النتاج الفكري للكاتب والشاعر/ رايق البال في الشعر والخواطر والقصص

[اسطورة لن تتكرر]

يسعد مساكم / صباحكم
هلا بالجميع ...

قصه قصيره من زمان قريتها تدل على عظمة الاسلام وكثير اعجبتني وراح اكتفي بسردها بقلمي البسيط واتمنى تنال استحسانكم ..
من المعروف ان لعاب الكلب ( اعزكم الله ) نجس وقد امر رسولنا الكريم بأن اي اناء يلعق فيه الكلب لابد من غسله بالتراب 7 مرات حتى نضمن خلوه من النجاسه والامراض ..
يوم من الايام اجتمع 7 دكاتره من كبار دكاترة الالمان في المستشفى اللي يشتغلوا فيه ودار بينهم حديث حول تجربة ان يغسل الاناء بأقوى المطهرات المعروفه على مستوى العالم وفحصه بعد ذلك بدقه بالمجهر للتأكد من خلّوه من الامراض ..
احضروا كلب وقدموا له اكل بالصحن ومن خلص اكله شالوا الصحن غسلوه بالماي ومن بعدها بالمطهرات الموجوده معهم وفحصوه بالمجهر ..
كانت النتيجه انه لازالت بقايا من لعابه بالصحن ..!
ساعتها قالوا راح نجرب اقوى مطهر بالعالم تم انتاجه وبالفعل جربوا ..
بعد الفحص بدقه كانت النتيجه اللي صدمتهم بأنه لازال هناك بقايا للعاب رغم كل ذلك الغسيل والتنظيف والتطهير له ..!
ولأن الغرب وخاصة علماؤهم والناس المثقفه فيه معظمهم قارئين للقرآن الكريم وللأحاديث النبويه الشريفه من باب العلم بالشي رغم عدم اسلام بعضهم لأسباب عديده بالطبع ..
فجأه واحد منهم قال وبسخريه : لنجرب ونرى ماقاله محمد ..! وضحك ..
شاركه زملاؤه الضحك بالطبع وهم على يقين من عدم نجاح مافكروا به ..
اعادوا التجربه من جديد وبعدما اكل الكلب ما قدم له بالصحن ..
اخذوا الصحن وراحوا لحديقة المستشفى نظرا لتوفر التراب هناك ..
غمسوا الصحن فالتراب 7 مرات ثم عادوا للمعمل واجروا الفحص عليه ..
النتجيه كانت صادمه .. مذهله لهم وظل كل واحد فيهم يطالع الثاني وهو في قمة اندهاشه لأن النتيجه كانت لاوجود ولو لجزء بسيط من اللعاب بالصحن ..!!
ونظرا لرغبتهم في التأكد بشكل افضل قرروا اعادة التجربه من جديد ..
وفعلا اعادوا وكانت النتيجه كالسابق ( 0 % ) حيث
لاوجود ولو لجزء بسيط من اللعاب بالصحن ..!
دقايق مرت وهم بين خوف ودهشه وذهول ..
فجأه استطاع اللي قدم هالفكره يطلع من هالموقف الرهيب ..
بلع ريقه وقال بكل هدوء وسكينه وخشوع : اشهد ان لا اله الا الله وان محمدا رسول الله ..!
سمعه كل من معه بالغرفه من زملاؤه وكل واحد فيهم نطق بالشهاده وراه واعلنوا اسلامهم ولله الحمد ..
انتهى .. بقلمي
اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ..

عوده اخرى لقلمي وطرح يغلب عليه الطابع الكوميدي من خلال القصص اللي اطرحها بين فتره والثانيه عن بعض الاحداث اللي عايشتها ..


الله يسلمكم زمان وانا بالصف السادس الابتدائي كان معنا طالب ماشاء الله
عليه طويل وضخم لكونه اكبر مننا فالسن لدرجة ان الطلاب ينادونه بالوحش ..
هالطالب كان اسمه احمد وكثير كان مشاغب ويضرب الطلاب وطبعا احنا اصغر منه لكونه كان راسب سنتين في صفه وانتقل معنا ..
كنت الوحيد اللي دايم هو مركز عليه مايمر يوم مايضربني فيه ههههههه وكلما شافني لازم فجأه يجيني بوكس منه او شوته انا وحظي عاد لدرجة ان بقية الطلاب كانوا يقولوا له .. حرام عليك ليش تضربه دايم ..!!
وكان يرد عليهم بكل ثقه .. مزاجي كذي .. بضربه يعني بضربه ..!
ربما كان لصغر سني وحجم جسمي سبب كبير في انه متسلط علي هههههه ..
يوم من الايام وكنا اذكر بالفسحه بس انا ماطلعت من الصف قلت اذاكر شوي لأن بالحصه الرابعه كان علينا امتحان وبالصف معي حدود 4 طلاب نفس الشي كانوا يذاكروا ..
فجأه دخل صاحبنا واول ماشافني قام يركض وراي بالصف يبي يضربني وانا اركض عشان اشرد عنه لحد ماحاصرني ووقفت ووراي جدار الفصل وانا خايف منه والطلبه اللي بالصف يحاولوا فيه يخليني بحالي وهو مصّر يضربني ..
مسك بيده اليسار رقبتي وجهز إيده اليمين عشان يضربني بوكس بكل قوته ..
انا كنت في وضع صعب لأني مو قادر اهرب لأن ظهري ملاصق الجدار ولا قادر افك ايده من رقبتي ..
شوي وانا اطالعه يرفع ايده اليمين عشان يضربني بوكس بكامل قوته وانا عيني على قبضة ايده اللي اشوفها تقرب من وجهي بسررعه وافكر اشلون اتخلص من هالموقف لأن الضربه راح تكون قويه جدا واحتمال تجي بعيني او اسناني ومعناها خلاص على عيني او اسناني السلام عاد لو جت الضربه فيهم هههههه ..
وانا اشوف البوكس جاي بكل قوته وعلى بعد سنتيمترات مني مدري والله كيف صارت هالحركه مني فجأه بس اكيد الهام ورحمه من الله لي ..
نزلت بسرعه بكامل جسمي لتحت بثواني فقط قبل لاتوصلني ضربته ..
إلا واسمع قوة الضربه بالجدار طاااخ وصرخته بكل قوه وهو يتألم لأنه هو تفاجأ بالحركه ومامداه يتصرف خلاص سبق السيف العدل مثلما يقولوا هههههه ..
آآآآآآآه انكسرت ايدي واااي بمووت وقام يصيح والدموع ماليه وجهه من قوة الضربه والألم ..
طلع من الصف وهو يصيح وبنفس الوقت يهددني ماعليك .. خليني بس ارجع وايدي تخف ان ماوريتك شغلك ولا بتشوف .. والله بقتلك ... الخ من عبارات تفرح الخاطر وتسعد القلب الحزين هههههه وانا ساكت ما اتكلم ..
شوي وانتهت الفسحه وبدأ الاختبار ومن خلص الدوام قلت لواحد من الطلبه ساكن قريب بيتنا واسمه عبدالله ..
انا : بكره خلاص انا مابداوم عبادي اخاف هذا يذبحني لو جيت ..
عبدالله : لاتخاف منه اصلا اظن ماراح يجي لأنه وايد تعوّر بإيده ..
اليوم الثاني انا بصراحه مادوامت ووعلى المغرب رحت بيت زميلي وسألته ..
انا : هاا .. كيف داوم احمدوه الصياح ؟ هههههه
عبادي : الصياح عاد سمّيته الحين ههههههه .. لا ماداوم واليوم ابوه جانا المدرسه وقال للمدرس ان ولده احمد طاح وانكسرت ايده وسووا له جبس بالمستشفى واحتمال ماراح يداوم الا بالامتحانات النهائيه اللي راح تكون بعد شهر تقريبا ..
انا : ايوا الصياح ليش ماسمعته كيف يبّغ ويرغي يوم تعور بإيده هههههه ..! طاح هااا .. طاح ..!!؟ وبعد يكذب على ابوه عشان مايضربه ..! قال طاح قال مو كنّه كان يبي يضربني ويكسرني انا المسكين .. يستاهل اللي جاه ..
اليوم الثاني رحت المدرسه واحمد طبعا ماداوم وارتحنا من مشاغباته وعقبها اعطونا اجازه قبل الاختبارات النهائيه ..
بعد انتهاء الاجازه داومنا كلنا عشان نختبر وكنت طول الطريق خايف لأنه معناه احمد راح يداوم واكيد ناويلي على نيه ولا اجمل هههههه ..
دخلنا الصف إلا واشوف احمد ايده من الاصابع لحد الكوع مجبّسه ..
مريت جنبه وطبعا ماله داعي اوضح نظرات الشوق اللي شفتها بعيونه لما شافني ههههه ولا ذاك الهمس اللي اسمعه .. انكسرت ايدي بسببك .. خليهم بس يطلعوه من ايدي وشوف شو بسويلك .. ياويلك مني .. الخ من عبارات الواحد يرتاح نفسيا لما يسمعها اكيد هههههه ..
انتهت الاختبارات وعطونا موعد لإستلام الشهادات ..
لما حان يوم استلام الشهادات قلت لصاحبي عبدالله ..
انا : عبوود .. جيب شهادتي معاك بكره انا مابروح المدرسه ..
عبوود : ليش ..؟
انا : شو ليش بعد ..!؟ اخاف احمدوه ايده خفت وشالوا الجبس وعاد تعرفه انت اكيد بيكسرني من يشوفني ..
عبوود : صح والله عندك حق ههههه .. خلاص ولايهمك انا بجيبها لك ..
راح اليوم الثاني صاحبي واستلم شهادتي وشهادته وشافه احمد وعلى طول سأله لما شافه ..
احمد : وين صاحبك عيل ؟ اشوفه ماوصل للحين عشان يستلم شهادته ..!
عبدالله : راحوا البلد هو واهله خلاص وقال لي استلم شهادته عنه ..
احمد : اهاا .. راحوا البلد هاا..؟ زين زين .. مصيره يجي واشوفه ماعليه ..
رجع عبدالله من المدرسه واعطاني الشهاده وخبرني باللي حصل ..
انا : شفت كيف انه يدورني دواره ..! كان معي حق لما قلتلك انت استلمها عني الشهاده ولا كان خلاص متكسر جسمي الحين ..
عبدالله : صح والله ههههه .. انت لو شفت عيونه كيف يدور عليك كان الشرر يتطاير منهم نعم هههههه ..
ضحكت انا وقلت : شفت كيف ..!؟.. الحمد لله اني مارحت ههههه ..
انتهى .. بقلمي

اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ...

كثير نسمع بأنه لاتوجد جريمه كامله وان لابد من وجود خطأ ما يحدث وتظهر الحقيقه ورغم إيماننا بذلك إلا ان الحياه اثبتت بأن آلاف الجرائم تحدث يوميا ولم يتم التوصل للجناه لأسباب عديده ...
اليوم راح احكي لكم قصه وهالقصه حصلت في دوله عربيه عام 1930 حسبما اتذكر ...
سرد القصه وكتابة السيناريو وتصوير الاحداث والاخراج بقلمي المتواضع ..
الله يسلمكم مره بنت ومعاها 3 رجال شكلوا تنظيم عصابي وعملوا العجب في السرقات الكبيره ..
اتفقوا ان البنت تنتحل شخصية اميره ذات غنى وجمال وشخصبه استقراطيه والرجال الثلاثه اللي معاها واحد سائق والإثنين حراس شخصيين لها ...
وخطتهم بدأت بإستئجار سياره فارهه وبعدين تركب فيها الاميره ومعها الحارسين الشخصيين والسائق ويروحوا لأكبر محل ذهب ومجوهرات ..
ينزل الحراس الشخصين ويدخلوا على صاحب المحل ويقولوا له : سمو الاميره راح تدخل محلك الحين تختار مجوهرات وذهب لها ..
طبعا صاحب المحل يفرح كثير لأن اللي راح تشتري اميره مو انسانه عاديه وطبعا راح يكسب الآلاف من هالشراء ..
يفتح السائق لها باب السياره وتنزل بكل كبرياء وشموخ والحراسين الشخصين محيطين بها والسائق بسرعه يركض للمحل يفتح لها الباب وطبعا كل هذا يحدث امام عين صاحب المحل اللي يزيد انبهاره ههههه ..
وبسرعه يقربوا لها افخم كرسي وتجلس عليه وصاحب المحل يختار اثمن واجمل ماعنده من ذهب ومجوهرات ويجيبهم للأميره عشان تختار اللي تبيه ..
تختار الاميره طبعا الكثير مما غلى وزنه وسهل حمله وتقوم من كرسيها وتكتب لصاحب المحل شيك بالمبلغ لا وتزيد فيه شوي اكراما له هههههه . وبسرعه اللي معاها يفتحون لها الباب وصاحب المحل يودعها لحد باب السياره وهو فرحان من هالمكسب الرهيب اللي فجأه حصل عليه ..
ولما يروح اليوم الثاني يصرف الشيك يطلع انه بدون رصيد وعاد هو وحظه تحمل الصدمه ولا مات هههههه ..
استمرت هالعصابه على هالأسلوب سرقوا محلات كثير وكانوا يغيروا اماكن سكنهم بالفنادق وبعد بأماكن السرقات وكل يوم بمنطقه من البلد ... بدأت الصحافه تكتب والشكاوي تنهال على الشرطه وهي تحاول تحاصر هذا الأمر وتمسكهم لأن الذهب والمجوهرات المسروق بالملايين كان ..
اخيرا اجتمعت العصابه واتفقوا على القيام بأخر واكبر سرقه لأن الوضع خلاص صار خطير ...
تنكّر واحد منهم بلياس الشرطه وراح لأكبر محل مجوهرات ودخل وسلم على صاحب المحل وقال له : معك الضابط فلان .. طبعا سمعت انت عن عصابة الأميره اللي للأسف الشديد نهبت الكثير من المحلات ولم يتم التوصل لها ..
رد صاحب المحل : ايوا سمعت هالسالفه اصلا عامله بلبله في البلد والكل خايف منها ويتكلم ..
رد الضابط صاحبنا : اهااا .. عليك نور ماشاء الله عليك اسميك طلعت ذيب نعم وراح تسهل مهمتي وايد انته ..
صاحب المحل استغرب وسأله : اشلون يعني .. مافهمت قصدك ؟ وضّح لي اكثر ..
هنا عاد صاحبنا رسم الجديه على وجهه واخذه على جنب وهو يهمس له وقال : عندنا معلومات مؤكده ان هالاميره هي وعصابتها راح تجيك بكره الساعه كذا .. وطبعا انت سمعت عن اسلوبها انها تختار اغلى واثمن المجوهرات .. الخ ..
رد صاحب المحل : ايوا سمعت عن هالموضوع ..
هنا قال له صاحبنا : اهاا .. الحين عاد بقولك شو تسوي .. لما تجيك هالاميره خلي نفسك ماعندك خبر بأي شي واعطيها اللي تبيه .. احنا متابعين للموقف تطمن ولعلمك هي وعصابتها ساكنه فندق كذا .. والحين بروح عنك بس ارجوك خليك ملتزم بالخطه لاتخرب علينا خطتنا واحنا من نمسكها تعال لي المركز الفلاني عشان تستلم مجوهراتك وذهبك وراح نعطيك جائزه نتيجة تعاونك هذا مع رجال الأمن وراح تشتهر والصحافه تكتب عن بطولتك ههههههه ..
فرح صاحب المحل وتطمن ان اخيرا راح يمسكون هالعصابه وكمان راح يشتهر ..
في اليوم الموعود جت العصابه بس هالمره صاحبنا الضابط ماكان عندهم .. اختارت الاميره زي العاده اللي تبيه وبعدها قالت لصاحب المحل : انا مقيمه في فندق كذا ياريت تجيني هناك بعد ساعه ومعاك مجموعه اخرى عشان اختار بشكل افضل لأني شوي مستعجله حاليا وعاد لما تجي بعطيك المبلغ اللي تبيه وفوقه مبلغ هديه مني .. صاحب المحل قال لها : حاضر سمو الاميره ولايهمك راح اكون عندك بالموعد اللي ذكرتيه ..
طلعت الاميره وصاحب المحل يودعها بكل احترام وهو متطمن خاصة وان سكنها طلع نفس اللي قال عليه صاحبنا الضابط ..
وصل صاحب المحل فنفس الموعد للفندق وشاف الضابط يتمشى بالحديقه وابتسم كل منهما للثاني هههههه ...
طلع للأميره جناحها واعطاها المجموعه الجديده من اللي جابهم .. اختارت الاميره كل اللي جابهم وقالت له : الحين بكتب لك شيك بالمبلغ وفوقه مبلغ بسيط هديه لك مني .. ولحد ما اجهز لك الشيك اشرب هالعصير وارتاح ..شرب صاحبنا العصير وراح ف سابع نومه ههههه .. شوي إلا والضابط صاحبنا داخل الفندق ويقول لمدير الفندق : بسرعه قول لي الاميره ساكنه بأي جناح ؟ رد مدير الفندق : خير شو حاصل ؟
رد الضابط : بعدين بتعرف نايمين فالعسل انتوا ماعندكم خبر بشي مو كأنكم بالبلد عايشين ..!!
طلع بسرعه هالضابط للجناح وفجأه نزل ومعاه الاميره ومعها السائق وحارسها الشخصي مقيدين وهو يكفخهم ويقول لهم قدام كل المتواجدين ومن ضمنهم مدير الفندق : ع بالكم راح تظلوا دوم تنصبون ع الناس هاااه ؟ ماعليكم انا بوريكم شغلكم .. اعدام فيكم ماراح يكفيني ... وفجأه التفت لمدير الفندق وقال له : جهز فواتيرك وتعال لي المركز الفلاني بعد 3 ساعات لأن تعرف راح اكون مشغول بالتحقيق معاهم وتجهيز الأدله ...
تطمّن مدير الفندق وقام هو وكل المتواجدين بالفندق يشجعوه ويقولوا له : اسميك ذيب نعم .. صلبهم .. الخ .. ( والله اللي يسمع هالكلام راح يفتكر الرايق معهم ذيك الساعه هههههه ) ..
طلع الضابط وقدامه العصابه وركبوا السياره وتحركوا ...
وهم بالطريق فك قيودهم وغيروا ملابسهم وعلى طول للمطار لأن باقي على اقلاع الطائره يادوب ساعه لأن التذاكر خلاص كانت جاهزه والحجز من يومين كانوا مرتبينه هههههه .. خلصوا اجراءات السفر بسرعه واقلعت الطائره ..
بعد اقلاع الطائره بساعه صحى صاحب محل المجوهرات من نومه والتفت حوله ولما ماشاف احد قام يصرخ ونزل بسرعه وهو يصرخ : وينهم ؟ راحت مجوهراتي سرقتهم الاميره واللي معاها .. الخ تلّقاه مدير الفندق وابتسم له يهدّيه وقال له : خلاص تطمن مسكوها العصابه وبعد شوي بروح المركز عند الضابط فلان استلم فلوسي بس شوي اخلص حساب الفواتير وبنفس الوقت اعطيه مجال للتحقيق لأنه قال لي تعال بعد 3 ساعات ..
فرح صاحب محل المجوهرات وتطمن وقال له : اعرفه هالضابط والله انه نشمي ونفس الشي قال لي اجيه المركز عشان استلم مجوهراتي ..
رد مدير الفندق : خلاص عيل بنروح مع بعض ..
شوي وتحركوا وراحوا للمركز اللي قال لهم عليه صاحبنا الضابط ..
دخلوا المركز وهم فرحانين وشافوا احد الضباط جالس بالإستعلامات .. سلموا
عليه وقالوا : لو سمحت نبي الضابط فلان ..
الضابط استغرب من هالإسم وقال لهم : هالإسم مامر علي وماعندنا ضابط بهذا الإسم ..!!
مدير الفندق وصاحب محل المجوهرات ردوا بنفس اللحظه : اشلون ماعندكم هالضابط البطل واحنا من شوي شايفينه ومسك الاميره وبهذلها هي والعصابه وقال لنا نجيه هنا عشان ناخذ حقنا وهي تترحل للسجن بعد التحقيق ..!
الضابط أكد لهم بـأن هالإسم مو موجود معهم وقال لهم : اصلا احنا خلاص على وشك نمسكهم وحتى صورهم معانا .. لحظات بس بوريكم صورهم ..اول ماشافوا الصور إلا وصاحبنا الضابط كان من ضمنهم هههههه ..
هنا عاد بصراحه ما اذكر شو اللي حصل لهم من الصدمه ماتوا ولا جتهم نوبه ولا شو بالضبط هههههه ..!!!
انتهى ... بقلمي

اخوكم / رايق البال

ملاحظه : نشرت هنا لي في 7 / 7 / 2013

[اسطورة لن تتكرر]

يسعد صباحكم / مساكم
هلا بالجميع ..

نلتقي مرة اخرى ايها الاحبه وقصه بقلمي يغلب عليها الطابع الكوميدي ربما لكوني لا اميل كثيرا للتراجيدي والكوميديا السوداء وغيرها من انواع القصص ..
في احد القرى كان هناك يعيش شاب ..
هالشاب كان صايع ضايع لا صلاه ولا عباده ولا شغله ولا مشغله ..
لحد يوم من الايام قرر يرحل عن قريته على امل يشوف قريه يستقر فيها وتتحسن اوضاعه وتتعدل ..
ومن قريه لقريه ومن بلد لبلد لحد ماوصل لقريه كان ناسها بسطاء للغايه وعددهم قليل وكلهم اميين ..
لما وصل مدخل القريه التقاه شخص وعزمه للغدا ببيته لما عرف انه غريب وهو يقدم له واجب الضيافه سأله صاحبنا بكل عفويه : مالاحظت بقريتكم مسجد ..! انتوا وين تصلوا ؟
تنهد الرجل وهز راسه بأسى وقال : للاسف احنا ناس جهله واميّين ومانعرف نصلي ولا نعرف آيه من القرآن ..!
هنا عاد صاحبنا اظهر الجديه على وجهه ومعالم الغضب وقال : يعني شوو ؟ شو هالكلام اللي اسمعه منك ؟ لا حول ولا قوة الا بالله العلي العظيم .. هذي صلاه وعباده مايصير هالكلام ..!
الرجل انحرج وقام يبوس راسه على باله انه شيخ جليل وعالم وقور هههههه ويستسمح منه ويقول : اعذرنا الشيخ والله احنا ماودنا نكون كذي بس ترانا مانعرف شي والحمد لله اللي جابك لقريتنا عشان تعلمنا اصول الدين وتكون امام تصلي بنا وراح نتكفل بأكلك وشربك وسكنك ... ارجوك وافق عشان اروح ابشر اهل القريه .
صاحبنا تورط وهز راسه وهو يقول بخاطره : ياربي شو هالورطه اللي انا تورطتها ..!؟ انا بروحي ما اعرف اصلي ولا حافظ آيه من القرآن هههههه .. شسوي الحين بهالموقف ..؟
هو يكلم نفسه والرجل يطالعه وينتظر رده بفارغ الصبر ..
بعد شوي عدّل صاحبنا من جلسته وقال بكل هدوء : والله ياخي هذي مسؤوليه كبيره ولكن راح اقبلها وان شاء الله اوفق فيها وانا انسان ادوّر الاجر وعسى الله يتقبل مني ..
الرجل فرح وقام يبوس راسه مره وهو يجلّه ويقدره وطلع بسرعه وبشر اهل القريه وخبرهم باللي صار ..
فرحوا اهل القريه وجوا كلهم يسلموا على هالعالم الجليل ويشكروه على هالجميل اللي راح يسويه وصاحبنا يتكلم بهدوء ووقار بأنه يبغى بس الاجر ..
وبعد السلام وعبارات الشكر اللي انهالت على صاحبنا قال لهم بكل ثقه وهدوء ان الصلاه راح تبدأ من بكره لأنه اليوم واصل ومرهق من الدرب .. وكان هو طبعا يبي يجلس مع نفسه ويرتب الموضوع يخاف يتورط ههههه ..
لما حانت الصلاه باليوم الثاني وقف قدامهم كإمام وهم خلفه وقام يقول اي كلام يخطر بباله وبآخر الكلام يقول الله اكبر واهل البلد يرددوا وراه مساكين على بالهم هذي هي الصلاه ..
استمر على هالوضع عدة ايام وفجأه لمعت بعقله فكره جهنميه وقال الحين اهل القريه دام مايعرفوا شي وعلى بالهم اللي اقوله هو آيات قرآنيه ليش ما استغل الوضع؟ تعبت كل يوم نفس الاكل تقريبا ولابد اتصرف فهالموضوع ..
لما حانت الصلاه وقف كالعاده امام لهم وقام يقول .. ( ايها الناس اطعموا اليوم معلمّكم الدجاج وبعض الفواكه .. الله اكبر ..) ..
بعد الصلاه جاب له غداه الشخص اللي عليه الدور وتفاجأ ان غداه هالمره نفس اللي حدده لما كان يصلي بهم ..
فرح صاحبنا وقال ياليتني من الاول كذي سويت كان كل يوم غداي غير وعشاي غير ههههه ..
استمر شهور على هالوضع كل يوم يحدد لهم اللي يبي ياكله وهم مساكين يسووه له ..
لحد يوم من الايام كان يصلي بهم الظهر وقال ( اليوم اطعموا معلمّكم السمك واللحم وفاكهة من الموز والرمان .. الله اكبر ) ..
فجأه ..
سمع صوت شخص من آخر الصف يتحمحم ويقول : سبحان الله ..
دار راسه صاحبنا لأن هذا معناه حد فاهم موجود من ضمن اهل القريه او شخص غريب وصل القريه وعارف كيف الصلاه والقرآن ..
فكر بسرعه وهمس بقلبه ياربي شو هالورطه ؟ شسوي الحين لو طلع هالشخص فاهم؟ راح انكشف وانفضح اكيد .. وهو يفكر بسرعه فجأه جته فكره وقال بقلبه .. لقيتها لقيتهاا .. راح اعيد القراءه مره ثانيه بنفس الكلام ولو كرر كلامه وتحمحم معناه شكّي في محله ولازم اتصرف بسرعه ولو ماقال شي معناه الوضع عادي وماعلي خوف ..

كرر اللي قاله وهو قلبه يرجف من الخوف واذنه على آخر الصف يبي يشوف ردة فعل هذاك الشخص ..
تحمحم الرجل هذاك مره ثانيه وقال : سبحان الله ..
هنا عاد تأكد صاحبنا ان هالرجل فاهم ولازم يتصرف بسرعه عشان ماينكشف ..
وبسرعه جته فكره جهنميه وقال راح انفذها وعسى بس يفهمها ..
قال بكل خشوع وهدوء ( يا ايها المتحمحمون لا تتكلمون لكم رزق مما يعطون من ثيران بلا قرون .. الله اكبر ) ..
قالها وقلبه تزيد رجفته من الخوف يبي بشوف شو راح يكون موقف هذاك الرجل وردة فعله ..
فجأه سكت الرجل والشيخ صاحبنا ارتاح وتنفس الصعداء على قولتهم بعدما تطمّن ان الرجل فهم قصده هههههه وانتهت الصلاه وقاموا يسلموا على بعض ولما التقت عين الرجل بعين الشيخ الجليل كل واحد فيهم تبسّم لصاحبه وغمز بعينه هههههه ..
صاحبنا قال لأهل القريه اليوم غدا هالشخص الغريب معي ..
رد اللي عليه الدور : تمام شيخنا ولايهمك وضيفك ضيفنا كلنا ..
راحوا اهل القريه كل واحد لبيته والشيخ والرجل مع بعض راحوا ..
قال صاحبنا للرجل : والله انك فعلت خير لما سكت ولا كنت بتورط ..
رد الرجل : تراني فهمت قصدك عشان كذي سكت مع انه دار راسي من الكلام اللي تقوله بالصلاه..! خبرني شو سالفة هالقريه واهلها ؟ وشو هالصلاه الغريبه؟
رد صاحبنا : انا بعد دار راسي لما سمعتك تتحمحم وتقول سبحان الله وقلت ف خاطري ياربي من وين هذا طلع لي بعد ..!؟ انا صار لي سنين ومنين ضاحك على هذولا وبالاخير يجي هذا ويكشفني وانفضح ..! ويطلّعني من النعيم اللي انا عايش فيه ههههه ..! وقلت خليني اسوي هالحركه لعل وعسى يفهم ويسكت والحمد لله انك فهمت الحركه وسكت ولا كان ياويلي منهم ههههه ولد الحلال هذولا ثيران وبصراحه انا واحد صايع ضايع وهم على بالهم اني عالم وشيخ جليل وعاد انا من شفت كذي وضعهم قلت شو مكلفني اتعب عمري ؟ خليني معهم مرتاح .. ماكل شارب نايم من ظهر هالثيران لا واحدد اللي ابيه بعد ههههه ..
ضحك الرجل وقال : اهاا .. كذي السالفه عيل ؟ وانا اقول ليش كذي يقول لما يصلي بهم ههههه؟ ..
ضحك صاحبنا ورد عليه : الحين عاد دام تعارفنا وتفاهمنا .. شو رأيك اخبرهم بأني اخترتك نائب لي؟ وانت شايف كيف انا مرتاح واموري طيبه هههههه ..
ابتسم الرجل وقال : افا عليك تم .. حد يرفس النعمه بريوله ههههه ..!
صاحبنا ضحك ورد عليه وقال : خلاص عيل ولايهمك .. راح ارتب الموضوع اليوم ان شاء الله ..
قبل الصلاه قال الشيخ لأهل القريه اليوم بعد الصلاه لاتروحوا اريد اكلمكم بموضوع مهم ..
ردوا عليه تم شيخنا ولايهمك انت تأمر امر ..
بعد الصلاه وكل واحد من اهل القريه ينتظر بفارغ الصبر كلام الشيخ ..
تنحنح الشيخ وعدّل من جلسته وقال بكل هدوء ووقار : يا اخوان الانسان تحكمه ظروفه وانا اليوم معكم وقايم بواجبي ..
قاطعوه اهل القريه وردوا بصوت واحد : احنا نشهد والله ان لولاك انته كنا في ظلام نعيش ..
رد الشيخ بوقاره المعهود وهدوءه وقال : جزاكم الله خير .. الموضوع اللي اريد اكلمكم فيه هو اني انسان اولا واخيرا .. جايز امرض او اموت او ارحل او اي شي يصير وحرام بعد كل الجهد اللي بذلته ترجعوا للجهاله وعصر الظلام .. عشان كذي راح اخلي هالرجل الغريب نائب لي ويكون بدالي لو صار لي شي لاسمح الله وتطمنوا انا اختبرته وماشاء الله عليه طلع رجل تقي وورع وحافظ القرآن صم مثلي طبعا .. شو قلتوا ؟
ردوا اهل القريه : الله يعطيك طولة العمر وعسانا ماننحرم منك شيخنا .. ومن بعد كلامك احنا مالنا كلمه .. كلمتك على قدام وجزاك الله خير دوم تفكر بمصلحتنا .. وقاموا يبوسوا راسه ويشكروه وهو يردد استغفر الله .. استغفر الله ماله داعي الشكر يا اخوان انا منكم وفيكم وانا انسان ادوّر الاجر ..
كل هالاحداث تصير قدام هذاك الرجل وهو ساكت ويهز راسه ويقول بقلبه ( حسبي الله على ابليسك اسميك داهيه نعم ماينقدر عليك هههههه ) ...
وعاش صاحبنا ونائبه في القريه معززين مكرمين المده اللي كانت لهم بالحياه ..
انتهى ..
بقلمي
اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ..

لقاء آخر يجمعنا ايها الاحبه وقصه بسيطه بقلمي اتمنى تنال استحسانكم ..
الله يسلمكم زمان وانا بالصف الخامس الابتدائي كان اصعب واكره ماده معي الرياضيات واتوقع الكل مثلي ههههه ..
والله من كثر ما اكتب عن مقالبي اتوقع الكل راح يفتكر الرايق راعي مشاكل ههههههه ..
كان يدرسنا هالماده استاذ مصري وكثير عصبي ويضرب بدون تفاهم عشان كذي ربما كرهت هالماده اكثر ..
معظم حصصه معنا بالصف كانت بالرابعه او الاخيره لذلك عشان اهرب من حصته جلست افكر شو اسوي ياربي .. شو اسوي؟
فجأه ..
جتني فكره جهنميه وطبقتها ..
بالمدرسه معنا مصلى للصلاه ومفتوح من جوانبه الاربع ..
بديت بتنفيذ فكرتي بعدما ترسخت بذهني على طول ..
انتظرت لحد رن جرس نهاية الحصه الثالثه وبسرعه طلعت قبل لا يدخل مدرس الرياضيات ورحت المصلى ..
وظليت على هالحال اطلع بسرعه بعد انتهاء الحصه الثالثه مباشرة لو كان هو معنا الحصه الرابعه وقبل الاخيره لو حصته الاخيره بصفنا ..
استمر هالوضع كل يوم لحد يوم من الايام الاستاذ افتقدني وسأل الطلاب ..
الاستاذ : امال الواد اللي بالكرسي الاخير فين؟ اصلي مشفتوش من مده هنا ..!
الطلاب : رايح يصلي استاذ ..
الاستاذ : بقه كده .. طيب
لما رجعت الصف بعد نهاية حصته خبروني الشباب ..
الشباب : ياويلك يا (فلان ) استاذ الرياضيات اليوم سأل عنك
انا : قولوا والله ؟ شو قلتوا له الله ياخذ ابليسكم ؟
الشباب : قلنا له انك رايح تصلي
انا : اهاا جزاكم الله خير بصراحه .. بس شو كانت ردة فعله لما كذي قلتوا له ؟
الشباب : سكت شوي وبعدين قال بقه كده .. طيّب
انا : اهاا .. الله يستر لأن كلامه مايطمّن خاصه لما قال طيّب ..
مرن كم يوم وانا على نفس الموال لحد يوم من الايام الاستاذ الظاهر نفذ صبره ..
سأل الطلبه مره ثانيه : لسه الواد ده بيصلي زي عوايده ؟
الطلاب : ايوا استاذ ..
الاستاذ : فين بقه قلتوا لي ؟
الطلاب : بمصلي المدرسه استاذ
الاستاذ : بقه كده .. طب حلوا المسأله دي لحد ما ارجع لكم تاني ..
الطلاب : تمام استاذ ..
طلع الاستاذ من الصف وانا اشوفه من المصلى متجه لي وطبعا هالزياره المفاجئه والسعيده انا انتظرها واتوقعها تصير بأي يوم هههههه ..
قلت فنفسي ياربي شو هالورطه ؟ الحين هذا شو جابه هنا وشو راح اقوله ..!؟
قرب الاستاذ مني وانا ولا كأني شايفنه وقمت اركع واسجد وادعي ساعه .. اصلي التراويح نعم مو الضحى او الظهر هههههه ..
وقف الاستاذ فتره ينتظرني اخلص وانا بالعكس يزيد ركوعي وسجودي ولا كأني حاس به وشايفنه ..
نفذ صبره اخيرا وقال لي بصوت عالي : لما تخلص صلاتك ياحاج ابقى تعال اوضة ( غرفة ) المدرسين منت طبعا مش حتخلص صلاه الا بعد ماتخلص حصتي انا عارف ..!
انا سكت طبعا وظليت على وضعي وهو راح ..
ياربي شو اسوي الحين؟ مضروب اليوم يعني مضروب ههههه .. بس الافضل اروح له غرفة المدرسين ع الاقل لو ظربني هناك ماراح يضربني وايد لأن المدرسين اللي بالغرفه راح يتدخلوا ويهدوّه اما بالصف بيتولاني ومحد بيقدر يقول له شي ..
بعدما رن الجرس وانتهت حصته وراح غرفة المدرسين رحت عنده ووقفت قدامه بكل هدوء ..
الاستاذ : خلصت صلاتك ياحاج؟
انا بكل براءه : ايوا استاذ والحمد لله ..
الاستاذ : الحمد لله .. إلا قول لي ياواد هو انته صلاتك والتهجد بتاعك مايجيش يعني الا بحصصي انا ...!
انا بكل براءه : شو يعني استاذ ؟ مافهمت قصدك
الاستاذ : والنبي ..! هو انت حتعملهم علي ياواد وعايز تأكلّني الاوانطه ولا ايه ..! كان غيرك اشطر يابابا ..
انا : استاذ انا كنت اصلي وانت شفتني بنفسك .. يعني ماهربت من المدرسه ..
الاستاذ : واللهّي ..!؟ طب آسفين ياسيدنا الشيخ اصلي افتكرتك بالغلط هربت ..!
انا : لا استاذ كله ولا الهروب من المدرسه ..
الاستاذ وصبره خلاص نفذ وعصبيته طلعت : شوف يااد متحاولش تعمل الشويتين دول بتوعك عليّ انت فاهم ؟ قسما عظما ان ماشفتكش من بكره حاضر بحصصي سواء الرابعه او الاخيره حوريك نجوم الليل فعز الظهر .. قال بصلي قال ..! علينا برضه الكلام ده ..! فاهم ياد ولا افهمك اكتر بالعصايه اللي شايفها قدامي دي ..؟
انا : فاهم استاذ حاضر ولايهمك ..
رجعت الصف وعاد الطلاب ينتظروني على احر من الجمر هههههه يبوا يعرفون شو كانت نهاية هاللقاء التاريخي بيني وبين مدرس الرياضيات ههههه ..
خبرتهم باللي صار كله وكلهم قالوا .. بصراحه معه حق .. انت عاد وايد مصختها حشى صلاتك ماتصير الا بحصصه هو بس ..! تستاهل اللي جاك ..
انا : استاهل هاا استاهل .. ماعليكم بسيطه ..
الشباب : ايوا تستاهل .. اشمعنى احنا كل يوم الضرب فينا يعني ؟
انا : كله منكم الله ياخذ ابليسكم حسدتوني على الراحه .. الحين عاد شو اللي بيفكّني منه .. ارتحتوا الحين ؟
الشباب : ايوا ارتحنا ههههه ..
من يومها واضبت على حضور حصصه وطبعا ماله داعي اوضح اثار هذاك الحضور على إيدي هههههه ..
الغريبه اني لما نجحت وانتقلت للصف للسادس اصبحت اشطر طالب بالصف بمادة الرياضيات تحديدا ولحد هاللحظه ما اعرف السبب والله بكل امانه هههههه ربما لأن المدرس تغير بواحد غيره مع انه نفس الشي مثله مصري ..! سبحان الله ..
انتهى ..
طابت لياليكم ...

بقلمي /
اخوكم / رايق البال

[اسطورة لن تتكرر]

يسعد صباحكم / مساكم
هلا بالجميع ...

للمره الاولى اتطرق للكتابه الروائيه ولإتجاه آخر ايضا حيث يغلب على القصص التي اكتبها الطابع الكوميدي دائما بينما في روايتي هذه اتجه بعض الشيئ للغموض والرعب وهي احداث حقيقيه حصلت بالفعل ..
بطل قصتنا شاب يعيش في بيت فخم سواء من ناحية اثاثه او حجمه وموقعه وفي منطقه هادئه للغايه حيث يقيم معه بعض افراد اسرته ..
ورغم اتساع البيت بالغرف العديده الا ان من يقطنه عائله صغيره لا تتجاوز
5 افراد ..
جدول يومه عادي للغايه ووقته موزع مابين عمله صباحا واللقاء بأصحابه ليلا والسهر معهم ..
ايام حياته تمضي بشكل روتيني تقريبا حيث بعد انتهاء دوام عمله يهرع للبيت وبعد تناوله الغداء ينام وبعدما يصحو يخرج للقاء اصحابه ..
هكذا كانت تمضي حياته ..
الا انه حدث شي ما في حياته وبشكل مفاجئ ذات ليله ...!
شيئ سمع عن بعض احداث حصلت بسببه للبعض وقرأ عنها ولكن لم يعش تلك الاحداث على ارض الواقع بل لم يتوقعها تحدث معه ..!
لذا كانت هناك تساؤلات عديده في نفسه بعدما عاش بعض تلك الاحداث التي كان يسمع عنها ولكن لم يعرف الاجابه عنها حتى الآن ..
في احدى الليالي وبعد قضاءه سهرته مع اصحابه كالعاده عاد وكانت الساعه تقارب 12 من منتصف الليل ..
اوقف سيارته واطفأ محركها ونزل وفتح الباب الخارجي للبيت الذي يقطن فيه مع تلك العائله ودلف وبينما هو يمد خطواته للمدخل الرئيسي رأى ضيفا غير عادي ينتظره على درجات الباب المؤدي للصاله ......!

يتبع ( 2 )
بقلمي ..
اخوكم / رايق البال

[اسطورة لن تتكرر]

د صباحكم / مساكم
هلا بالجميع ..

من جديد نلتقي وقصه من قلمي قد تكون مختلفه هذه المره لكونها بعيده عن الجانب الكوميدي كما تعودت ...

اعتذر من الجميع بالبدايه لكون احداثها مؤلمه جدا ومؤثره للغايه

..
في منطقه ما كان يعيش اخوان اثنين غير اشقاء كل واحد فيهم تقريبا عمره 70 وربما اكثر وتوفوا قبل 7 او 6 سنوات ..
يعيشوا هالاخوين مع بعض في مزرعه قريبه من الملعب اللي كنا نلعب فيه كوره وكنت وانا رايح الملعب العب كوره مع الشباب امر بجانب مزرعتهم لانه هو الطريق الوحيد وربما القريب للملعب ..
واحد منهم كان منظره وتصرفه مرعب بكل ماتحمله هالكلمه من معنى سواء من الناحيه الشكليه او السلوكيه وكان لما يشوفني يتكلم بكلام غير مفهوم ويهذي والثاني وضعه شوي افضل ..
كنت وانا امر اسلم عليهم وانا اركض عشان الحق الشباب قبل لا يبدوا اللعب ..
وكان اللي شكله ووضعه افضل من اخوه يرد السلام ويسالني ..
الرجل : كيف حالك ولدي .. وكيف صحة ابوك وامك؟
انا : الحمد لله عمي كلهم بخير ..
الرجل : تعال تقهوى معنا
انا : مشكور عمي مستعجل الشباب ينتظروني ..
كان هذا الحوار الروتيني الدايم يجمعني به وبصراحه لعدة مرات كان ودي البّي دعوته بس اخاف لان منظر اخوه وتصرفاته غير طبيعيه ..
ولأن عقدة الخوف منهم وصلت حدها عندي ..
سألت والدتي ( رحمها الله ورحم والدي ) في يوم ما عن سر ذلك الرجل وخبرتها بكل شي احسه لما اطالعه وكيف ان نظراته وتصرفاته مرعبه ..
تنهدت والدتي ( رحمها الله) وقالت لي ..
- لهالرجل قصه ياولدي ..
انا وبكل لهفه : ايش هي قصته ؟
والدتي : هذا الرجل في شبابه كان كثير عاق لوالديه وخاصه امه الله يرحمها ويعاملهم بشكل سيئ جدا ..
انا : كيف يعني .. مافهمت ؟
والدتي : ياولدي هذا الرجل من ضمن اللي سواه بأمه انه بعد وفاتها (وكانت وفاتها في عز الشتاء وفي ليله قارسة البروده ) واثناء قيام الحريم بعملية التغسيل لها نادنه وقالت له وحده منهن قدام الكل ..
كلنا نعرف اللي سويته في امك وابوك في حياتهم من عقوق وتقصير بس ع الاقل الحين احسن ولو مره في امك وهي ميته دام ماسويت هالشي وهي حيه ..
رد عليها بكل برود : ايش اسوي يعني؟
الحريم : الماي على وشك يخلص .. روح الفلج هات لنا شوية ماي عشان نخلص تغسيلها والرجال يشلوها للمقبره ..
وكملت والدتي وهي تحبس دموعها ..
- تدري ايش رد عليهن؟
انا : لا .. بس اكيد راح يركض يجيب ماي
والدتي : لا ياولدي .. رد عليهن بكل برود وقسوة قلب (

ايش رأيكن بعد اسخن الماي عن تبرد وانتن تغسلنها خاصه اليوم برد وايد

) ..
كانت الاجابه صادمه .. مذهله .. مؤلمه للجميع ..
لما شافن الحريم هذا رده سكتن عنه وراحن مجموعه منهن وجابن ماي وانتهت عملية التغسيل وبعد ذلك دفنها بالمقبره ..
بعد وفاتها بعدة ايام اصيب هذا الابن بإنتكاسه مفاجئه حيث اصيب بشلل شبه كامل ولوثه عقليه واصبح كالاطفال في تصرفاته وكالمجانين يهذي بكلام غير مفهوم ولولا وجود اخوه معه مات من الجوع والعطش لان محد عنده يسال عليه ويتكفل به ..
بسم الله الرحمن ((

وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا (23)

وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا

(

24

)) ..

صدق الله العظيم ..
انتهى .. بقلمي
اخوكم / رايق البال

[اسطورة لن تتكرر]

يسعد مساكم / صباحكم
هلا بالجميع ..
عوده جديده لقلمي وقصه واقعيه حصلت زمان ..

كان احد الاشخاص يعمل في احدى الجهات العسكريه زمان بوظيفة جندي مثل كثير من الشباب العماني ..
هالشخص كان وايد يتغيب عن عمله وملفه كله محاضر تحقيق وخصميات من الراتب وفوق هذا كان - الله يهديه - خمار زمار ( الله يعزكم ) ولا صلاه ولا عباده ههههه ..
الكل كان عارف اخلاقياته واسلوبه وياما نصحوه ولكن لا حياة لمن تنادي ..
لحد يوم من الايام فجأه هالجندي راح لمكتب الضابط المسؤول عنه وقدم طلب اجازة حج ..!
الضابط لما شاف طلبه انصدم لانه عارف اخلاقياته وحياته كيف عايش والشباب ربعه بعد انصدموا وكل واحد فيهم يردد .. معقوله فلان يروح الحج ؟ هذا صلاه مايصليها اشلون يحج عاد ههههه بس بالاخير الضابط وافق رغم انه مو مقتنع داخليا بس قال سبحان الله يمكن الله هداه وناوي يتوب ..
عطوه اجازه حج وطلع اجازته وهو فرحان ..
مرت الايام وانتهت اجازة الحج وداوم هالمره بدون تأخير ..
لما داوم كان حالق شعر راسه ع الاخر ومربي لحيه ومسباح ف ايده وكل شوي يهلل ويكبر ويستغفر ..
اعطى لكل واحد من ربعه مسباح ومصحف ومن ضمنهم الضابط المسؤول عنه ..
بعد اننهاء الدوام نام مع ربعه بالسكن كالعاده والكل منصدم ويهز راسه ويقول معقوله فلان تغير لهالدرجه . ! سبحان الله ..
ناموا ولما قرب اذان الفجر انتظروا ربعه صاحبهم الحاج يقوم ويصلي بهم بس الحاج ولا على باله وشخيره من مسافة كيلو ينسمع ههههههه وربعه يصحوه .. اووه الحاج قوم صلي بنا او على الاقل صلي والحاج ابد ولا على باله وفسابع نومه ..
ربعه قالوا يمكن تعبان من السفر بنخليه اليوم يرتاح واكيد بكره من يسترد نشاطه الوضع راح يكون غير ..
اليوم الثاني تكرر نفس الشي الحاج الصلاه مايمر صوبها ابد هههههه ربعه خلوه وماهان عليهم يخبروا الضابط عنه ..
مرت الايام لحد ليله من الليالي كان هذاك الضابط سهران في البار ( والعياذ بالله ) الا شوي ويشوف صاحبنا داخل وطلب شراب ..
الضابط انصدم بس سكت وخلى نفسه كأنه ماشايفنه ..
صاحبنا شرب وارتاح ورجع السكن ونام ولا كأنه صاير شي ..
اليوم الثاني الضابط طلبه بمكتبه واول ماوصل سأله ..
الضابط : هلا فلان .. كيفك؟
صاحبنا : الحمد لله سيدي بالف خير
الضابط : الحمد لله .. ماشاء الله وايد تغيرت تصدق من رحت الحج . ! صلاه وعباده وهدوء الله يزيدك من فضله ..
صاحبنا : الحمد لله سيدي .. الواحد ترا لازم شوي يحاسب عمره ويعقل والطيش مب دايم عاد الواحد يستمر فيه ..
الضابط : عندك حق والله .. ماشاء الله عليك يافلان حكم تقول نعم حكم .. امس الساعه 9 بالليل وين كنت ؟
صاحبنا وهو مرتبك : انا ..!؟ بالسكن اسولف مع الشباب .. لالا طلعت اتمشى شوي .. لا تذكرت صح كنت نايم بعدما صليت العشا ..
الضابط : ماشاء الله الف اجابه اشوفك قلت ..! .. عيل من اللي بالبار كان الساعه 9 ؟
هنا صاحبنا اصفر لونه وتلعثم ودار راسه وماعرف يرد ..
الضابط وبكل حزم : روح جيب لي جواز سفرك الحين ؟
صاحبنا : الحين ؟ ليش سيدي ؟
الضابط وهو معصب : ايوا الحين وبدون ماتناقشني بعد .. رايح الحج هاا رايح الحج ..!
راح صاحبنا وجاب جوازه واعطاه الضابط ..
مسك الضابط الجواز وقام يقلب اوراقه الا ويشوف الختم عليه من تاريخ بدء اجازة هالجندي ( مسقط / تايلند / مسقط ) هههههههه ..
خلى الجواز على مكتبه ونظر لصاحبنا وصرخ فيه وهو معصب وقال : تايلند هاا..! تايلند..!؟ اشوف الكعبه هناك صارت .. ! تقص علينا ونصدقك على بالنا الله هداك وبالاخير يتضح انك رايح تايلند يامفتري ..! سجن شهرين وانهاء خدمه ..
صاحبنا : والله سيدي سامحني الشيطان ضحك علي واوعدك ما اكررها ..
الضابط : الشيطان قص عليك هاا ؟ خليه ينفعك الحين ..
وظل يحاول صاحبنا مع الضابط بس الضابط طنشته وبالفعل تم سجنه شهرين وانهيت خدماته ..
انتهى ..
بقلمي ..
اخوكم / رايق البال

[اسطورة لن تتكرر]

هلا بالجميع ..

عوده اخرى لقلمي وقصه من النوع الكوميدي كما تعودت حيث لا اميل للقصص ذات الطابع التراجيدي ربما لكونها لاتتناسب مع شخصيتي ..
ادري معظمكم دش عشان يعرف من سوسو ههههه وتعمدت اكتب هالعنوان عشان الكل يدش ^^ ..

طبعا القصه واقعيه بس غيرت فالاسم المستعار ..

قبل اسبوعين تقريبا وانا اتجهز بعد المغرب عشان اروح مع الشباب للمقهى اللي تعودنا نجلس فيه ..
جاني اتصال من واحد من الشباب اللي للاسف من شهور ماشفته ..
صاحبي : هلا يسعد مساك .. وينك يالقاطع ؟
انا : موجود والله وادري مقصر فيك وفي كثير ناس بعد
صاحبي : لاحشاك والله عن القصور بس ترا مشاغل والله والدنيا تلاهي صارت ..
انا : بالفعل كلامك صحيح ..
عيني ياعيني على الناس المشغوله ههههه ماتنلام ترا صرت تاجر انست الحين ومحد يقدر يحصلك يالحمارههههه
صاحبي : اي تاجر ولد الحلال خليها على الله بس هههه بس زين فتحت هالموضوع ..
شو رأيك نتعشى مع بعض؟
انا : تمام ولايهمك بس بتصل قبلها بالشباب اعتذر منهم
صاحبي : تم عيل خلاص انتظرك بمطعم ..... الساعه 9
انا : تمام ولايهمك اعتمد
انتهت مكالمتي معه واتصلت بالشباب اعتذر منهم ..
في الوقت المحدد رحت المطعم وحصلت صاحبي سابقني واول ماوصلت ناداني ورحت وجلست معه ..
بعد السلام والدردشه الخفيفه طلبنا عشا واحنا ننتظر العشا لين يوصل ..
سألته : شخبارك مع تجارة الانست ؟
هو : انت مانسيت بعدك ههههه انت عارف اني دشيت بإسم ولد بس اللي صار ماحصلت حد يشتري يادوب كم واحد بس ويسألوني عن البضاعه والسعر وبعدين مايتواصلوا معي مره ثانيه للاسف ..!
انا : اها .. وبعدين ؟
هو : وبعدين الله يسلمك التقيت بواحد من الربع وسولفنا في امور كثيره ومن ضمنها خبرته عن مشروعي وضحك لما قلتله سجلت بمعرف ولد وقال لي انت مافيك عقل اصلا ..
سجل بمعرف بنت افضل وعطاني عدة نصايح اسويها وبالفعل سويت اللي طلبه مني ..
انا : والله ؟ وبعدين ؟
صاحبي : وبعدين الله يسلمك نجحت نجاح ولا اروع هههههه
انا : اوهووو .. لالا مو معقول كلامك هههه وضح لي ياخي ..
وصل العشا وقمنا نتعشى ونكمل سوالفنا ..
صاحبي : الله يسلمك سجلت من جديد بإسم بنت واخترت اسم سوسو وحطيت صوره بنت نسختها من النت عشان تكون اللعبه صح ههههه
انا : الله ياخذ ابليسك على هالفكره الجهنميه هههه كمل وبعدين شو صار؟
صاحبي : قول شو اللي ماصار اصلا ههههه شو عدد المتواصلين وخاصه من الشباب شي ماراح تصدقه ولايخطر على بالك ههههه تصدق عددهم تجاوز ال 300 وانا اول 5 مو لاقي هههه ..
انا : ادري فيهم والله يبوا سبب نعم الله ياخذ ابليسهم بس هههه كمل ..
صاحبي : اول شي سويته طلعت رقم جديد وحطيت رقمي ونفذت كل تعليمات صاحبي اللي نصحني بها ومن ضمنها الغاء المكالمات والمسجات النصيه وخليت الواتس بس شغال ..
انا : ليش تلغي المكالمات .. غريبه ياخي ..!؟
هو : لا غريبه ولاشي بس نفترض احد منهم اتصل وخاصه الشباب وسمع صوتي اللي كنه صوت بعير شو ساعتها راح اسوي؟ ههههه
انا : اها .. صح والله معك حق فاتتني هذي اما انك ذيب نعم ههههه كمل شوقتني شو صار بعدين معاك ؟
صاحبي : الله يسلمك اللي صار كلما صحيت الصبح اشوف ولا 200 رساله على الواتس وتحديدا من الشباب ..
اللي كاتب صباح الحب واللي كاتب صباح الشوق واللي كاتب صباح السعاده سوسو واللي كاتب لك وحشه الغلا واللي كاتب فديتك سوسو .. الخ وانا اقرأ وميت من الضحك عليهم والله هههه .. وقام يوريني مسجاتهم ..
اللي راسل قلب واللي راسل ورده واللي راسل صورته وتحتها بشوي انا اسف سوسو بالغلط رسلت صورتي ههههه بالغلط ها بالغلط ..! علينا هالسوالف ههههه لا والبعض يدلعوه يقولوا له هلا وغلا السووس ههههه ..
قلت له ودموع عيني تنزل من كثر الضحك : الله ياخذ ابليسك مت من الضحك والله حتى ماقدرا اكل زين هههههه وبعدين ؟ كمل لاه ..
صاحبي : قمت اتعامل مع الجنسين بس بالواتس ولما يطلبوا شي اقولهم لو قدرت اطلع بجي بنفسي ولو ماقدرت برسل اخوي ..
عاد الشباب يتضايقوا لما اقول برسل اخوي ههههه بس احاول اهديهم عشان ما اخسرهم لاه ههههه ...
الغريبه البعض منهم ورغم اني اقول لهم برسل لك الاغراض على العنوان اللي رسلتوه خاصه اللي ولاياتهم بعيده عن مسقط يرفضوا ويقولوا لا بروحنا بنجي اصلا معنا اشغال بمسقط ههههه وانا عارف انه لا اشغال معهم ولاشي بس ترا السالفه فيها بنت لازم بيتعنوا وبيمسكوا خط عادي معهم ههههه ..
انا : انت تقول لي ..!؟ هههههه طبعا بيجوا بس لو قايلهم واحد من الربع تعالوا بيطلعوا مية عذر عشان مايجوا معه اعرفهم ههههه ..
صاحبي : شفت كيف هههه تصدق البعض منهم والله العظيم عرض علي يدعمني بفلوس عشان اكبر تجارتي واوسعها والبعض عرض يرسل رصيد بس كلهم والله رفضت اخذ منهم شي ..
صحيح انا لعبتها بهالشكل بس مش ممكن تسمح لي اخلاقياتي اخذ فلوس منهم لأن اللي يهمني بس ابيع اللي اتاجر به مو عشان اتعرف بفلان او فلانه ..
تصدق اني حظرت اكثر من 240 رقم لأن البعض منهم قام يقل ادبه علي للاسف يمكن عشان على بالهم انا بنت وكل واحد فيهم يبي يسولف معها ..
انا : ياربي .. بصراحه شي مذهل اللي قلته وعمري ماتوقعته ..
طيب هذا صاحبي وانا واثق من اخلاقياته وتربيته بس ياترى كم سوسو بكل مواقع التواصل الاجتماعي وراها شاب ..!؟
انتهت قصة صاحبي وانتهى العشا معه واعترف اني انصدمت باللي عرفته عن هالعالم المجهول كليا بالنسبه لي ..
طابت مساءاتكم ..

انتهى ... بقلمي
اخوكم / رايق البال

[اسطورة لن تتكرر]

هلا بالجميع ...
نلتقي مرة اخرى وقصه يغلب عليها طابع الفانتازيا كما يطلق على مثل هذه النوعيه من القصص ربما ..
القصه عباره عن حلم لأحدهم زار مخيلته ذات ليله ..
قبل يومين مر هذا الحلم به وهو نايم حيث حلم بأن هناك مشروع كبير سوف يتم اقامته عن قريب ..
هالمشروع راح يمر على عدة بيوت واماكن لأخوه واخوات يعرفهم ..
ولأنه تم تعيينه مدير لهالمشروع قال في نفسه ليش ما اجمع كل الاخوه والاخوات اللي اعرفهم واعطيهم بعض النصايح عشان تكون استفادتهم اكثر من هالخير اللي جاي بسبب هالمشروع ..
قام ورسل لكل الاخوه والاخوات اللي يعرفهم رسايل بأنه راح يجتمع معهم للأهميه وحدد لكل فريق يوم معين بحيث يكون الاحد الساعه 9 صباحا مع فريق الشباب اللي يعرفهم ولمدة ساعه ويوم الاثنين الساعه 9 صباحا مع فريق الاخوات اللي يعرفهن ولمدة ساعتين لأنه عارف استحاله يقدر يخلص لو كانت المده ساعه وزين بعد تكفيهن ساعتين من لعيانهن هههههه ..
مكان الاجتماع عباره عن مسرح صغير يتوسطه كرسي وطبعا قدام المسرح كراسي وطاولات عشان يجلسوا عليها الاشخاص ..

( الاسماء اللي سيتم ذكرها ليست حقيقيه وانما مستعاره )

الاحد ( الساعه 9 صباحا )
وصل للموقع على 8 ونص تقريبا ..
شوي وبدوا الشباب يوصلوا واكتمل العدد على 9 وربع ..
هو : هلا شباب .. شخباركم ؟
الجميع : الحمد لله وانت كيفك يالذيب ؟
هو : الحمد لله ههههه .. جمعتكم اليوم عشان اخبركم بأنه فيه مشروع كبير راح يمر على بيوتكم وقلت فنفسي دام اني مدير المشروع راح انصحكم شوو تسووا عشان تكون استفادتكم اكثر ..
الجميع : تسلم والله ماقصرت
احمد : بصراحه فعلت خير .. نعم اني مفلس وادور البيسه دواره هههههه
عبد الكريم : عيل جتك الهبششه احمدووه هههههه
صلاح : يالله اني نعم ودي اسافر اغير جوو ياخي وزين بتجي هالهبشه عشان نكشح مع الشباب شوي نسافر صوب ذيك الديار ..
سالم : نعم انها جت بوقتها شباب ههههه الشيمه بسرعه ابدأ اجتماعك ورانا اشغال يالحبيب ..
هو : الموضوع عباره عن ...... عشان كذي لازم تسووا ..... عشان تكون الفائده اكثر من هالخير اللي جاي عندكم هههههه
الجميع : تم ولايهمك اعتمد
انتهى الاجتماع بعد نص ساعه تقريبا وقبل نهاية الموعد المحدد بربع ساعه ..

الاثنين ( 9 صباحا )
وصل للموقع على 8 ونص ..
الساعه 9:15 وصلن هنادي وريم وابتسام
الساعه 9:30 وصلت ندى
الساعه 9:37 وصلن اسراء وشجن وعبير
الساعه 9:45 وصلت منال
الساعه 10 وصلت رحاب
اكتمل العدد على الساعه 10 ونص ..
رحب فيهن وقال : هلا بالاخوات .. كيفكن ؟
هنادي : الحمد لله وانت كيفك؟ الشيمه خلص اجتماعك بسرعه نبا نروح للخياط نفصل للعيد وورانا بعد طبخ وتنظيف بيت واشغال وايد ..
رحاب : صح والله .. زين ذكرتيني بالخياط هنووّده كانت ناسيه والله ..
هنادي : واجبنا حبيبتي فديتك انا هههه صح منووله خلاص جهزتي ملابس العيد ؟
منال : لا جهزت ولاشي تعبت من كثر ما ألفّ على هالخياطين ولا واحد فيهم وافق اونه ماما كلاس واجييييد زهمه كله حرمه يجيب ملابس منشان انا ..
رحاب : مافيهم خير اعرفهم .. بفلوسنا بعد ويذلونا
هنادي : صدقتي والله حبي نعم بفلوسنا ويذلونا بعدهم ..
هو بكل هدوء وسعة بال : خلصتن لعيانكن عشان ابدأ ولا لأ ؟
عبير : حشى بياكلنا اكل نعم هفففف مامدانا نتكلم كلمتين ..!
اسراء : صح والله مامدانا نتكلم كلمتين .. وانته شو كاظنك ها ؟ خليك ريلكس الدنيا ترا ماطايره ..
شجن : ولاسياره بعد ولا سفينه هههههه حلووه صح بنات ؟
الجميع : حلوووه موووت شجووونه هههههه خلاص بنسكت ابدأ عن تقول بعد احنا سبب تأخيرك ..
هو : انا شو اللي وهجني بس فيكن واطلبكن للإجتماع ههههه المهم الموضوع عباره عن مشروع كبير راح يمر بيوت كل اللي طلبتهم وطلبتهن لهالاجتماع ..
ولأني مدير هالمشروع وعارف خوافيه قلت فنفسي اخبركم شوو تسووا بالضبط عشان تستفيدوا بشكل اكبر من هالخير اللي جاي لكم على الاقل تذكروني بالخير هههههه..
سعاد : تسلم والله ماقصرت جزاك الله خير
ندى : يبالك بعد ماتخبرنا رغم كل هالعشره اللي بينا هذا اللي ناقص بعد ..! اصلا غصبا عليك تخبرنا
ريم : نعم انه غصبا عليك مو بكيفك ههههه ولا تبانا يعني نعصب عليك ونحرمك من الميراث يبو كشه ؟
هدى : اقولكن بنات كيف صالون ..... معاملته ؟ ياخي الصالون اللي اتعامل معه وايد رفع اسعاره الحين كنه من زين شغلهم عاد ..!
جمانه : على طاري الصالون بنات بعلمكن حركه ههههه كنت لما اروح انقش حنا بالصالون وايد اجلس انتظر دوري رغم اني احيان اوصل من وقت والاحظ بنات يوصلن بعدي ويتقدمن ولما حد من البنات يحتج تقولهن راعية الصالون هذي اونه حاجزه من امس ..!
ندى : صح وايد نشوف هالحركه .. وبعدين ؟ كملي حبي
جمانه : مره وانا احاسبها زدتها ريالين وقلت لها هالمبلغ هديه مني وياربي كيف فرحت ههههه عاد الحين تقابلني بذيك الابتسامه الحلوه لما اروح بأي وقت وتخليني قبل اللي واصلات قبلي ولما حد فيهن يحتج تقولهن هذي حاجزه من امس ..! شفتن كيف الحركه هههههه
الجميع : واااي منها التوووبه ياربي نعم .. مشكوره حبي فعلتي خير بصراحه لما خبرتينا عن هالحركه الختيييره والفززييعه بعد هههههه ..
هو : حرام عليكن عاد اعطني فرصه شوي اتكلم واشرح عن الموضوع ..
ابتسام : وانته ليش ساكت ومن ماسكنك اصلا عن تتكلم ..!؟ ياربي نعم منك حشى شوي شوي علينا مب كذي ؟ خلاص بنسكت هات ماعندك يافتى من نيووز قصدي اخبار هههههه
هدى : والحين بالله عليك هذولا مالقوا غيرك انته يالمينون تمسك هالمشروع الكبير هههههه
شجن : صح والله مالقوا غيرك انت يعني هههههه
هو : الله ياخذ ابليسكن بس ههههه الموضوع يا اخوات عباره عن .......... ولازم تسووا كذا وكذا عشان تكون استفادتن اكثر .. فهمتن ؟
منال : واااي بنات جانا الخير وهذي زغرودة فرح كللللوووووششششش كلوووشششششش كللللوووششششششش ..
هدى : نعم انه جانا الخير الحمد لله كللللوووشششش ههههه ذيك اليوم كنت ماره السوق وشفت عقد يالله كيف طاحت عيني فيه للحين اشوفه قدامي والله وكلما تذكرته احس قلبي يعورني ..
منال : موتك الذهب انتي نعرفك ترا هههههه
هدى : عينك ام العصاقيل
ابتسام : شوف من الحين اقولك .. انا ارضي اباها من فوق واااايد واسعه ومن الوسط ضيقه شوي ومن تحت عريضه واااايد ..
هو : هذا فستان ولا دراعه ابتسام هههههه
ابتسام : عينك .. ينكت بعده ههههه
عبير : وانا ارضي اباها تطل على الوادي واااااي المنظر راح يكون رهيييب وخوووراافي لما الوادي ينزل ..
نجوى : ياااه نفسي اسافر فرنسا بنات
هو : ان شاء الله الخير راح يعم الكل
سعاد : بنات خلاص دام فهمنا كل شي بنروح ورانا اشغال وعاد الساعه 12 ونص وبعدنا ماطبخنا ..
رحاب : ماتنلامي ترا ريلك عصبي نعرفه ههههه
سعاد : عصبي عينك ام عقصين
عبير : فديت ريلي انا اللي بس لو اقوله تعبانه على طول يقول لي لاتطبخي بجيب اكل من المطعم لي ولك ..
ابتسام : عيل يارب يتزوج عليك عشان تحسي يالدبه
عبير : فال الله ولا فالك ابتسامووووه ههههه
سعاد : اعذرنا ولد الحلال وايد ازعجناك وايد بس تدري بنات لاه ههههه وبكل امانه ماقصرت باللي خبرتنا به وجزاك الله الف خير ..
الجميع : صح والله اعذرنا وايد ربشنا وازعجناك ههههه بس انت عزيز وغالي والله واحنا بعد معك نفس الشي ولا ماكنت طلبتنا وفهمتنا شوو نسوي عشان نستفيد من هالمشروع الهام ..
انتهى الاجتماع على الساعه 1 ونص بعدما شكره الجميع واعتذرن منه على الربشه اللي سونها بالاجتماع ...
( انتهى )
بقلمي ...
اخوكم / رايق البال