفيدة وجدتها...

بعد لحظات حسيت بيد ترفع غشوتي وتكشف عن وجهي ...مرت لحظات وجدتي تتأملني بصمت ..كنها تبا تخزن ملامحي بقلبها ...لما يحس الإنسان بأن في شخص يحبه ويغليه ..وينظر له بشوق ومن دون ما يشبع من شوفته ..يتولد بداخله شعور بأن العالم موشح بالبياض ..ينسى في هذيك اللحظة كل ألم وكل عثره سبق ومر فيها بحياته .....

طاحت عيني بعين جدتي ..شفت آثار تقدم العمر..وتعب الحياة ..والدموع ..ما قدرت تخفي ملامح الجمال الواضحة في جدتي ..اسمرارها العذب...انفها العربي المستقيم ...وسع عيونها..بلونهن الناري......... لحظة ..لحظة .....نفس اللون..!!!!!

لون عيون جدتي ناري ..مماثل لعيون باسل..!!

آآآخ راح احسد هالباسل على حظه بالعيون الشبيهه بعيون جدتي ..!!!
ليتني طلعت اشبه جدتي ويصير لون عيوني مثل هاللون...!!!

قبلتين على خدي صحتني..ودفعتني لأرد لجدتي قبلة احترام فوق راسها ..

قالت جدتي بصوت تتخلله مشاعر الإشتياق( السلومة يا بنتي )
رديت بحسن نية ( وعليكم السلام )

..بس صوت ضحكتين متباعدتين اصدموني ..!! بسرعة دوّرت ( بحثت ) عن مصدرهن
الأولى ضحكة عمي اكيد..ولفيت راسي بعجلة نحو الباب وشفت باسل يتراجع وهو يضحك

..الظاهر انه انتبه اني ما لابسه الغشوة وراح ..!..
بس ويش السالفة ..على ويش هذولا يضحكوا..؟؟!!!

بعد ما تنبه عمي لنظراتي الثاقبة المحتارة ..والمتنرفزة بالتأكيد ..قال
( احم ..يا عليا ترى لازمك دورة في لهجتنا..يدتك تعني لك الحمدلله على السلامة )..!

فاااح صدري من الغضب ..رغم اني ابتسمت في وجه عمي ..لا يكون ابا اصير انا مصدر استهزاء لهم....!!!!

عقدت النية من باكر وانا راح اتعلم هاللهجة ..ما ابا حد يضحك علي...!!

قالت جدتي (كيف حالك يا بنتي ...ويش مسويه بهالزمن..ويش علومك ..انتي طيبة )

رديت عليها ( الحمدلله ما اشكي من باس ..احوالي طيبة ..كيف حالك انتي )

قالت بصوت صادق ( فرحانة بشوفتك يا امي ..)

قال عمي بوخالد بتعب
( انا بروح بيتي..تعبان حدي..روحي يا امي ارتاحي.اكيد انك ما راجده من ايبارح ( البارحة)..وانا قبل اروح بوصل عليا لغرفتها..)ثم التفت لي
( يلله يا عليا..شنطك نزلهن باسل ..والشغالات بيجيبنهن لغرفتك)

اخذت غشوتي ..وشنطة يدي ..والتفت لجدتي اللي نظراتها ما فارقتني ..!
قلت لها ( جدتي تصبحي على خير )
ردت بابتسامة فرح ( وانتي من اهل الخير يا امي )
يش هالإزعاج ..والفوضى ..توني راجده..وما اقدر اتحرك..رفعت الوساده ( المخدة) وغطيت بها وجهي وضغطتها على اذني من دون فائده ....!!!!الضجيج ما وقف ولا ناوي يوقف..!!

تحركت وانا اتأمل المكان ..بعقل فوضوي..!!وين مكان الباب..!! ما اذكر ..!
تبعت الصوت وحصلت الباب..!!!!

كانت عيني وحده مفتوحة والثانية مقفلة ...ورغم محاولاتي ما قدرت افتحها..!!!

فتحت الباب ....وحصلت وجه العاملة المبتسم قدامي..!

ويش الحل ؟؟؟!! مع هذي الإبتسامة الحلوة ..! ورغم التعب ..!!
ما يقدر الشخص الا يقابل صاحبها بمثلها ..حتى ولو بعين وحده مفتوحة...!!!!

( هزا يور باجز ..!! ومدام كبير يقول صهي انته اشان صلي السُبه)

هزيت لها راسي..ثم قلت لها ( شكراً) وفتحت لها الباب بالكامل...منشان تدخل الشنط ..ما فيني اشيل الشنط بروحي ..تعبااانة..

صليت الصبح...وبعدها كلمت خالتي بالجوال..ما كفتني الرسالة اللي ارسلتها لها
لما وصلنا ..حسيت لازم اكلمها حتى تطمئن اكثر......ورجعت اغوص في نوم عمييق...

صحيت للمره الثانية ..وحالي افضل بكثيير من قبل..لأني عوضت بالنوم ....

دورت جوالي..ابا اشوف الساعة ....حصلت الساعة تسع ونصف...في العاده استيقظ ابكر من كذا ..بس التعب خدرني اليوم...رحت اشوف شنطي وحصلت العاملة المسكينة..مرتبة ملابسي واغراضي ..الله يجزاها الخير...سوت فيني معروف...وقفت اتأمل الغرفة المتوسطة الحجم ..هذي غرفتي من الحين..!
احسها كلاسيكية بزياده ..سرير خشبي باللون الأبيض ستائر مخمل مع شيفون مزيج من اللون الأبيض والأخضر الفاتح ..تسريحة بيضاء..والأريكه بعد.....صبغة الغرفة بيضاء مع تحديد من المنتصف باللون الذهبي..ذوق غريب شوي..لكن كان مناسب وحلو..

خلال النصف الساعة ..رتبت نفسي..والحمام الساخن مدني بالإسترخاء اللي محتاجتنه ..وراعيت انه ملابسي تكون ساتره ..اقتربت من الستاير شدني الضوء..وفتحتها..قبضت انفاسي من روعة المنظر اللي امامي..باب زجاجي واسع وعاكس منظر خضرة اشجار النارجيل الجميلة وانحنائاتها اللطيفة...بالإضافة لأشجار الفيفاي ( البابايا) المحمله بالثمر اللذيذ...وغيرها من المزروعات الراااائعة اللي تمد اصحابها بثمارها اللذيذة على مدار العام...وتمتاز بها الأراضي الجنوبيه...
حسيت بالحياة من المنظر الأخضر الجميل ..فتحت الباب الزجاجي ..وجاتني نسمة هواء باارده منعشه رغم ان الشمس شارقة ...لكن الجو معتدل وحلو ..مختلف عن اجواء مسقط كثير..

سمعت اصوات الطيور اللي اعطت المكان الصورة المثالية ..

وفجأة ....!! لااااا ....!!!! انسحب كل الشعور الجميل....!!!

باسل مسترخي في احدى الكراسي جنب الأشجار ..؟؟!!
هذا ويش يسوي هنيه ..!!! ليش ما يروح بيتهم حاله من حال عمي..!!

الحين كيف ابا انزل..وانا اعرف ان هالإنسان موجود بالبيت ..!!
اذا شافني نازله لتحت راح يقول انتي ما فيك حيا ليش نازلة وانا موجود..!!!
رجعت للورى وصكيت الباب بسرعة ..قبل لا يوقف ويشوفني
..وجلست في الأريكة الطويلة ... !! مرت الدقايق وانا على هالحال ..لحد ما ضقت من الملل..

مضت فترة....وسمعت طرقات على الباب ..! اخيراً حد عبرني في هالبيت ..!!!

نفس العاملة مع نفس الإبتسامه ( ماما في انتزري انته تهت ..)
جاوبتها بسرعة ( طيب لا تروحي..بلبس عبايتي وبجي ..لا تروحي هاه )
رحت لبست العبايه ..ولفيت الشيلة ..وغطيت وجهي بالغشوة..ونزلت..والعاملة قدامي..!!

جدتي كانت بصالة مختلفة ..الوانها قاتمة كثير غير عن اللي شفتها البارحة
هذي اصغر شوي ..ومغلقة ..مو مفتوحة
..
( صباح الخير) قلتها بابتسامه خفيفة
( حي هالشوف..صباح النور يا بنية ..ارمي الغطا ..باسل راح لشغله من سويعه ( من شوي ) ..ذلحين جربي تريقي ..انا قايمة من الغبشة ( الفجر )بس ما تريقت احرسك ( انتظرك ) )

قلت في نفسي بدينا..!! مع هالمفردات الغريبة ..!!! امممم مو مشكلة ابا اتعود عليهن
حطيت الغشوة في الكنب..
( السموحة يا جدتي ..بس خذاني الرجاد ..كنت تعبانة وايد )

القيت نظرة على صينية الفطور اللي موضوعه على الأرض..

مشي نسكافية ..!!!ولا كابتشينو ..!!! ولا حليب بالككاو..ولا عصير برتقال...!!

سكبت لي جدتي كوب حليب..واضافت له ملعقتين عسل وخلطته بسرعة وحطته قدامي..
اممممممم ساعتها نسيت النسكافية واخواتها..من لذة مذاق الحليب الطاازج المحلى بالعسل..

واصلت فطوري.. مع جدتي بهدوء.. وهي كل شوي تحط شي بصحني ..وانا ما اقدر اردها..
لحد ما قفلت خلااااااص....
قلت ( الله يديم النعمه ..خلاص يا جدتي اكتفيت..)

رفعت عيونها لي..!مدري عتب ولا ما فهمتني.!!!!
قلت بسرعة ( والله شبعت يا جدتي ..ما اقدر آكل زياده )..!

قالت بزعل ( شوفي جسمك كيف ضعفانة ..ليش ما تاكلي زين )
قلت لها بابتسامه ( بالعكس..جسمي مناسب كذا ..وبعدين يا جدتي ما يمدحوا السمنه في هالزمن )
قالت بجديه ( هاللي طالعين ذلحين ما يفهموا شي..كنهار ( زمان ) ود ( متى ما ) كان الواحد ضعيف قالوا هذا مارود ( مريض )...)

كت ..كت..ابا اقطع هالمحادثة ..ما يصير كذا لازم حد يفهمني المرادف لهالكلمات..! لحد ما احفظهن..!!!
لكن استمر الحوار مع جدتي ومع محاولاتي للتركيز على سياق الحديث ..
قدرت اجاري جدتي ..واماشيها في كلامها الممتع ..اللي ينم عن شخصية حكيمة..وواعية ..وكلامها جداً معقول ولا يمل منه.....احس كني اعرفها من زمان ...!!

لما قربت تنقضي فترة الضحى سمعت صوت باسل ينادي من برع ( امي غالية ..ادخل ولا معك حد)
قالت له ( هنكس ..هنكس ..( هناك _هناك) روح الصالة الثانية ..تيلا ( بعدين ) بجيك )

هذا ساكن هنيه .؟؟!!!!!
استغليت الفرصة من شان اسألها ( هو ساكن هنيه ..)؟؟!!

قالت ( باسل ..ايوه ساكن هنيه هو وحرمته في ثالث طابق..بس له دربه وانا بكلمه ما يجي صوب صالة النسوان ..من شان تاخذي راحتك..وما تبتلشي بالغشوة نهارك كله )

غريييبه !! ما تخيلت ان باسل متزوج..!! احس اني انصدمت واايد...بس ليش ...

اووووف ويش هالشعور المزعج اللي جاني ....اصلاً هو شكلة بالثلاثين يعني اكيد انه متزوج ..ويمكن عنده عيال بعد ..!!

الظهر بعد الغدا....قالت جدتي ( يا امي خذي راحتك فالبيت باسل ماشي غارف ( المزرعة ) وقتيت( يمكن ) يرجع عقب المغرب..وانا بقيل الحين )

طلعت اتمشى فالصاله الواسعة..! والهدوء يعم المكان ...!! من اول يوم وانا حاسه بالملل..!!
طلعت فالمزرعة ....وشفت الأشجار من قريب ...وتفحصت انواع كثيرة من المزروعات ..
بس للأسف ما شفت اي نوع من الزهور..!! لأني من عشاق الزهور ما ارضاني هالشي ابداً ...حاولت امسح المنطقة ...بس ما شي..!! كانت في ارض فاضية وشكلها جااهزة للزراعة

حطيتها فبالي ....وابتسمت لما تخيلت اني املاها بتشكيلات من الزهور ...اكيد راح تطلع رووووعه.....
بعد لحظات كلمت خالتي ..ووصفت لها روعة المكان..وعبرت لها عن ارتياحي حتى تطمئن..!

رجعت الطابق الثاني اللي موجوده فيه غرفتي ..صليت العصر ..رجعت الطابق الأول وتميت استكشف المكان إلى ان ملييييت!!!
تصميم هالمنزل غريب..!! رحت للصالة الكبيرة وشفت السلم الثاني بالبيت..اكيد هذا درب
باسل اللي تقصده جدتي ..هذا هو الدرب اللي يوصل للطابق الثالث لجناح باسل وحرمته ..!!

بس غرييييبه وين حرمته..!

ما شفتها ..ولا جات تسلم ..ولا حتى تغدت معنا..!! يمكن انها مو موجوده بالبيت ...!!
اوانها مسافرة ...!!!


مدري ليش جاني فضول اصعد هالدرج الحلزوني...!!

صعدت الدرجات ..لحد ما وصلت المنتصف ...تضايقت من فضولي!!!!!....

وقررت الرجوع ...بس قبل لا اتحرك من مكاني...

سمعت صوت صراااااااخ ........ملأ جسمي بالقشعريرة..!!!

[القيصـــــر]

بارت جميل متابعين لك

[نوارة الكون]

بارت جميل متابعين لك

اسعدني مرورك
بس شكلي ما بكملها محد مر عليها وعلق

[نوارة الكون]

(( الجزء السادس ))

صوت صرااخ ..صرخات شخص يتعذب...صراخ مريع ...ثم تلاشى الصوت تدريجياً..جلست فمنتصف الدرج مذهوله من هالصراخ..هذا حقيقي ولا انا جالسة اتخيل بسبب الهدوء العام
في المكان وصارت تتهيأ لي أصوات غير موجوده...!

رجع لي الفضول من جديد..!!! واحترت انزل ولا اكمل مشواري..!!

خلني اكمل وبس...! كملت خطواتي بهدوء وسمعي متجهز لالتقاط اي صوت ..!!...

وصلت الجناح ...ووقفت فالأرضية الرخامية وانا محتااارة ..!!!

شفت قدامي ثلاث ابواب فالجهات الثلاث.....وفي احد الزوايا كنب عصري وشاشة معلقة في الجدار...

لكن ما في اي اثر يدل على وجود احد هنيه ....لذلك قررت العودة ...
اكيد ما بروح افتح أبواب الغرف ..!!!
بس كنت اتمنى احصل حد اسولف معه واطلع من هالملل...!!.استدرت..وقبل اكمل خطوتي..رجع صوت الصراخ من جديد....!!!

وهالمره اشد يمكن لأني اقرب......كان ودي اهرب ..من هالصراخ اللي يدل على وجود شخص يتألم بالداخل......بس ما اقدر.....يمكن حد متعور...؟؟!!!

يمكن حرمة باسل تتألم وهو ما موجود....تبعت مصدر الصوت ..بخطوات مرتجفة ..
ودقيت باب الغرفة اللي تبين لي منها مصدر الصوت .....
بس ما جاني رد.........رجعت ادق الباب من جديد.....من دون فايده..ترددت افتح الباب ولا ..؟؟

هذا تعدي على الحرمات ..بس هالصراخ المستمر ما حط قدامي خيار ..سميت بالله وفتحت الباب
........وانصعقت.....!!!

يا الله ........................!! من هذي......!!!!

وجه شاااااحب... جسد هزييل... عيون غاااائره... المرض ترك بصمه ما ممكن انكارها

رددت بسري ( الحمدلله الذي عافانا مما ابتلى به غيرنا )

جاني صوتها المبحوح وقالت بعدوانية

( ويش جالسه تسوي هنيه ...من سمح لك تدخلي..اطلعي برع ..اطلعي )

ابتلعت ريقي تجاه هذي العدوانية وقلت
( سمعت صوت صراخ ..انتي بخير..تبي شي ..اساعدك بشي)

ردت بنبرة استهزائية ( ايوه انا بخير)..ثم اردفت بحده

(اطلعي ..ولا عاد اشوفك مقربة من هالجناح ..ولا ما راح يحصلك خير ..سامعه )

ليش معصبة كذا هالحرمة ...!! انا جيت اطمئن عليها...حتى ما سألتني من اكون ..!!
يمكن المرض متعبها ..ومالها مزاج تشوف اي حد...الله يشفيها ويعافيها....

اغلقت الباب ..ورجعت انزل من الدرج بهدوء...! رايحة اسلي نفسي..ورجعت متنكده اكثر..!!

رحت غرفتي وفتحت جهاز الآيباد ..حاولت التقط شبكة ..بس ما حصلت..!! مافي شبكة بالبيت..!!
ياربي ويش هالحظ...ويش هالبيت الغريب..ما كن فيه ناس عايشين..!!

نزلت عند جدتي..في صالة النسوان...اول ما شافتني قالت
( زين انك جيتي يا امي..كنت ابا ارسل هالشغالة تناديك..جربي خلينا نتقهوى..ونسولف..)

فررررصة لا تعوض للسؤال ( جدتي .....هي حرمة باسل ما تنزل وتجلس معك )

شفت وجه جدتي اختبص....وتغير لونه ....اطرقت ..وبعد صمت قليل قالت

( الله يكون بعونها ..ويرحمها برحمته )......ثم قالت بسرعة
وقطعت علي كل الفرص حتى ما ارجع اسألها من جديد..!

( جربي...كلي من هالفيفاي ..مقطوف من الصبح ومبرد...)..!

اممممم الفيفاي حلووو وطعمه سكري بزياده..

( جدتي..خبريني عن باقي العايلة ..كم عم عندي...ومعهم بنات وعيال ولا لا ..ومن غيرهم من قربتي موجود بعد ..خبريني يا جدتي تراني ما اعرف شي)..!قلتها بصوت يحمل شي من الحسره...!!
. . . .

الوقت كان ممتع ...ويزداد متعة بحديث جدتي..اللي زادني شغف ..منشان اتعرف على افراد عايلتي بأكملها ..اكبر عمامي هو عمي محمد ابوخالد ...ويصير ابو زوجة باسل ...يعني حرمة باسل تصير بنت عمي..واخوانها الثلاثة اثنين منهم متزوجين والثالث خاطب ...

وعمي احمد معه ثلاث بنات سارة وامل وهنادي واعمارهم قريبة من عمري...

وعمتي هاجر معها خمسة اولاد اعمارهم متفاوته وبنت وحده وهي مزون ..اكبر مني بسنه..

وتشعب الحديث حتى وصلنا لشجرة نسب العايلة .....!!

حسيت اني حضرت حصة في التاريخ ....!! بس الأكيد انها الأفضل في حياتي مع وجود جدتي

..ومن صفات جدتي الحلوة اللي لاحظتها فيها هي ميلها لإستخدام كلمات فصيحة ...حتى تكون اوضح بالنسبة لي...وان كانت تتعمد استخدام كلمات غريبة عني ..حتى اتعود عليهن....

وطبعاً ما يمنع وجود الكثير الكثير من العثرات في فهم بعض الجمل من قبلي..لكن حالي تحسن بواايد في غضون يوم واحد بس....!!!

في غضون يوم واحد كذلك حسيت بالإنتماء لهالمجتمع ..وتعلق قلبي فيه..رغم اني كنت عايشة من دونه حتى فترة قريبة وما كان عندي إشكال واضح .......لكن اليوم أنا متأكدة تماماً ..من صعوبة عيشي خارج هالمجتمع....


في المساء و بعد تناول وجبة العشاء بصحبة جدتي...اصطحبتها لغرفتها القريبة من الصالة في الطابق الأرضي......واتجهت للدرج في طريقي للطابق الثاني ..حيث موقع غرفتي ...

كنت احس بالتعب ..من كثر ما طفت على البيت اليوم ..وما كان ودي إلا حمام دافي واحط راسي وارجد....!!

اول ما جيت اصعد الدرج .....وقفني صوت باسل المزمجر وهو يصرخ فيني برعب

: ( ويش اللي مودنك للطابق الثالث من دون إذن..بأي حق تصعدي هناك .؟؟؟؟)

في هاللحظة معي خيارين ...:
الأول اني اغطي وجهي بطرف الشيلة ..واواجه باسل واخبره ( اعلمه ) بكل شي ..!!
بدءاً من فضولي ....!!!! لحتى سماعي للصراخ ..إلى ..رغبتي في المساعدة ..!!

اما خياري الثاني فكان .......اني احط رجلي بالدرج
واركض من دون توقف إلا لما اقفل باب غرفتي واصير آمنه ..!!

[القيصـــــر]

جميل جدا
تابعي إستاذه روايه مشوقه

[نوارة الكون]

جميل جدا
تابعي إستاذه روايه مشوقه

مشكور ع المرور

[نوارة الكون]

(( الجزء السابع))

يقال الهروب نصف المرجلة ..وانا برأيي ( لمن أراد ان يؤخر اجله )...!!!

آآآآه.... قلبي ما زال يضج بصخب ..تمددت في سريري بالعرض ..وما زلت اتنفس بقوة ..وجسمي يرتجف ....حمدت ربي على العمر الجديد اللي انكتب لي...!!

طيب وصعدت للطابق الثالث يعني ويش اللي صار..!! هو ما كان موجود..!! ورحت اشوف حرمته ..!! واتسلى معاها ..!!!

ثم راجعت نفسي..!! ......هو صحيح خطأ مني اروح من دون استئذان ..!!
لكن ما اعتقد ان الموضوع يستاهل منه كل هالعنف والضجة ..!! يمكن عشان حرمته مريضة..! انزين انا ما سويت لها شيء..ومردِّي ابا اعرف انها مريضة..!!

يمكن انا مفوته جزئية بالموضوع او في حاجه ما عارفتنها..!!
وبعديييييين ....كل ما جيت ابا ارتاح جاء هالباسل وخرب علي..!!!

في هذي الليلة ما قدرت انام بسهوله......كل مره افكر بموضوع ...!!!

وقفت اراجع حديثي مع جدتي...وذكرها لعمتي واعمامي ..وعيالهم لحد ما وصلت لنقطة غريبة في الموضوع..باسل ولد عمي واهله ..!!!

جدتي ما ذكرت عمي ابو باسل......!! ولا ذكرت ان باسل له اخوان ...ليش..؟؟
هي عددت اسماء الكل ..صحيح اني ما حفظت اسماء الذكور...بس ما زلت متأكده انها ما ذكرت باسل ولا ابوه....!!!
مستحيل تكون نست . ..يمكن متوفي بس ليش ما تقول انه متوفي..شي غريب..!!
اخذني التفكير...لحتى نمت....!!!
....

وجه جدتي اليوم منور بزيااده والسبب معروف _اليوم راح يجو عمامي وعمتي وعيالهم...
حتى انا من لما خبرتني جدتي هذا الصباح بأنهم جايين وانا حاسة بفرح وحماس كني طفلة..!!
واكيد .... لابد من وجود القليل من التوتر..!!

كنت واقفة قدام درج ملابسي ...ومشغولة بالإختيار ومحتاره ..اي فستان راح البس....؟!!!

تفاجأت لما قالت لي الشغالة انه جدتي تباني الحين..!! هذا وقت مقيلها ..الظاهر انها اليوم ما نامت ....!!!!
نزلت بسرعة ..وانا ماخذه راحتي بزياده فالتنقل من غرفتي للصالة ..ولغرفة جدتي ..لأنه هذا الدرب آآمن بالتأكيد من باسل .....!!!

( تعالي يا عيني..جربي )!! ......جدتي كانت واقفة وامامها كووومه من الملابس.....!!!!

تساءلت ويش كل هالملابس الغريبة..!!!!!!!!!!

تشوفتني ( ناظرتني ) جدتي بابتسامه حاانية ..ثم ارجعت نظرها للملابس المفروشة قدامها فسريرها الواسع..!!!

وقالت ( يا عليا هذي ملابس النسوان ( الحريم ) اللي يلبسنها كنهار (زمان).....قبل لا تجي ملابس اليهود اللي تلبسنها اليوم.. ..الله يهديكن...) ثم اردفت

( بس في جلساتنا بيجن حريم وبينجدن ( ينتقدن) عليك و علينا ..ان شافن بناتنا لابسات هالخلاجين الردية )

حزنت نفسي على هابينيس و بينك شادو وكريستيان كول وسباركل اللي وصفتهم جدتي بهالوصف القااااتل...!!!!!!!!!

ثم تنبهت ......!!!....يعني ويش بعد هالمقدمة ...!!!!! هه لا يكون بس تباني جدتي البس من هالملابس الغريبة ..!!!!

قلت بقياس نبض ( ههه عاد ويش نسوي يا جدتي ..هذي الموضة ..وملابس الحين ..واحنا تعودنا عليهن)

قالت جدتي باندفاع ( انتي حاسر ( مرحلة الانتقال من الطفولة الى الشباب) وما بيخلنك الحريم من الكلام ان شافنك لابسه هالخلاجين المقطعة )..

حاسر حاسر...رغم اني ما ادري ويش معنى هالكلمة ..بس وجه جدتي يقول بالحرف الواحد _ يمنع الجدل في هذا الموضوع_..وانا مابا ازعلها مني...وبعدين مابا اكون شاذة وسط البنات..!!
وخليني اجرب نيو لوك ...!!!!!!

طيب جدتي تلبس دراعات خفيفة ومن دون زينة ما تلبس مثل هالملابس..ويش معنا انا البسهن ..!!!

( ان شاء الله يا جدتي ما خلي حد يتكلم علي بشين..وابا البس اللي تختاريه لي انتي من بين هالثياب )

قالت ( هالثياب كلها لك ..انا مقدرة ( توقعت ) طولك كان اني ما دهدرت ( تخربطت) وموصية ام حمد ...تجيب ازين ما في السوق)

وقفت اتأمل الملابس ......كل ثوب بلون مختلف والقماش مخملي موحد في جميع الملابس ..
مسكت ثوب مخملي اسود ..بفتحة دائرية واسعة شوي محدده بفصوص فضية لامعه ..
حسيته دخل مزاجي.....!!
قلت ( جدتي ابا اقيس هالثوب هنيه عادي ..)!!
ابتسمت ( زين يا امي ..مشي باس )

مافي غرفة تبديل ملابس ..اتجهت لدورة المياة ..ولبست الثوب وركضت على الجامه الواسعة ( المرآه ) اشوف شكلي بهالثوب ....!!! من هذي ...هه احس اني ما عرفت نفسي !!!

الثوب منسدل لتحت الركبة بشبرين !!! ...قصير من الأمام ..وشوي من اسفل ساقي ظاهر ......اما من ورى فالثوب طوووووييل بذيل طوله ذراع تقريباً...!

اذاً هذي هي الملابس التقليدية في الجنوب...سبق وشفتهن على القناة العمانية ..لأني بعد ما لبستهن اتضح لي شكلهن اكثر....

رحت باتجاه جدتي اللي كان بإيدها صندوق خشبي بنقوش يدوية تراثية ..
لما شافتني قالت ( تبارك الرحمن ..ما شاء الله عليك يا امي..والله انك ذلحين ازين من ذكس ( هذاك ) اللبس اللي كان عليك )

( جربي خليني اقفل على الخلخال برجولك ( اساور القدمين ))

نزلت في الأرض وبإيدها خلخال ذهبي سميك بنقوش على سطحه مع سلاسل رفيعة مدوره..

ثم رجعت للصندوق وطلعت منه بنجري ( نوع من الأساور العمانية التقليدية) عريض بفصوص حمراء..وقفلته على معصم يدي اليمنى....

وقالت ( نزلي الشغاب ( الحلق ) اللي لابستنه يا عليا )

باذعان نزلت حلق لازوردي اللي لابستنه ..ولبست الشغاب الذهبي الثقيل اللي اعطتني اياه جدتي ..
( خذي لبسي هالمنثورة ( العقد) ما اشوف يا امي اقفلها )

مسكتها بيدي وانا اتأملها ..ما كانت من النوع التراثي الثقيل ..كانت خفيفة بفصوص مدري يمكن نوع من الاحجار ولا ويش هذا ..؟؟ واسفل كل حجر تمتد سلسلة وتستمر بتسلسل راااائع..!!

( جدتي هذا حجر ولا ويش ..؟شكله غريب علي )؟!!

( هذا خرز المرجان ..عجبك..؟؟)
رفعت نظراتي لها ثم رجعت نظري للمنثورة منشان اقفلها وقلت ( كل هالحلي شكله غريب يا جدتي ..ما اشوف مثله فالأسواق ..)
ثم تذكرت بسرعة ( صحيح في مثله بسوق مطرح (اشهر الأسواق التراثية العمانية في مسقط )...بس ما اذكر انه مطابق له ..)

( اكيد يا امي ..لنه ( لأنه) هذي هدايا من جدك ..وكان مفصلنهن مخصوص لي)
رفعت نظري لها بسرعة ...عيل كيف تخليني البس هدايا جدي لها؟؟!!

قلت لها بأسف ( عيل ما يصير يا جدتي البس هدايا جدي لك...مو حلوه ..!!! طيب ..البسيهم انتي )!!

ردت بابتسامه هاديه ( البسيهم يا حبيبتي ..ما عليك مني ..انا مالي بالزينة عقب وفاة بو عبدالله)

انتابني الأسى ..( بس يا ...)

قاطعتني جدتي وهي تدخل خاتم واااسع في الإصبع الأوسط من يدي اليمين ( لا تعصيني يا عليا ...) ثم اردفت ( شوفي من ضعفك الخاتم ينزلق من اصبع يدك)..

وقفت وانا اضحك على محاولات جدتي ..وهي كل مرة تحاول في خاتم ..لحد ما فقدت الأمل بالخواتم الذهبية ...... واستجاب لها خاتم من الفضة الثقيلة مزين بفصوص حمراء صغيرة...

اذن العصر ....ورحت بسرعة الم ملابسي الظفارية الجديدة واحطهم بأكياسهم ..واخذت الشيلات الشفافة المصنوعة من الشبك الخفيف ..المزينه بنقوش لامعه خفيفة جداً..

( احم ..جدتي انا بروح اصلي العصر وبتجهز وبنزل ..) قربت منها وقبلتها فوق راسها وقلت لها بصدق...
( يشهد الله يا جدتي اني بوجودي هنيه احس بفرحه وراحة وامان ما عمري حسيتهن كثر الحين الحمدلله اللي جمعني بك يا جدتي ..وقر عيني بشوفتك )

قالت جدتي بتأثر ( الله لا يحرمني من هالشوف ..الله لا يحرمني ) ..

....
ثبتّ الشيلة بتعليقة كريستالية صغيرة من الأعلى فقط....ومن تحت خليتها مفتوحه
من الجانبين تأكدت انه الشينيون الخفيف ثابت ...لأنه واضح بسبب شفافية الشيلة ....

تأملت نفسي ..هذا احلى نيو لوك ممكن تحصل عليه البنت..!!

ملابس عربية..مجوهرات عربية ..كحل عربي...!! ويش احلى من كذا.؟؟؟!!!
الأمور جرت بهدوء وبرتابة...وبرسمية ...صالة النسوان منتصف العصر كانت مملوءة عن بكرة ابيها..!

قابلت عمتي هاجر فيها شبه من جدتي شكلاً وطبعاً..!!..لكنها اكثر هدوء ..ذكرتني بعمي محمد ( بوخالد)..وبنتها مزون باين من عيونها انها مرحة ..بس كانت الجلسة تحتم علينا احنا البنات الجلوس بهدوء..والاستماع لسوالف الحريم الكبار باحترام...!!

زوجة عمي محمد كانت متحفظة كثير في سلامها علي..مدري متعمده ..!! ولا هي طبيعتها كذا..
كانت عكس زوجها..!!!
اما زوجة عمي احمد من النوع اللي يدخل القلب من اول نظره..!!..لها طبيعة مرحة وحركتها خفيفة...ومعها ثلاث بنات يشبهونها وايد فالطيبة ...

الكل موجود ..لكن ام باسل مو موجوده ....وينها ....تذكرت لما قالت جدتي العصر ( انا مالي بالزينة عقب وفاة ابو عبدالله ) من عبدالله..يمكن عمي ابو باسل اسمه عبدالله..!!

بعد المغرب نادتني جدتي وهي واقفة جنب باب الصالة ..رحت لها

قالت ( تعالي يا عليا ..اعمامك بالصالة الثانية ..كان عندهم عرب ( رجال ) فالسبلة ( المجلس)..والحين راحوا ...تعالي تراهم طالبنّك يبو ( يريدوا ) يسلموا عليك )..

رحت بصحبة جدتي ..وانا احس بشوية احراج ..!! اليوم اول مره يشوفني عمي احمد وانا بهالحال..!!

احس لو كنت لابسة عبايتي كان احسن ..!!!!!

دخلت الصالة وانا اسير بعد جدتي ...حصلت عمي محمد واكيد الشخص الثاني كان عمي احمد.........احترت كيف اسلم عليهم..!!! وقفت بعيد شوي..!!!

جدتي سلمت على عيالها ثم التفتت لي وقالت ( هذي بنت سلطان..يا احمد)
تقدم وسلّم علي بالخشم ( السلام المعتاد في عمان )..وبعده كان عمي محمد
سألوني عن احوالي...وعبّروا عن فرحهم لوجودي بينهم ...وعمي محمد كان يسألني
بطيبه اكثر ..ويستفسر بقوه ...اتوقع السبب انه يحس بالمسؤوليه لأنه كان مصر
على جيتي ( عودتي ) لصلاله ....

وعمي احمد من النوع المبتسم ....وكان كثير يمازح جدتي ويرسم في وجهها ابتسامه
هاديه .......سبحان الله كان شبيه
بزوجته ...ومن نوع الممازح...عكس الهدوء اللي يلف عمي محمد..!!

جاني فضول ذابح...!!وين عمي ابو باسل..!!!!؟؟لذلك سألت بتردد

( جدتي انتي ذكرتي جدي بكنية ابو عبدالله !! وينه عمي عبدالله..انا تعرفت على عمي محمد وعمي احمد..بس باقي.....)

قاطعني صوت جدتي وهي تقول بجديه ( محد عندي ولد اسمه عبدالله..ولما قلت ابوعبدالله كنت غلطانه )

قلت باستغراب ( عيل كيف باسل يصير ولد عمي..وين ابوه........ميت )؟

نظر عمي محمد باتجاه جدتي ثم قال بهدوء (عمك عبدالله حي يا عليا..بس يشتغل بالخارج
استاذ ادب انجليزي ولغويات في جامعة فينكس بأريزونا )

نظرت له جدتي بغضب ( محمد)

قال لها بهدوء ( اهدي يا امي...عليا يا بنتي قفلي على الموضوع ..لا تنزعج يدتك)

العيش من دون عايلة ممررررض....والعيش بوجودها يجيب الهم....محد مرتاح في هالعالم ..!!

طلعوا اعمامي ...وعاذرتهم ( ودعتهم) ...ورجعنا انا وجدتي باتجاه الصالة الثانية وانظاري لأسفل اخاف اتعثر من طول الثوب من الخلف ..وبسبب الكعب العالي..!!!!
استندت على حافة درج الصالة بيد وحده ..ورفعت رجلي اعدل لفة حذائي ...وجدتي سبقتني بخطوات....

وما افقت الا وانا مطروحة ارضاً بسبب جدار صدمني .....اعتدلت وجلست وحالي منعفس تماماً...رفعت يدي لراسي اتلمسه بعد الضربة العنيفة اللي جاته من هالجدار .!!!!

تعليقتي المحببه انكسرت...وشيلتي انفتحت والشينيون اكيد انه اخترب...!!

لكن من وين جا هالجدار..!!انا كنت واقفة بس ما تحركت .......!!!!

.رفعت راسي وانا اتمنى ما يكون اللي ببالي صحيح ..!!ولأول مره اتمنى ان ذاكرتي تخوني لأنه هالجدار مو غريب علي ....سبق وصدمني ....معقولة جدار بشري ...رفعت عيني بتردد..

باسل واقف ومتكتف...وينظرلي .....اممممم بشفقة عشان طيحتي......!!!!

لا ....لا .....ابداً...نظراته قااسية..كالعاااده..!!!

اوووووف تذكرت هروبي منه امس بالليل .....لا يكون يبي يثأر مني هالحين ...يا الله وين جدتي..!!!

قال بقسوة ونظراته مركزة علي
( تصدقي ولا مره وحده من بنات عمي ..اصطدمت فيني بهالشكل...)

ثم اضاف ( تعرفي ليش..لأنهم محتشمات..الوحده منهم تراعي خطواتها ..وما تتنقل بيوم الكل مجتمع فيه وهي بهالحال) واشر علي ...
واضاف ( ولا جايه تبي تعرضي حسنك وزينك قدام عيال عمك ...!!
متأمله حد منهم يمر من هنيه ويشوفك .....)
ثم اضاف بنبرة استهزاء ( اوووووه ولا جاية تمارسي احد هواياتك ....نسينا ان اهم هواياتك يا عليا هي ازعاج الناس والدخول لغرفهم من دون اذن...صح عليا...تبيني ابعد ذلحين عن الدرج عشان تصعدي جناحي انا وزوجتي من دون اذن )

كل هالحقد..والضيق ..والاستهزاء ليش..؟؟؟؟ليش يكرهني هالإنسان لهالدرجة...
ترى هو السبب في جيتي هنيه ...لا يكون بس جايبني يسمعني هالإهانات كلما شاف ظلي..!!

رديت عليه وقلبي يغلي ( انته انسان مريض..حقود ..متكبر..ومتسلط ..ما تعرف تنطق إلا بكلمات تأذي ( تؤذي ) غيرك...ويش مشكلتك معي هاه ...ويش مسويه لك منشان تعاملني بهالجلافة ...بقلة الإحترام هذي......ابا اسألك ..انته كيف حصّلت شهادة الطب وانت بهالقسوة)

ضحك باستهزاء وقال ( شي طبيعي الطب يحتاج لإنسان قاسي..عشان ما يتأثر ويرق قلبه لكل حاله يشوفها..)..!!!!

قلت له باستهزاء مماثل ( صدقني انته فاهم غلط )

قبل لا يرد صوت حاد وقفه ( باســـــل ).........!!!

التفتنا نحو جدتي اللي قالت لباسل بغضب ( ويش جالس تسوي هنيه )
قال باسل من دون لا يهتم ( كنت نازل من قسمي وما انتبهت لها صدمتها وطاحت!!! )
ثم اضاف ( امي غاليه علمي عليا على سلومنا..خبريها ان بناتنا ما يظهرن بدون عبايا وغشوة يوم يكون البيت كله عرب )

سندتني جدتي حتى قمت !!والتفتت لباسل وقالت له بتهديد( باسل خلي عليا بحالها)

قال باسل بغضب ( امي غالية ..انتي تعرفي ان عيال عمي يدخلوا ويطلعوا من هالصالة ..تبيهم يشوفوها...وهي بهالحال.... ما مبقيه من الزينه شي ما مسوتنه )...!
قالت جدتي بهدوء ( انا اللي قلت لها تجي معي منشان تسلم على عمامها )

الحين مهتم بعيال عمي لا يشوفوني ..وهو مفتح عيونه فيني حتى شاف كل زينتي..!!
وجدتي جالسه تسولف معه بدل ما تقوله يبعد....!!!!

غزاني القهررررر....لفيت وجهي بالشيلة الشفافة جداً...!!وبالطبع اسفل ساقي كان ظاهر..!!

هو من المؤكد اني كنت في وضع يضحك اللي ما يعرف يضحك..!!!!

لكن ما معايه غير هالحل...!!!! عدلت حذائي سبب النحس وسرت بخطواتي لصالة النسوان ...!!

آخر العشاء ...كنت احس بسعادة عميقة ....الشعور بالإنتماء شعور من الصعب وصفه بدقة..وعلى الرغم من الإرهاق اللي لفني لأني ما متعوده على الجمعات الكثيرة مثل كذا..وعاد جدتي عازمة كل القرايب ..والمعارف ..والجيران ....!!! بس كان هالتعب حلو..!

بعد فتره ..بدن الحريم يقلّن( ينقصن ) ....شفت جدتي واقفة وجنبها زوجة عمي محمد ..صحيح انهم بعيدين عن سمعي الا اني كنت متأكده انهم يتنازعون ( يتجادلون ) ..!!

كنت اشوف وجه جدتي في اوج غضبه ..وجه ما شفته خلال الأيام الماضية ...!!
ويش السبب يا ترى..! انا من البداية حسيت انه هالحرمة متضايقة من شي..!

بعد لحظات جات مزون وقالت بسرعة
( امي تقول روحن فوق منشان تتعرفن على بعض ..هيا خلينا نروح وامي بروحها بتخبّر بنات عمي احمد عشان يلحقونا..)

ثم سحبت يدي قبل حتى لا ارد ؟!! وقالت ( امي تقول غرفتك فالطابق الثاني صح ؟)
قلت بشرود ( ايوه صحيح...)

كانت جلستنا ممتعه ..تعرفت على البنات اللي كلهم املكّات ( معقود عليهن) من بعد الثانوية وازواجهن من العايلة..!
سألتهن باستغراب ( طيب واذا وحده خطبها شخص من برع العايلة ؟؟)

قالت مزون بضحكة غرور ( يا عيوني كان قتلوه شباب العايلة ..ما تعرفين ..هم ما يفرطوا فينا..يقولوا قريباتنا وبنات عمنا ومتأكدين من ادبهن وخلقهن ..وما بنحصل احسن وازين منهن )

حسيت بمشاعر الفخر تغزوني..! عائلتي مميزة ..في هالزمان قليل من ينظر للأمور من هالمنظار..!!
صحيح ممكن البعض ما يأيد هالأمور ويعتبرها نوع من القبلية ..إلا انها تستهويني ..لأني جربت الانفتاح وما عجبني......!!!
ضربة على كتفي صحتني ( هيي وين وصلتي يالسرحانه ؟؟)

ابتسمت في وجه هنادي الضاحك وقلت بخفة
( ههه معك ..بس جالسة افكر ..راح يكون حظي مثلكن في زواجي من احد شباب العائلة ولا ما بقيتن لبنت عمكن حد )..!!

شفت الوجوه تبهت ...تختنق ....امامي.....!!!!

.اقدر احلف انه في شي مو طبيعي ..في حاجة انا مضيعتنها..في امر مجهول بالنسبة لي...!!

بعد لحظات نطقت سارة بنت عمي احمد واكبر المتواجدات ( هه عاد تخيلي تسمعك يدتي ..بتروحي فيها..)

ضحكت مزون في محاولة لكسر الجمود اللي طغى على الأجواء

( ههه يدتي من الطراز القديم ..وحتى امهاتنا مثلها ..ممنوع علينا الكلام في هالمواضيع ..ولا بيعايرونا مباشرة بجملتهم المعهوده انتن ما تعرفن الحيا..انت بنات اليوم لسنتكن متبرية منكن ..انتن
قالت امل بمقاطعة ( اوووف مزون وتكلمت ويش يسكتها الحين ..ارجوك سكتيها عليا انتي جديده هنيه وهي بتسمع منك )

ضحك الكل من كلام امل ..لكن الشك في صدري يزيد ..ودي أسأل ..استفسر..لكن ويش راح أقول ..انا تو ما مسكت طرف خيط يوصلني للموضوع المشكل علي..!!

[روح الحلا1]

رااااااائعة جدا
ربي يعطيك العافية نوارة..
في تكملة للرواية؟ نبي نعرف قصة باسل وزوجته...هههههه

[نوارة الكون]

رااااااائعة جدا
ربي يعطيك العافية نوارة..
في تكملة للرواية؟ نبي نعرف قصة باسل وزوجته...هههههه

تسلمين يالغلا
ايه فيه تكمله للروايه