قصه بقلمي / الكل انضرب .. الا انا ..!
رابط القصه بالارشيف

http://archive.omaniaa.co/showthread.php?t=693046


يسعد مساكم / صباحكم
هلا بالجميع ...

من جديد نلتقي وقصه كانت لي زمان ..
وانا بالثالث الإعدادي او التاسع مثلما الحين يقولوا وبصراحه مش مقتنع بسالفة هالمسميات التاسع والعاشر احسها غير لما تقول اول ثانوي وثاني ثانوي هههههه ..
المهم نرجع لموضوعنا ..
زمان وانا بالإعدايه العامه كان عندنا مدرس مصري ولازلت للحين اذكر اسمه وكان يدرسنا الرياضيات واسمه محمد طاهر ابوالسعود ..
هالمدرس عصبي وايد والكل يخاف منه وطبعا الرياضيات اظن الكل هالماده معقدتنه ههههه ..
كان هالمدرس كل يوم لما يدخل الصف يقول لنا : بكره تسميع جدول الضرب ..!! وبعدين يبدأيشرح الدرس .. وتجي بكره ويقول نفس العباره وبعدين يشرح درس اليوم ومن كثر ماكان يقول هذيك العباره وينسى .. تعودنا انه ماراح يسمّع لنا وخلاص قمنا مانحفظ جدول الضرب ...
لحد يوم من الايام .. اول ما دخل الصف قال وبكل ثقه : تسميع ياولاد اليوم للكل جدول الضرب ..
هو قال تسميع .. إلا والربع انصدموا واولهم انا .. اللي بلع ريقه من الخوف .. واللي عيونه طلعت.. واللي انتفض وحالته حاله ههههههه لأن الكل مش حافظ طبعا..
الفصل كان فيه اربعة صفوف وبكل صف 10 طلبه وكان عددنا ( 40 ) طالب ..
بدأ بالصف الاول ..وقام اول طالب وطبعا ماله داعي اتوقع اوضح شو كانت حالته ذيك الساعه هههههه .
سأله الاستاذ : 7× 8 = كام ياواد ؟
الطالب :7 ×8 ، 7 × 8 .. وقام يرددها ..
الأستاذ : آآه 7× 8.. ايه مش عارف ..!!؟ افتح ايدك ..طاخ . طيخ .. طووخ هههه انضرب الولد .. وانتقل الدور للي بعده ..
ونفس الشي من حيث السيناريو والاحداث هههههه . انتهى الصف الاول .. وبعده الثاني .. وبعده .. الثالث .. ووصل للرابع ..
والكل انضرب ..
انا كان مقعدي بالصف الرابع قبل الاخير .. وانا الاحظ الاستاذ بدأ يقرب كنت افكر وبسرعه اشلون اتخلص من هالموقف لأني راح انضرب يعني راح انضرب .. قمت وبسرعه انسدحت ع الطاوله ..
الاستاذ يقرب وانا قلبي يدق من الخوف لحد ماوصل عندي .. لازلت لحد الحين اتذكر طرف عصاه والله وهو يلكز بها كتفي ويقول : مالك ياواد ؟
رفعت راسي بصعوبه وانا انظر له بنصف عين وبديت اكح وانا اطلع الكلام بصعوبه وقلت له : استاذ مريض وايد ..حمى فيني وكحه ..!! سبحان الله مدري اشلون الله هداه وحنن قلبه هذاك المدرس وقال لي : مريض ولسه قاعد ..!!؟ قوم اطلع يابني وروح العياده بسرعه ...
هو قال كذا .. إلا وانا حسيت قشعريره بجسمي .. مدري فرحه.. مدري خوف..!!!
قمت من الكرسي بتثاقل وجلست اجمع كتبي بكل هدوء اعصاب وطبعا عيني بالارض مش قادر اطالع الشباب لأني اعرفهم بياكلوني ذيك الساعه هههههه ..
وانا اتحرك بين الطاولات عشان اطلع كنت اسمع همساتهم اللي ولا اروع طبعا ههههه ...
- مريض هااه ؟ انزين ماعليك
- بتشوف كيف بنسويبك ... خلي بس الحصه تخلص ..
- فجأه يتك حمى وكحه هااه ..!! جنابك على راسه ريشه انه ماينضرب .. بس دواك بعدين صبرك علينا بس ...
الخ من هالتعليقات اللي تشرح الخاطر وتفرح القلب هههههه ...
كل هذا وانا ساكت وكاتم ضحكتي مع اني ميت من الضحك والله بس مش قادر اضحك .. لأن لو ضحكت وانكشفت خطتي راح اروح فيها من الاستاذ والطلبه مره وحده .. طلعت وبسرعه قفزت من السور وركبت سيكلي وعلى اقرب دكان شريت عصير عشان ابرد على قلبي شوي بعد هذيك الوصله الساخنه من الخوف والتخطيط ههههه .
وصلت البيت وشفت الوالده والوالد - الله يرحمهم - واستغربوا اني راجع بدري ..
حكيت لهم القصه وقلت لهم .. والله ماراح اداوم يومين على الاقل .. عشان الشباب شوي يهدوا وتخف حدة غضبهم ولا بيضربوني ضرب من خاطر تراهم هههههههه ..
ولأني وحيد والدي - رحمهما الله - وافقوا ..
وفعلا بعد دوامي عقب يومين كانوا الشباب ناسين السالفه وانتهت القصه بسلام ولله الحمد ..
انتهى ..
اخوكم / رايق البال