العمر وقفات...

**نورمان** · 29-09-2019, 04:54 PM

العمر وقفــات والدنيا دروس وعبر
والعاقل الي عرف الايام وحمولها

ردات الافعال للفاطن ترد الخبر
شف تجربه عمري فادتني وبفصولها

ان زل غالي فـ للغالي مكان وقدر
وان غاب صاحب فله عذرين ويقولها

والثالثه ثابته معاد فيها عذر
سلم على الي لا قال الحاجه يطولها

ان جاملوك القراب فخلهم واعتبر
وان اكرموك الكرام فعز مرسولها

ما رح تعرف خويك غير بعد السفر
وما كل ما يحتمل للصعبه ينولها

ان فادك الطيب ولا ما الك الا الصبر
انصى وجيه الحشام وجنب خبولها

حنا بشر بس دام الله خلقنا بشر
ما فيه نفسن ما هي تخطي ويبدو لها

له الثناء والفضل و الحمد له والشكر
بيبان رحمته مفتوحه على طولها

والي يخاف الهزيمه ما يجيب النصر
غامر على الكايده حتى تجي حولهـا

ومعرفت الاجواد كنز وكنز طول الدهر
والناس صنفين وكلن عارفن زولها

يا طيبن طاب فعله لين قد له ذكر
ولا ردين مع الرديان وذيولها

والي يسمى صقر ما هو بلازم صقر
احيانا الاسماء تأتي عكس مدلولها

اربح رفيع المعرفه وانتبه لا تخسر
من قال انا الي لها لا قيل من هو لها

وعشان تسلم من الزله وحكي القشر
ثمن حجم كل كلمه قبل لا تقولها

من جادل الجاهلين يضيع له في بحر
لا تخاطب الناس الا بمستوى عقولها

ثنتين خذها معك يا من يهمه الامر
وصا عليها الحكيم لطيب مفعولها

لا تمدح العود لين ينحط فوق الجمر
ولا تمدح الناس حتى تظهر فعولهـا

قصيدة لشاعر / حمد البريدي