,_ ،، ياهاجسي مسموح،،_,
ياهاجسي مسموح واقول مسموح
العلـم غـايــه والمــواجه مواجه
مليت انا من كثر مـاجيه واروح
حاجه وارجع منه ماني بحاجه
تـاه الفـكر كيف الذي عنه ابـوح
الليـل في مســراه لونه وداجه
اشكي على نفسي ولا شفت مصلوح
تخطيط في راسي مضيع مزاجه
عامل يكالبني على النوح وانوح
قلبــي اثــاره للــجدل واحتجاجه
الرعـــد نـــاب البرق وحْمايم الدوح
تصدح صدى الاصوات والصوت ناجه
وانا على شط المحيطات منزوح
الصبــر من كثر الهتافات مـاجه
بعد الامل وش باقي الحال ممدوح
ماغير هم النفس فوق انزعاجــه
يكفي مافيني لا تزيديني اجروح
دامه حصــاد العمر هـذا نتاجه
حــظي على اللي كاتب الحظ باللوح
عـلا وعسـى والحظ يرفع حجاجه
على فراش الوعد قائم ومسدوح
والناس بفراح السعد وابتهاجه
عــزي لقلـبن للغلا دوم مفتوح
لو ماكسـرته مثل كسر الزجاجه
رد مع اقتباس