اخيرا ابو سالم اخو ابراهيم تكلم وقالي ياريم لما انتقلتوا انتي وابراهيم من بيتكم سالت ابراهيم عن السبب انتقالكم هل انتي تعرفين السبب قلت لا انا ما اعرف حتى امك حاولت فيه ومارضى يتكلم وما رضى يقولي ليش منعنا من زيارتكم وزيارة اهلي
ابو سالم ريم انا جاي اعطيج اجابات هالاساله كلها ..
انا استغربت وش بيقولون صار الدم يغلي فيني وش اللي صاير
ابو سالم نزل راسه في الارض وبدا يسرد عليي الحكايه
قال انه سال ابراهيم مره كانوا سهرانين مع بعض بعد اسبوع من انتقالنا للمنطقه اللي فيها عملهم باثنيهم وانه ابراهيم اصر على السكوت بس ابو سالم قاله انه بتوصل بينا للقطيعه لو ما خبرتني وش القصه ابرااهيم انهار وصار يبكي وابو سالم اصر اكثر انه يعرف سبب الحاله اللي صار اليها ابراهيم وابراهيم اعترف لابو سالم انه هو مريض بالايدز ....
وانه اكتشف هذا المرض يوم حادث اخوي بالمستشفى لما راح يتبرع بدم وانه سافر وفحص واكدوله اصابته وبعدين سفرنا واتاكد انه انا وامل مصابات
يعني ابراهيم مصاب بالايدز من قبل انا احمل بامل
يعني قبل زواجنا واااااااااااااه من حكم القدر علينا
صرت ابكي بصمت احتراما صرت اصرخ بصمت احتراما لعشرتي مع ابراهيم
صرت ما اعرف وش اقول انشل لساني عن الحركه
ابو سالم واخوي ينتظرون تعليقي لانه اخوي عنده خبر بالموضوع من ابو سالم قبل يخبروني واتفقوا انهم يواجهوني عشان بو سالم ينفذ وصية ابراهيم
ابراهيم في اليوم اللي اعترف فيه لبو سالم بالخبر قال لابو سالم اذا انا متت قبل ريم وامل ارجوك اتكفل بعلاجهم هم عندهم خير كثير بس وش يفيدهم بدون الصحه ساعد ريم عشان تتخطى هذي المحنه وابو سالم وعده انه بيساعدنا كلنا ان شالله
لكن ابراهيم خذاه الموت وارتاح من متاعب الدنيا ....
بو سالم يكللمني وانا في عالم ثاني صور مرضى الايدز والاورام هذي كلها اتخيلها في جسمي وجسم بنتي
كنت ابكي ودموعي تتكلم بدل عني واقول لا لا بس هذي الحرف اللي قدرت اطلعه
والله المستعان من حضرة ابليس اللعين اللي خلاين اقول اشيا عن ابراهيم في قلبي استغفر الله عليها ليل نهار فهذا ابتلاء من ربي ولازم اصبر
المهم ابو سالم فهم من كلماتي بعدين اني انا اعرف فقالي كيف عرفتي وخبرته عن موضوع الرساله اللي لقيتها فقالولي كفايه بكا بكيتي كثير ولازم نفكر بطريقه عمليه لنبدا العلاج وبطريقه سريه عشان تعيشون حياه طبيبعيه بين البشر ..
واي حياه طبيعيه نعيشها وحنا نحمل هالفايروس بدمنا
الحمد لله على كل شي
اخوي قرر ان يسفرني انا وبنتي عشان نتاكد ونشوف شو انسب علاج ونحاول نتحرك بسرعه عشان نعرف مدى خطورته على وعلى بنتي وكيفية الوقايه منه بالنسبه للناس اللي نعيش معهم عشان ما تصير المصيبه مصائب ومعاه حق ...
تكفل ابو سالم بكامل مصاريف العلاج لانه المحكمه باعها طويل في حصر ممتلكات ابراهيم وبعدها اجراءات ماشيه
راح ابو سالم وجلست مع اخوي بالمجلس وقلت له الحين عرفت ليش امنعكم تشلون امل وتبوسونها كنت شاكه وخايفه عليكم منها عرفتوا ليش ما اكل معاكم في صحن واحد هذا السبب..
عرفتوا ياخوي اني صرت انفر من نفسي فشو شعوركم انتو اكيد الكل بينفر مني اخوي صار يترجاني ويبكي ويقولي ريم ارجوكي بوقف معك لاخر لحضه حتى لو اعديتيني انتي وامل بالمرض مو مهم اذا كنت بكون قريب منكم
لا ياخوي انا ما اتمنالك هالشي وانته في ذمتك زوجه وعيال والله ما اتمنى هذا الشي لاي زوجه بالدنيا
الله يخليك لهم ويخليهم لك ويعافيك من البلا اللي نحن فيه ...
خبرته عن كل شي قريته في النترنت عن الايدز وقالي من اليوم ايدي في ايدك لاخر لحضه في حياتي ...الحمد لله
حصلت ناس ثانيين يشيلون معي الهم ويتقاسمونه معاي
ما اخبي حسيت بارتياح بعد ما اعرف اخوي بالموضوع وحسيت بجديته في مساعدتي والحمد لله نعمة الاخوان ما تتعوض في الدنيا


قررنا نسافر واخوي قرر موعد السفر والله سهل علينا الحمد لله
بقى كيف نخبرهم في البيت انا مسافرين وشو بنبرر لهم سبب سفرنا
طيب بنقنع البيت كله باي شي بس زوجة اخوي شو بنقولها عشان تسكت وتصدق وليش ما خذيناها معانا
قلنا الخبر في البيت انا نحن مسافرين على اساس اخوي قال انه بيخليني اغير جو ويا امل وكلها اسبوع وراجعين الكل رحب بالفكره بس زوجة اخوي اصرت تعرف ليش نحن مسافرين المهم سافرنا والكل كان يعتقد انه مسافرين نتمشى ما يدرون اني كنت اخلي رجلي على طريق العذاب واني رايحه ازيد همومي هموم واللي مثلي انا يصيرلها تعيش مرتاحه؟؟؟
الحمد لله على كل شي
سافرنا وصلنا البلد اللي قصدناه وحبينا نتخلص بسرعه من الفحوصات والذي منه وسويناها على يومين واليوم الثالث طلعت النتايج وطبعا مثل ما هيه انا وامل حاملات للمرض وانه لازم نبدي بالعلاج ومكافحة هذا الفايروس اللعين ....
وتم تحويلي للعياده المختصه وهناك وجدت الكثيييير عرب وغير عرب
جلست بقرب فتاه في عمر الزهور متحجبه وتمسك المسبحه في يديها واسمع لصوت تسبيحها وانا جالسه بقربها
سبحان الله العظيم سبحان الله وبحمده ترددها بلا انقطاع حتى اصبحتت ارددها في قلبي
شويه وجلست تلاعب امل وامل تضحك لها حتى امل صارت تصدر صوت وتضحك وهيه مستمره في ملاعبتها تذكرت انه مر وقت طويييييييييييييييييييييل جدا ما جلست قدام امل الاعبها واضحكها
من هول ما ممرت به مصيبه تلحقها مصيبه نسيت كيف الناس تضحك وتبتسم وجلست افكر وبينما انا في دوامةة تفكيري شفت وحده ثانيه امراه يمكن هيه في عمر الثلاثينات تقريبا دخلت وسلمت على البنت اللي كانت تلاعب امل وجلسن يسولفن ويرمسن خليجي ويضحكن وعرفت من كلامهن هن من أي دوله خليجيه ... بصراحه حسدتهن على السعاده اللي يعيشنها سالت دمعه من عيني ترثي حالي لحالي وفجاه حست انهن يتوجهن بسؤالهن ناحيتي من وين انتو رديت علهيا وخبرتها وقالت ونعم بكم ونحن من البللد الفلاني وجايني هنا نتعالج
لانه نحن حملة ماجستير وجلسن يضحكن وانا مو فاهمه شي وحسن اني ما فهمت وسالني عن سبب وجودي في العياده ما عرفت وش اقول قالن عادي كل مرتادين هذي العياده مرضى ايدز بس من المريض انتي او بنتج؟؟
بكيت انا وبنتي مريضات سكوت للحضه اخوي قطعه يقولي يله تعالي ورحت قالو ننتظرك هنا ياختي لو ممكن وما تمانعين
قلت ان شالله
دخلت وشاف الدكتور الفحوصات والتحاليل وخبرنا عن خط سير العلاج كيف بيكون والمواعيد كيف بتكون بعد ما شرحلنا كل شي عن الايدز وكيف نتعامل معاه ونتعامل مع غيرنا من الناس الغير مصابين ومسبباته وانتقاله وغيره من الامور هذي كان المترجم طبعا يترجم لنا وطلعت من العياده حامله معي امل بنتي وامل جديد حسيته في كلام الدكتور عن تطور الطب وتطور التعامل مع هذا المرض لقيت الاخوات الله يذكرهم بالخير وجلست لحد ما اخوي يروح يكمل باقي اجراءات الملف واستلام الادويه واتعرفنا على بعض اتضح انهم حملة ماجستير في الايد ز
يعني يعانون من الايدز منذ اكثر من ست سنوات ويعيشون حياتهم عادي وطبيعيه متوكلين على الله وياخذون العلاج وسردولي معناه تدمي القلب لكن في النهايه الاستسلام والخضوع هم السبيل الوحيد
وقالولي احمدي الله مليون مره انتي شفتي ذريتج في الارض بس غيرج محروم حتى من هذا الشي
يعني انتي افضل من غيرك بكثير
الله يذكرهم بالخير الى الان علاقتي معهم لم تنقطع وكل ما احس ب1ضيق من حياتي اتصل عليهم افضفض ما اعاني منه
عشت معهم ايام السفر وتعرف اخوي على زوج احداهن مريض ايضا بالايدز وبينهم علاقه طيبه وقامو بزيارتنا من مده ليس بالطويله
ناس احس معهم كاني مع اهلي
وللاسف اهلي اححس بينهم كاني غريبه
رجعت من السفر بعد اسبوع تقريبا و اهلي ليس لديهم علم
رجعت الحمد لله وقد تحسن حالي ووضعي قليلا
فقد فهمت المرض جيدا وتثقفت فيه من كلام الدكتور اكثر
ولكن تبقى ماساتي ككيف اخبر من اعيش معهم لانهم عاجلا ام اجلا سوف يعلمون
المهم عندما وصلنا الي البيت الكل طلع يستقبلنا ويسلم عليا ويحب امل ما عدا زوجت اخوي أحمد (الي رايح معي الرحله) كانت في غرفتها هي وعيالها

حتى احمد سال وين رقيه (زوجته) قالت امي في غرفتها
رحت انا و امل غرفتي وتركتهم لاني تعبانه من السفر
لما طلعت العصر من الغرفه لا واشوف رقيه في ممر الغرف تمشي فسلمت عليها وما ردت السلام
وطبيعتي اطنش أي شي ما يعجبني
رحت اجلس مع امي في الصاله وهناك اعيالها مديت ايدي اسلم عليهم
فرحان فيها جت امه وصارت تنظف ايد ولدها وكانه لمس شي وسخ
استغفر الله
قامت رقيه تصرخ في اعيالها تقولهم بسرعه علي غرفتكم ولا طلعون الي ما اقولكم
أمي استغرب من تصرف رقيه وتقولها ليش انتي كذا
قالت حال أمي انتي ولا تدري عن شي وراحت غرفتها
امي قالت هذه المخلوقه تغيرت من يوم انتم مسافرين كله تذمر وكله تصارخ ما اعرف قلت يمكن غيرانة من سفرتكم يمكن كانت تبي تروح
واحمد ما خلاها
قلت الله يهديها
ويستر علينا
طلعت وانا مكسوره بس ليش هيه تتصرف كذا ...معقوله تكون تعرف ؟؟؟
وكيف؟؟؟
اتصلت باخوي عشان اساله قال شي لحرمته
طبعا سكت فتره وقالي انا خبرتها لانها اصرت تعرف سبب سفرنا بس هيه حلفت ما تقوله جدام احد انصدمت ...
سكرت بدون أي كلمه لدرجة انه اخوي عاود يتصل وانا ما ارد
اخوي جاني بعدين واعتذرلي بس بعد شوووووووووو
اخوي انا ما مهم عندي زوجتك ولا زوجة اخوك يدرن ولا اخواني ولا خواتي ولا كل العالم
المهم
امي
امي الوحيده اللي تهمني وابوي انهم ما يدرون
ماريد اكون سبب في عذابهم
ارجوكم الموت ارحم لي من دمعه اشوفها في عين امي

ولكن في النهايه لازم تدري امي ويدري كل البيت بس كيف هذا يريدله وقت طوييييييييييل
وهنا تبدا معاناتي مع المجتمع وكل الذي مررت به في كفه واحساسي بنظرات الاحتقار من المجتمع في كفه اخرى
سوف اسرد لكم كيف عرفوا اهلي وكيف كانت ردة فعلهم في اقرب ممكن
علما باني خلال اسبوعين سوف اكون على موعد مع العلاج والتقيكم بعد اسبوعين على خير
استودعكم الله الذي لا تضيع ودائعه
ان عدت بخير فلنا لقاء في هذا الركن وانا استرد الله امانته فدعواتكم ان نجنمع في دار خلد يحيا بها الحنون مع الحنون
آآآآآآه يازمن قاسي واليم .. وآآآه من جرحي القديم ...شو اقول وشو ابوح ...انقش على بقايا جثتي صمت الجروح ...ونار الهم تلفحني لفوح ..حل القضا يارب وماني مستهين ...البلا منك محبه وراضيه يارب العالمين ... ارحمني وبنتي وكل مريض ..امين ..
توقفت قصتنا عند توتر علاقاتي في البيت مع رقيه زوجة اخي واهلي كلهم لا احد يعلم منهم غير احمد اخوي فقط
مضت ايام علينا كل يوم نمر فيه بموقف شكل مع رقيه وكل موقف كان يزيدني حيره وعذاب من امري وكنت مب خايفه من شي غير انه امي تعرف
لاني ما اريد اعذبها معي
بس امي بعد ماهي بذاك الغباء عشان ما تحس انه في شي في الموضوع وانها لازم تكون في الصوره وتعرف شو قاعد يصير في بيتها وماقادره تفسره
من مواقف رقيه معي انها ما كانت ترضى تاكل في صحون من المطبخ على اساس انا وبنتي ناكل فيهم فكانت تطلب لها اكل من برى واعتقد انه اخوي عجز منها وصارت علاقتهم متوتره كثير وكنت خايفه اكون سبب في هدم اسرة اخوي لذلك كنت اتجنبها على قدر المستطاع واقضي اليوم مقفله على نفسي في غرفتي مع بنتي اللي اقعد الاهيها والاعبها باي شي عشان ما تصيح وتريد تطلع عند اليهال براا...
دخلت علي امي في غرفتي وسالتني عن الادويه كلها اللي موجوده واللي اعطيها امل وانا اخذها ..بصراحه يومها ما عرفت ارد عليها وقتلها انا لما كنت مسافره مع احمد سوينا تشك اب وعطونا هالادويه عن دهون على الكبد وان اعرف امي مب متعلمه ولا تعرف شي عن انواع الادويه وهالاشيا
فصدقتني ..ومر الموقف بسلام ...
ومثل ما قتلكم قبل انهم لازم بيعرفون اجلا ام عاجلا
وفي يوم كنا نجلس بالصاله تحت وننتظر اخواني يرجعون من العمل عشان الغدا وطبعا انا وامي وخواتي ونسولف في امان الله ... جو عيال اخوي عيال رقيه يلعبون مع امل فنزلت رقيه وهيه تصرخ فيهم ومحد فاهم سبب صراخها الا انا
خذيت امل في حضني وما رديت عليها ... امي مستغربه مني ليش ما تردين عليها ...وطبعا دموعي عبرت عن جوابي وامي ماهي بفاهمه شي ... دخل اخوي بهاللحضات من الباب واول ماشافته امل راحت صوبه لانها تحبه وايد واكثر واحد يحبها ومتبرض لها .. حضنها وقعد يبوسها وصرخت رقيه فيه وقالت له اذا تريد تلمس هالجراثيم نحن مو مستعدين تعدينا وساخه
نحن مالنا ذنب في هذا كله
البيت كله صمت
احمد ترك امل وراح صوب رقيه وصفعها وانا اركض عليه واقوله دخيل الله ما تتهور احمد الله يخليك ...
احمد كان يقول خليني ادبها واعلمها من الوسخ في هالدنيا ومن المريض الحقيقي...طلعت رقيه غرفتها وانا من زود خوفي طلعت وراها عشان اعتذرلها ... واحاول اخليها تهدي بس اعتقد تصرفي كان غلط ..اول ما دخلت غرفتها معها طردتني وقالت انتي سبب ومدت يدها علي وانا مصدمومه من بعض الكلمات ما اقدر اكتبها هنا ....
بعد ما دزتني برا الغرفه واغلقت الباب في وجهي جلست ابكي على بابا الغرفه مادري مصدومه ولا شو
رقيه متعلمه كيف تفكر بهالطريقه ؟؟؟
سمعت صارت اصوات تحت بالصاله وكان حد يبكي ولا يصرخ ولاشوو؟؟؟
نزلت وشفت امي مغمى عليها واخواني متجمعين عليها ...
لما مديت ايدي بشيلها معهم اختي قالت عنج انتي وما خلتني اساعدهم وكانت تطالعني وتصيح
انا مب فاهمه شي خذيت بنتي في حضني كلهم راحوا وانا بقيت مع بنتي ابكي شو اللي صار ؟؟
اصغر وحده من خواتي قالت انتي بتموتين وحضنتني
قلت لها لا ليش حبيبتي تقولين جذيه
قالت احمد يقول انتي مريضه فيج الايدز
وعرفت انه احمد قالهم وعشان جيه اختي ما خلتني المس امي حضنت اختي بقوه وبنتي امل بس اختي الكبيره طلعت وشافتني ونادت اختي الصغيره بقوه وقالت لها جيبي لامي ماي ....ياترى ما تريدني احضنها ..؟؟؟ ياترى كانت قاصده ...
بقيت انا وامل لحالنا في الصاله كلهم داخل
اروح لهم داخل ولا انتظر حكمهم علي وانا هني ولا وين اروح
بعد فتره ما اعرف كم دقيقه وانا جالسه في الارض وامل في حضني مستغربه وتصيح من صياحي وتمسح الدموع من على وجهي
قررت ادخل واشوف امي شو اللي صارلها ...
لقيتهم متجمعين حولها على سريرها وهيه في حضن اختي تبكي واخوي احمد يخبرهم عني وعن امل ولما شافوني سكتوا وناداني احمد وقال تعالي ..
اتقربت منهم وانا ابكي وبنتي ف حضني حسيت بغربه ما يعلم بها غير الله ...
قال احسن كلهم يدرون عشان ترتاحين انتي ...
انا قلت بس امي ...
وابوي
امي ماقالت ولا كلمه كنت محتاجه تحضني وتخفف عني وتقولي مهما صار انتي بنتي ...كنت انتظر منها تقولي ماعليه وتواسيني وتقولي انها بتكون معي قلب وقالب من اليوم ...كنت انتظر منها نظره بس ....
بعد صمت
صرخت فيهم وذكرتهم باسماءهم واحد واحد وقلتلهم اني مالي ذنب
ولازم يكونون لي عون في مصيبتي
مالقيت أي رد من أي حد فيهم غير احمد كان ماسكني ويقولي هدي اعصابج ما يسوى عليج واللي ماعايبنه على راحته
هذا بلاء من الله وانتي صابره ولج الجنه
وطلب مني اروح غرفتي
رحت وانا اجر معي هم يتبعه هم
حتى انتي يامي وش اللي صارلج ؟؟
وين التضحيه اللي عودتينا عليها ؟؟
مالومج يامي يمكن لانه ما عندج أي خلفيه عن المرض
وبتم احبج لاخر لحضه في حياتي
انتي قدمتي لي اكثر بكثييييييييييييير من هذا
الله يخليج لاخواني وخواتي ذخر ياغلى من في الوجود
جلست من الظهر لين المغرب في غرفتي ما طلعت وبعد صلاة المغرب سمعت احد يدق الباب
فتحت لقيته ابوي
حضني بقوه ودموعه كانت اكبر دليل على انه خلاص خبروه وعرف
وقعد على طرف سرير غرفتي وقالي ليش ؟
ليش؟؟
قلته والله مالي ذنب يابويه
والله مالي ذنب
انا ضحيه وابراهيم كان السبب تقدر تسال اخوه ابو سالم يعرف بالسالفه وحكيتله كل الموضوع
قالي انا عارف كل هذا وما اشك فيج ذرة شك
بس انا اقول ليش يوم كنتي تعرفين انه مب زين صبرتي عليه ليش؟؟
فهمت ابويه انه ابراهيم مصاب من قبل العرس على اكبر احتمال
وابويه يقول بخيبة امل : بس وقتها الكل كان يمدح فيه ..
ما اعرف يابويه هذا نصيب وانا مستعده اصبر للنهايه
بس انتو ساعدوني ....
طلع عني ابويه وخلاني سجينة احزاني
ضليت فتره ما اطلع وماحد يجي عندي من خواتي نفس قبل
اطلع اخذ لبنتي اكل من المطبخ ولي وارجع اكل في غرفتي
لحد ف يوم رايحه اريد اييب غدا لي ولامل ...
لقيت الخدامه تمشي وراي واي شي امسكه تمسحه بفوطه وديتول وسالتها ليش جذيه ؟؟؟
فقالت ماما يقول انا يسوي جيه
قلت اوكي اريد غدا قالت ماما يقول هذا صحن عشان انتي وامل
اتوقعوا شوو؟؟
مشترين لي صحون بلاستيك عشان اكل فيها انا وبنتي وبعدين بدل ما يغسلونها او يتم فيها اكل مفضلينه انا وامل يرمونها في الزباله على طول ...يعني يخافون حتى على الخدامه ...سبحان الله وانا محد مفكر في شعوري ..
يتبع