السلام عليكم ورحمة الله وبركاته
بصراحة موضوع حلو وايد
ضحكت على مواقفكن
لازم كل واحد منا صار له مثل هالمواقف
انا بخبركم موقف ما راح انساه
انا مرة كنت رايحة بيت خالتي بمنطقة مجان
كنت رايحة اجلس كبديله لخالتي واراعي فبيت واهل بيت خالتي لانها كانت بمسقط مسوين لها عمليه
وعاد جلست اسبوع كامل
كنت احب منطقتهم بمساكنها وناديها الحلو وشوارعها اللي حتى بالليل تكون منورة كانها نهار ..
يعني كنت مستناسة حيل اني رايحة معهم ..
باليوم الثاني طلعنا نمشي انا والبنات العصر
والشباب راحوا النادي يعلبوا وما يرجعوا الا قبل المغرب
المهم انا كنت امشي وما انتبهت للشجرة صحراويه فيها ابر طويله وضربت برجلي فيها
ودخلت الشوكة في اصبع رجلي الكبير ..
وجلست ع الارض ابكي ما قدرت اتحرك
وبنات خالتي مساكين تعذبوا من كثر ما يتروجوني انهض علشان نروح البيت
وانا جالسة وابكي ..
لحد ما الله ارسل عيال خالتي جايين من النادي شافونا وجوا بالسيارة صوبنا
المهم حاولوا يلمسوا رجلي علشان يطلعوا الشوكة وما خليتهم من الالم
وساعدوني اركب بالسيارة
وروحنا البيت .. شافني زوج خالتي الله يرحمه
فديته ما قصر جاء يحاول يطلع الشوكة وانا ما قادرة اقول شي لاني استحي منه وايد
بس ما قدر يطلعها ... وقال خلوها بعدين بجيب مخدر وبحاول فيها مرة ثانيه
المهم جاب المخدر وحط ع رجلي وحاول من جديد وابدا لان الشوكه كانت طويله تقريبا سنتيمتر واحد ونص.. وكلها داخلة باصبعي وما ظاهر منها شيء..
وتركني قال يمكن مع الوقت تطلع صبري شوي
بعده جوا عيال خالتي مسوين فيها اطباء
يصبوا من هالمخدر ويحاولوا بالابرة وبالمنتاخ
وصارت رجلي فار تجارب لهم كل مرة يسولها شي
وبالاخير الالم زاد علي وايد ورجعت ابكي
هنا نط ولد خالتي قال قوموها معي بوديها العيادة
انا هنا خفت بس قلت يمكن تقدر تطلعها ورحت معه
وصلنا العيادة وظليت جالسه بالسيارة وهو يحاول فيني انزل وانا خايفة
بالاخير سالته شو بتسويلي الدكتورة
هنا نط عرق النذاله في ولد خالتي قال ابد ما بتسويلك شيء
غير انها بتقطع اصبع رجلك مثل ما تقطع البرتقال وبتطلع الشوكة وبترجع تخيطه لك
هنا انا زاغت روحي وحلفت ايامين مغلظة اني ما انزل
لما شافني كذا قال بنت الحلال نزلي بنشوفها شو تقول وانا ابدا ما مصدقه كلامه
وما رضيت انزل .. وهو قال عيل انا ما بتحرك من هنا لحد ما تشوفك الدكتورة
وراح يضرب جرس العيادة مرة ومرتين وثلاث
وبعد ما طفر قال شكلها طالعة ما موجودة
هنا صرت اضحك انا شماااته فيه
المهم بكذا رجعني البيت
وظليت مرة اتالم ومره احاول اطلعها بس ما قدرت
وما خليت اي احد يمس رجلي علشان ما ارجع اتالم وايد
لحد ما صار يوم الخميس خالتي رجعت بالسلامة من مسقط
ويوم الجمعه رجعني زوج خالتي بيت اهلي
واول ما نزلت وحطيت رجلي على ليوان البيت
حسيت ان رجلي بتنفجر بفعل ضغط جسمي على اصبعي وطلعت الشوكة مع الوسخ المتجمع فيها
وانتهت سالفة الشكوكة .. خربت علي الزيارة
ما استانست فيها نعم ...


لي عودة ان شااء الله
ودي وتقديري