***
أحبك واشبه الجامح
لذا كان الصهيل : وسادتي
كانت عيونك : عادتي
والمثقلات من الغصون قلادتي
كانت !
اذا ماشابه المعنى : عيوني
عاذرك خوني !!!
ولكن لا تظنين القصايد بالوفا
خانت !
بلا ... د .. ي .. , اه لو تدرين :
عن طعم الثواني في غيابك
عن لهاث الضو في الشارع
عن الفارع
من الحزن الطري / عن دفتري /
عن جلسة المقهى بلا اصحاب !
عن الأشيا يقيدها ويطلقها (( الغريب ))
وبعدها يسال عن الأسباب !
عن عيوني تصير (( الرمث ))
ويصير السهر (( حطاب )) !!
عرفتي ليه انا المخطي وانا المعطي
وانا المطلوب والطلاب !
عرفتي ليه انا كل الحضور
ف حفلة عيونك وانا الغياب !!
عرفتي ليه انا الصادق
إلى حد الذي سميت به : كذاب !!
عرفتي ليه :
انا اكره دفتري واغليه ؟!
ليه اموته واحييه ؟!
ليه اثبته وانفيه ؟!
ليه اهدده واحميه ؟!
ليه اعطيه واستجديه ؟!
ليه اجلس في كلي خارجه
واجلس في كلي فيه ؟
ليه ابدا الحزن وانهيه
باسمك
او عرفتي ليه
انا ارمي لهجتي : للملح والفتنه
وارد الباب !!
***
وحدك تفتحين الباب
وحدك
تطلعين النورس الغافي على صدري :
سمك واعشاب !
***
ارتب لهجتي يا أجمل ضيوفي
واهيل قهوتي وتهيلين عتاب !
تصبين (( الدرايش )) في عيوني
و(( الرسايل )) و((الجدايل ))
و(( القبايل )) و (( القوايل ))
والكلام الحلو ... والاحباب !
واضمك
سالفة (( غوص )) قديم ف بحة
الشياب
أضمك .. شيطنة طفل
ان ضحك : يجمع من غيومك أرانب
وان بكى : ت .. ت .. ك .. س .. ر ..
الألعاب !
أضمك
حبل في (( حوش العشيش ))
و (( ضرتين )) !! وهفهفات ثياب !
أضمك: في الأغاني - لا ارتفع
صوت الاغاني
و (( الهوى .. غلاب )) !
أضمك داخلي يا داخلي
شنطة كتب فصل
وطباشير وشغب طلاب !!
أضمك صالة ضجت بجمهور غريب
وشاعر مرتاب !
وتروحين ويظل العطر
تروحين ويخون السطر
لا (( الجهراء )) تجمع رملها في
راحة يديني
ولا هذا هو (( المرقاب )) !
,,,,
نعيق غراب ... نعيق غراب
نعيق
أ .. غراب !!
من ماراق لى واتمناه يروق لكم
رد مع اقتباس