صباح العيد والفرح ،،!

كل عام والكل بخير وعساكم من العايدين والفايزين



غايته 😋



للأمانة أول عيد يمر علينا ونحنا فرحانيين كذا وحاسين فيه إنه فعلاً عيد والله العظيم السنة بطططططل 💪

حتى ما دخلت السبلة ولاشي 😂😂

المهم الساعة 1 ونص بالليل غفيت لحد الفجر قمنا وصلينا وسمعنا تكبيرات العيد بقناة عمان وحطيت ميكب وعدسات أنا وأختي وجاهزين من وقت حصلت عيديات أكثر من كل مرة والله حماس ياخي بخليهن شي حق الحنا لاني ما تحنيت فالعيد بتحنا فالعرس 😍 وشي بخليه ح أكل المطاعم 😂😂😂😂

ليش أقول هذا العيد أحلى من كل مرة ترا كل عيد نحصل عيديات صح أنه هالمرة أكثر بس ما هو السبب اللي مفرحني ومفرح أبوي وأهله _!

السبب إنه أبوي وعمي متخاصمين من 6 سنين وكانت علاقتنا فيهم وايد يعني نبات بيتهم لما صغار ويباتوا بيتنا ونحنا وياهم يعني مرة كأنا خوان لكن بعدين تخاصموا وكل طرف ينقل سوالف ل هذا وهذا يزيد والبقية يعني عماتي حد إف فريقنا وحد فريق عمي إللي يقَول أبوي كلام ما قاله ولي يطمش واللي مخلي عمره ماله دخل ويحاول يبعد نفسه عن المشاكل واللي راز ويهه في النص والسالفة لا تخصه لا من بعيد ولا من قريب مشكلة صايرة بين اثنين وهذا الشخص مرتز بينهم ومخلي عمره محور الكون بس عشان يلفت الأنظار حوله ويزود بهارات على كيف كيفه ويشعل الفتنة بينهم زيادة بدل لا يهدي الوضع ويقول كلام غبي غير مرتب وتنكشف إنها كذابة وهذا أسخف ما رأت عيني !

عمي بادر بالمصالحة وأبوي صامد ولا راضي ينسى يقول اللي سواه ما شوية راح عند الشيخ ع أساس يحل الموضوع لكن أبوي قال إنه هوه يسلم عليه يعني ما مخاصمنه بس إنه يسولف معه وعادي ويدخل بيته هذا شي مرفوض !

بعدها راح عمي عند جدي كانوا مسوين عزيمة مجتمعين الرجال كلهم في بيت واحد منهم ، عشان يكلم أبوي يحضر عزيمتهم بس ما وافق .

عاد أمس أول يوم عيد الصباح الساعة 9 ونص دق الجرس ولا عمي وأولاده كلهم من أكبرهم لأصغرهم سلموا على أبوي وتكلموا مع بعض وتراضوا الجماعة وكيف كان شكل عمي وأبوي لما يسلموا على بعض 😢

بعدها الظهر اتصل رقم غريب على فون أمي وأمي كانت بالمطبخ تجهز البهارات هيه وأبوي ويلطخون اللحم سوالف ، عشان يدخلوه في التنور لإن معنا أول يوم صالونة لحم ناااار 🔥 ، كلها بهارات العيد والصبح قلية ، أما اليوم الثاني ف يسوون الشواء والثالث الخل ودوا الخل يضيفوه في الشوا ، ويطلع طرطريشن المهم لان أمي مشغولة ويديها كلها أشياءات أنا ما رديت ع الرقم لإنه غريب لكن دق مرة ثانية ورديت كلمتني حرمة وقالت عيدك مبارك وأيامك سعيدة ورديت عليها وبعدها قالت تبا تكلم أمي روحت المطبخ خليت الفون ع أذون أمي وكلمتها وسكرت وخبرتنا إنه هذه زوجة عمي وبناتها يباركون بالعيد ، قام أبوي وغسل ايدينه واتصل على عمي وعزمه على الشوا اليوم ، هوه وأولاده وبناته وزوجته وقالوا تم ، وبعدها اتصل أبوي على عمي الثاني بس عزمه بروحه بدون طائفته لان البيت ما يكفي وجدي وحبوتي كل عيد الشوا يحضرون ف بيتنا لانهم ما يذبحون في عيد الفطر بس فالأضحى لان يطلعون الأضحية .

وتراضوا الجماعة وافتكينا من القيل والقال وانتهى شغل المناقر وإنه كل واحد يحاول يقهر الثاني أو يستفزه وأنا ما أقصد الرجال حاشاهم على هالحركات قسم بالله الحريم يتفنن ف الإستفزاز فن والوقاحة متعلماتنها ع أصول وهذا اللي شفته في عمتي حتى يوم نتلاقى في عرس بحكم إنا عايلة وحدة و نحضر ف نفس الأماكن تبدع ف الحركات وكنها مريضة بالأوفر اللي تسويه واللي تحاول تلفت أنظار الناس فيها مع إنه مالها دخل في السالفة مثل ما قلت قبل لا من بعيد ولا من قريب !!!

عاد اليوم بلبس عدساتي وبتمكيج من خاطر وبتبخر واتعطر وبستوي اوفر بس بحاول ما أخربط بوجهي وايد عشان بنات عمي ينقهروا مني قصدي أنه شسمه أكون أنا وأختي أحلا منهن 😉



في أحلا من كذا 😍😍😍 بقول قصة هذه الصورة من خلف الكواليس أنا رحت ورتبتها وصورتها وخليت ف السناب والواتس وكتبت أمي + أبوي عسى الله لا يحرمني منكم عادي دعاء ، ولكن من جانب آخر هذا البوكس قديم عندي ف الكبت من زمان رحت وخذيت العيدية اللي أبوي ساحبنها من البنك بس عشان أصور صورة حليوة وأتفشخر جدام صديقاتي لان كل وحدة لما تشوف سنابها تقول هنا الدنيا وآخر شي الحالة مثلي المهم صورت الهاذا عيدية أبوي والورد وكذاك

حصلت عيدية محترمة هالعيد عسا دوم يقرقشوا مخابيهم كذا مشتهية ماكدونالدز 😿



حبيبتي وأنتي بخير وعافية وعساك من عواده وكل عام عام وأنت سعيدة وعلى خطى النور تمشين والله يوفقك دنيا وآخره ❤

الساعة : 26 :7 صباحاً
الثلاثاء 27 / 6 / 2017 ، 2 / شوال