لايومي بيوم ولا ليلي بليل
ولا السعد مقبل ولا الهم زايل
ماغير ازم هموم واحط واشيل
ولاراح منها هم جاله بدايل
تدرون يالعربان وشهي البهاذيل
فرقى وليف وحظ مامن صمايل
الوصل نعمه والمفارق غرابيل
ياحظ ليتك تعتدل ماتمايل
لامن بغيت اعدلك ترجع تميل
كنك تقول اعيش واموت مايل
ياشيب عيني يوم روح وانا اخيل
دموعي وبل على الخد سايل
وانا اتصبر وازهم العقل والحيل
والقلب يشكي للضلوع النحايل
وانا اترفع واترك القال والقيل
واجبر عزى قلب على الموت ايل
اشب نار الشوق وارهي المعاميل
واريح اعصابي ببدع المثايل
ولا الغلا ماعاد يحتاج تفصيل
لنه موريني نجوم القوايل
ياللي غيابك حط بالقلب تنكيل
ويلي على قربك ولاني بطايل
لاغاب صوتك ماتفيد المراسيل
وفر على الجوال كثر الرسايل
والله لو تاخذ لدمي تحاليل
تلقاك بالجينات صايل وجايل
حبك تعدى حب الاكراد لاربيل
الا تعدى حب شمر لحايل
صبيت حبك مثل صب الفناجيل
وين الجليله تشرب اشواق وايل
وانته تواعدني من اسهيل لسهيل
والشوق في قلبي مسوي عمايل
ليتك تبادلني الغلا والمواصيل
وترد لي بعض الوفا والجمايل
تعبت انا من ظروفى والعراقيل
وتعبت من قولة ياقل الوسايل
لاقلت انا احبك ومشتاق بالحيل
تقول لي جعل العوض فالموبايل
يعني انا وياك مثل المهابيل
واشباهنا فالوقت هذا قلايل
كذاب من قال المحبه تساهيل
راحو ضحيتها عيال الحمايل
