رسلت قصيدة ليلة الأمس للشاعر علي الرسبي ووصلني رده قبل نصف ساعه تقريباً وكان في قمة الروعه

[فلك المعمري]

وجهت هذه الأبيات للشاعر المبدع علي الراسبي
وكان رده في قمة الروعه لكم القصيدتين مع بعض


راكب اللي ورده سوق الــــفـطـيـم
جيب لا لكزس ولا هو جيب شاص

ضارب اسويكه قبل وقت العـتـيـم
وتو نور الصبح من قهــوان بــــاص

موتـرٍ لا هــــو جــديـــد ولا قـديــم
صانعه مختص في صنعه اختصاص

البدي سلبــه وشـــكـلـه مـسـتـقـيـم
وزيته لا شيكت ما فــيـه انـتـقـاص

وصنعة الطبلون توحي شكل ثـيـم
ولا يعبى غير من بـنـــــزين خــاص

دقــــمــــتـه فالـ offوالـيـتـات ديم
وكل طعسٍ يرتــــبـص له ارتـبـاص

لا تبتخر ياخذ اوصاف الـــــدهـيـم
ولا غمزته تقول وسط الرمل غاص

وكلما بالصوت جر عبد الــكــريــــم
كني المطروح في ساحــة قـصـاص

قاصدٍ حلو الـــــتـرايب عـنـز ريـم
لو دروبه مبــعده مـبـعــد شـنـاص

ياعلي وانته الفهيم ابن الـفـهــيـم
توحي الناهم قبل نـــقـع الرصـاص

أحمد المعمري فلك


جاني الناهم على الطرق الحشيم
طرق بن لعبون له ذوق وخـواص

والقوافي ف البداية حرف مـيـم
والقوافي ف النـــهــايه اص اص

مرحبا يا أحمد ولك قلبن سليـم
تقنص الفكره من الفكر اقتـناص

لا تحاتي شاعر ن جــــرحه أليم
كل شاعر له من جروحه خلاص

صاحبي لى صار لك قلبن يـهـيم
شوم للغالي وخل عنك الرخاص

انتقي لك م التمر قيض القصيم
وانتقي لك م الثمر قيض الخلاص

ولو يصيبك بالجفا خــل ن لـئـيـم
لا مناص من التجافي لا مــنــاص

صاحبك سراي في الليل الــبهـيم
موتره نيسان عن دربــــه م لاص

موتر ن اشهب وفي فعله جحيم
يجعل الدنيا بــفـعـلـه اخـتـبـاص

كن فعله فعل شيطان ن رجــيـم
فرق الأحجار من بعد ارتــصـاص

شوم للي تعشقه شومة حشــيـم
واحشم الغالي ترى الحشمه خواص

علي الراسبي

[الشاعر محمد الشامسي]

ابدعتم ايها الشاعران الكبيران ،،واتقنتم المساجلة ايما اتقان

تقبلوا مرورى وتقديرى ،،

[رايق البال]

هلا فيك فلك ..
مساجله جدا رائعه وجميله واستمتعنا بها ايها العمالقه
الف شكر لجهدك وتفاعلك الجميل وصح لسانكم لاهنتوا
طابت مساءاتك ..
( طرح يستحق النجوم الخمس)

[حمد نجد]

قامتي شعر . صح لسانكم ودامت حروفكم

[Raba]

الله عليك شعر لذيذ الطعم
وفقكم الله وبارك الله فيكم