. . . . (الله بلاني بها)!
؛
الضّيق يجْبر قصيدي.. و بـهْ يِكلّفنـي
و الهمّ جِمْلة هواجيسـي يصَخّرهـا
إن أقْبل اللّيل حرْفي مـا يساعفنـي
و إن أقْبل الصّبح .. قيفانـي أقصّرهـا
من سِبّة اللي ورا الاضْــلاع متلفنـي
لـه الحنايا انتحـت و الهــمّ جـابـرهـا
أصْـبر و صبْري مع التّقْـديـر يْنسفْنـي
و أقـاوي الجرْح .. و كْسوري أجَبّرْهـا
و أسْري معَ الّليل لين الصّبح يكْشفني
و أسرح مع الصبح..وعيوني أصبّرهـا
والدّمع يشْكي لخدّي عنْ قِسى جَفْنـي
و الكـمّ .. يلْعب بدمعاتـي و يقْـهـرهـا
أسايـر النّـاس و هـمـومـي تَلَحفّنـي
و بعض البشر ركّزت فيني خناجرهـا
قــوم ٍ تعـدّد ذنـوبـي قبْـل تَسْعفنـي
و تْــرِدّ عَنّـي .. و يسْبقـهــا تذمّرْهـا
و ان زاد في جيبي "الدّرهـم" تلقّفْنـي
معْ دِفّــة البــاب و البَسْمـه تِـزوّرْهـا
وان قلّ.. قفّت..و بالاحْرى تخالفْنـي
ومصعّــره خَـدّهـا .. و الله يَصْغــرهـا
الله بــلانـي بـهــا .. و الله يخْلِفـنـي
قــوم ٍ بدلهــا .. توسّرْنـي و أوسّرْهـا
ان ضاقت الارض بي.. و قامت تِطَرّفني
وايصيح بي الأوّلي فيها..الى آخرْهـا
أسوق رجلي لها..و بالشوق تخطفنـي
مـعــزّة فالبـسـيـطــه مــن يقـدّرْهـا
طلاّبـة الكايده .. بالعـزم تتحفـنـي
واتضيق بي دنيتي..و أرجع و أشاورها
في خوّة ٍ مثْلهـا ماشـيّ.. يضْعفنـي
زنْدي يصـدّ المصـاعب مــن ذخايرْهـا
نجم ٍ سرا فـي سماي..بنـور ينْصفنـي
و دروبـي الموحشه..بنـوره ينوّرهـا
يالله عساها ذخـر .. و إلهـا يصنّفنـي
مـا دام فـي غبّتـي تبحـر بـواخـرهـا
وفي ذمتي يوم ..تلفينـي و تشرفنـي
قلبي الحنايا من الفرْحـه يكسّرهـا
ايبشّ وجهي لها..و ضحْكي يغلّفنـي
و اهمومي امقفّيـه و الغـمّ دابرهـا
و ان كانه الضّيق بك يالشّعر كلّفنـي
يتْك القصايد و ضيقي في حناجرهـا
.
سيف آلمنصوريّ
