.........اسرج حصاني........
اسرج حصاني و عطني قوسي وسهمي
ما دام انا في فلاة العمر رحّالي
اصور العمر في شعري وفي رسمي
و عاداتي آسافر الايام بلحالي
اطارد الصيد في روض(ن) عقب وسمي
و اجاوب الورق في غصن الهوا العالي
و اساهر النجم ألين يذوب بي نجمي
و اعانق الشمس اذا شعاعها مالي
و اكتب على الغيمه اللي تستخيل اسمي
و ارسل غرامي مع النسمات للغالي
حبيبي اللي مثل وبل المطر يهمي
على خفوقي سحاب الود همّالي
حبّه بروحي و في نفسي و في دمي
هو بدر ليلي و هو في شمسي ظلالي
انا احمد الله غدا سيد العرب قسمي
من يوم شفته و انا طير السعد فالي
لو شمسها تجهر و لو ليلها يعمي
و لو طالت الدرب ما فكرت في حالي
اسوق رجلي و اقوي بالامل عزمي
و اكسر الشوك حتى الورد يصفى لي
رد مع اقتباس
