سلادوان افيري ون ..
سلادوان تعني القاء التحية باللغة الاسبانية ..
Saludando

بما اننا نعاني من صعوبة في الفهم بالعربي وحسن الظن بالعربي .. قررت ان اتعلم لغة جديده !
عموما ..


عندي تقريبا حسابات بأغلب البرامج الاجتماعية .. انا من الفئه الغير ضاله اذا ..!
مره من المرات حسيت اني بطله ووحشه ورهيبه وفتحت سناب علشان اصور اخر ما توصلت له من اكتشافات وعلم ..
علشان اكون صادقه .. كنت احب اشارك الناس فكرة ان النوتلا مع الجبن وخبز اسمر مقصوص الحواف فكره جيده و وجبة لذيذه.!
وكنت حابة ابين مدى استفادتي من بطاقة الدعم يوم اني اروح اعبي بترول .. لأن بفضلها انا اوفر واجد واشتري لكلبي اكل صحي ويخليه كلب قوي وسعيد .
بس فيني شيء ما تقبل الهراء للى هناك.. طبعا مع عدم احترامي للأشخاص للى يطلعوا في الاكسبلور طبعا .. وألغيت الفكرة بسبب موقف








بس روح المشاركه تحارب وتكافح للظهور .. فقلت ماشي غير الانستجرام .. ويعني حسيت شوية بنتماء لأن فيها صفحات زينه يعني تخليني شويه اضحك
وتخليني اتعلم واجد اشياء ما زينه .. فتحت الحساب بس للأسف ما نزلت حتي صورة سكان السيارة مع اغنية ولا يدي الطاهره مع سوارة ذهب قيراط مليون ..

المهم واستمرت الحياه وماعرف وش للى خلاني اريد افتح صفحه اقدر اهذر بيها على كيفي .. واتكلم بشفافية عن صعوبة العيش في مجتمع العيش ..
و عن معاناتي كل يوم في اختيار لون مناسب لخصلات شعري ..




وبداعي الظرافة قررنا نكون كيوت .





وطبعا بهذي المناسبة قررت اذكر نفسي ان السوشل ميديا عالم بايخ وسخيف و هو مصنع صنع النقص . لأن الكل قام يدور على احد يصفق له او يرسل له قلب ما منفلق .
ما اقول كذاك لأن امس كان عيدميلادي عباره ومحد عمل في الحاله كل عام ونتي بخير عيوني .. لا ما كذاك
بس اقول كذاك لأنه صاير اوفر غريب ! - وترى عادي نعترف انه كذاك وما نأخذ الموضوع بشكل شخصي -

كنت واجد مرتاحه في رمضان لأني قدرت اقنع كرشي واتفق معه اننا ناكل وجبه وحده
وفرت واجد وحسيت اني صرت ايلون ماسك .. مع الحكمه طبعا
الزبده وخلص رمضان والعيد جانا .. في كفة .. اكتشفت اني ما اكل واجد



وفي كفة اخرى عرفت اني احتاج الحين اشتري اشياء واجد ..





والخيارات هنا تقول :
1)اما اطش كارفور للى ما احبه شخصيا لأني احسه مال غريبين الاطوار
..2) السلطان للى متسلطن على ألبي واحب اتسوق هناك بس لولا الشعور النادر المسمى بـ الاستكاود ولولا اني مستكاوده كان رحت ..
وبقى عندي اللولو .. لعنت النظام الرأسمالي من دون قصد و رحت اشتري قهوه واشياء خاصه اخرى .. وانا طبعي مسالم وهادي وما اجيب الاعيادي ..
كنت ادور ع ملطف جو متعدد الاستخدامات وطلع موجود في اخر رف وما حسيت اني اطوله ..

هنا عرفت سر الكعب وليش ما احب اللبسه كثير -من دون تكرمون لأن الكعب مجرد نعال- حاولت اطوله وبقدرة قادر قدرت بس طاحن واجد اشياء معرف كيف .. وفي اثناء تواجدي بتلك المعركة المؤذيه والخطيره كانت هناك اعين تتربص بي وكما يقال اذا طاح الجمل كثرت سكاكينة .. ولا وش بالضبط ما اذكر. المهم فيه حكمه بالموضوع والحكيم رح يستوعبها بالفطره .. ألا اذا كانت فطرته ما سليمة .



المهم ان فيه وحده ماعرف وش فيها ! كانت تخزني يمكن لأنها اعجبت بطريقة سقوط الاشياء عليي؟ .. تعرفون شعور لما احد يخزكم و تحسون احد يشوفكم ؟ ولما تلتفتون تلقوا صدق فيه حد جالس يشوف ؟
ايييوه كدا .. هذي علميآ يسمونها العين الثالة ..وما رح اتعمق بيها علشان انتقل للحدث المشوق من القصه وما احرق باقي المشاعر المترقبة ..

وصارت معركة خزخزه .. عاد فؤادي اعرف مو جالسه تهربت عني ..! - للحساسين المرهفين الطاهرين الفاضلين من كلمة تهربت .. ايوا المعنى نفس للى ببالكم-
بس انا ما شفت عليها ألا كذاك .. لأن صعب اشوف على حد ولما اشوف اكيد لي منه حاجه
لكن صار شيء غريب




للى يصدم الحين انها هذي هيه متاكده زهره ! للى تسكن هناك صوب العام*&^*ـرات ! للى جدهم متوفي من قبل شهرين ومنزلة صورة كفنه الله يرحمه .. ماعرفت وش الهدف بس الواضح انها تبي تترحم عليه
وللى معاها تبارك الرحمن شلة صغيرين عاد معرف ولادها خوتها معرف .. الله يحفظهم
وللى سيارتهم الجديده كامري موديل 2019 وتشتغل قرب معرف وين .. !!

متاكده هيه .. بس ليش انا اعرف كل هذي المعلومات للى ما منها فايده.. ؟
سخرية القدر تصير لما اكون انا عرفت عنها كل ذي المعلومات وهي ماتعرف مني غير وجهي الملائيكي وخطواتي الرقيقه ..
حسيتني بلحظه اني رهيبه.. بس استوعبت اني مصيبة ..
سارت هي بعدين صوب الخس .. وانا ع طول فتخت تلفوني اتأكد من هالحساب وطلع انها مسويه ستوري انها طالعه الولو .!




هي ماتعرفني لا من قريب ولا من بعيد . وحسابي ولا صورة ولا اسم ..
فقط احاول اشوف اخبار عمان و اثبت للعالم نظرية ان مسابقات الانستجرام كلها كذوب ..
وهذا هدف نبيل ياللي يشكك بأهدافي السامية.

قلبي عورني كثير .. وحسيت اني اريد ارتاح صدق .. شعور مزيج ما بين تشوش النظر و الحراره الداخليه
ولحسن الحظ اني لقيت كرسي قريبي ..

طبعا ما بسببها بس لأن للى عندهم امراض القلب تداهمهم اعراض غريبه احيانا ..

من بعدها ع طول دشيت حساب الانستجرام وحذفت حسابي .!
وحسيت بـ الهام اني اكتب عن سيرتي المجيده هنا .. لعل وعسى القى حكمه ؟ ..
يمكن شيء حكمه ؟ من يدري ..

والان وانا احتسى شاي اخضر بالياسمين ..
اتسائل .. عن الطفرة المعلوماتية للى تحدث وضرورة احداث شرارة وعي بين الافراد . !
بمعنى اخر ,, الناس حره فيما تفعل . تنزل صورة نعالهم الجديد الى الكروكي الخاص ببيتهم
والانسان على نفسه بصير . نحن لا نحتاج الى حفلة وعي ومحاضره عن كيف تعيش بسلام وامان ..
ولا عن اهمية تفعيل مبدأ الخصوصيه .. وانا مع مبدآ حرية التصرف وعدم التدخل بشؤون غيري ..
ولكن ولكن
للأسف مو كل النفوس تشبهني .. وتشبه نيتي الجميله !
بمعنى اخر ..
شو أسوا سيناريو كان ممكن انه يحصل لها ؟ ..
البعض يتعمد في حشر اصبعه بهشاشة غيره . .
وما ابالغ لما اقول انه فيه حالات ابتزاز و سرقات واشياء سوداويه تحدث بسبب نشر الخصوصيات بطريقة مبالغ فيها .. !

*نتائج وخيمة لمشاركة خصوصياتنا على مواقع التواصل الاجتماعي* قد لا يحسب كثيرون نتائج نشرهم لمعلومات عن حياتهم وتفاصيل يومياتهم في الفضاء الافتراضي المفتوح على العالم، معتقدين أنهم يقومون بعمل مسل لا يعود عليهم بأي سوء أو مشاكل، بل على العكس من ذلك تماما، لكن الأمر أخطر بكثير من مسألة تسلية، فهناك متربصون يرصدون كثيرا من الصفحات والحسابات على السوشل ميديا ويسجلون تفاصيل عنهم والتخطيط لارتكاب عمليات إجرامية ضدهم، فمن كان يظن أن عمليات اختطاف في أمريكا تحدث عقب تتبع لحسابات السوشل ميديا وعمليات اختلاس وسرقة واقتحام لبيوت باتت تتم من خلال عمليات رصد ليوميات تلك الحسابات.


والحياة مستمره . . .