البارحه
اصعب ليله ..!
احس الليل طويل من التعب اللي فيني
من الصباح لليل شغل " غسيل ملابس العيد وتنظيف وترتيب "
واخر الليل المكيف يدفع هواء ساخن ، تحس روحك تطلع من حرارته
ماشي حل الا اطلع من الغرفه واشوف لي مكان ثاني انام فيه
سحبت قواتي للمجلس وطبيعة الحال زمان محد دخله وشغل مكيف فيه ف المكان "ساخن"
انتظرت المكان يبرد لين قرب الفجر ، غمضت عيني شوي وصحيت احس رجلي " تثلجت"
غطيتها بس عاد ما قدرت انام من الوجع
صليت الفجر وحاولت انام ما قدرت الوجع يزيد ، احس بأي لحظه كنت بصيح
ف الاخير جبت " ليسو " ربطت فيه رجلي كأني وحده من العجايز بس هذا حل لتسكين الوجع "من تجارب اختي"
وجع الرجل دايما لما يصيبني اعرف انه نسبة الحديد واصله عندي للارض ..
بس ما يخلصني اروح الصحي بهالوضوع عشان اخذ حبوب ، لانه لازم فحص وغيره

اختي يوم السبت تنومت لمدة 3 ايام عندها الهيموجلوبين ناقص ، تقولي شفت ف المستشفى وحده من زميلاتك السابقات ف العمل امها متنومه
وسألتني وش فيك "فضول" لما قالت لها تقولها مثل اختك اول واجد تتعب ف الدوام ع دوخه وتعب ومره اغمى عليها ،
عاد لما اتصلت ف اختي اسأل عن احوالها تقول خبرتني عزة سالفتك لما اغمى عليك ، قلت لها ما قصرت
بس عادي متعوده هذا شي لابد منه ، كل حد يعرف