اذا اهداك الزهر مره فأنا اهديتك بساتينه=واذا ألهاك بفرح ليله فأنا تهت لبكاك سنين
واذا استضعفتك املاكه وشتتك ملاينه=انا حتى فتات الخبزه اقسمها معك نصين
طموحي بس اجي واظفر بشي تستحقينه=تدينته..تسلفته..سرقته.. مو مهم منين
كأني من كثر ما ارضى بكل اللي تمنينه=لو انك تطلبين الله يعنيني بقول آمين
انا ما العب على الحبلين وقت الطيش وسنينه=تبين اللحين يوم اني كبرت العب على الحبلين؟؟
ترى عند البدو بالذات عيب اللي تسوينه=حلاتك لاعشقتيني تعشقيني ليوم الدين
غرام نسكن ضلوعه حشيمه من مجانينه=جفا يجمع معزتنا ولا عشق يذل اثنين
كثار اللي تحدوني وقالولي تحبينه=امانه لاتخليني صغير في عينهم تكفين
لاني كل ما قالوا تخون قلت:مسكينه=عليك الله وامانه علميهم من المسكين؟
انا خايف الا طاح الجمل تكثر سكاكينه=وانا ما عادت ضلوعي تحمل طعنة السكين
مثل ما قالوا: المكتوب واضح من عناوينه=لو ارحل منك للغربه بسافر من ظلامك وين؟؟
كفايه كل حلمي مر في رقادي تزورينه=كفايه من تفارقنا وانا ما غمضت لي عين
قبل يومين شفتك في المنام وقمت من حينه=ونمت امس ورجع نفس المنام اللي قبل يومين
رد مع اقتباس
'
