نهايات العشق دايم تقول ( انسيه )
وفعلاً كـان يـاما كان " كنّا احباب "
كثير اضحك وانا في داخلي ابكيه
تعب لان الحزن // ما يقبل الإعراب
و مات الحـلم يا ربي يا كيف ارثيه
من الجاني عليه و ماهي الأسباب
من اللي دايم "لغيري" وانا شاريه
من اللي لا زهمته (فص ملح وذاب)
-تحزم- لا زهمني والعسير اسريه
ليا نادى سريت ولا حسبت حساب
علي يحرم عطـاه و ماني ب راجيه
ليـا كان العطا منه . . بعده حساب
قهر لأني ؛ بديـت و ما عرفت انهيه
وظلم لأني ؛ اصيح وما يفيد عتـاب
و انا ذيك الهنوف اللي تسولف فيه
كتبت الشعر يوم ان الشعـر غـلاب
اهد الطير .. يوم ان البعض يشويه
اعسف القاف ، يوم ان الكثير يهاب
و فهمت اكثر من اللازم ! ولو يخفيه
صغيره حيل ؟ لكن لي عيون عقـاب
و الا يا جعل تفداني كثييير وجيـهه
خصوصا عاذلي و الشامت الكذاب
قهـر . . يومَه يقول ان القـدر حاديه
اناديه ب ولـَّه و اسمع صرير الباب
هويـت اليوم انا " مرّه قبل حـاليه "
وبضل اهواه دام ان المصير تـراب
ذبل عمري وانا اللي كم تعبت اسقيه
لاني بس عشقت اللي ( وُلِـد في آب )
وصلت اخر محطه في : دروب التيـه
وصار أقصى طموحي لو نعود اصحاب
