الآدمي من معدنه وأصابعك ماهي سوا
ومن سابعات المستحيل أصابعك متساويه
الحين لو كلب ٍ نبح هو ذيب لامنه عوا
لا لا هذيك كلاب تنبح والذيابه عاويه
لولا كذا تساوواالطيّب وملعون الثوا
ولاحط قدر للرجال أهل العلوم الكاويه
والناس أجناس وبهم ناس ٍ يبيعون الهوا
وناس ٍبهم ماهي على حتى المعيشه قاويه
والأرض وحده لكن الله قدّس الوادي طوا
والنفس محدن غير خالقها يعرف وش ناويه
والخلق تتبع واحد ٍ يقدر على رفع اللوا
وإلا عليش إستخلفوا يزيد إبن معاويه
أعّرفك إن الزمن كفيل يكشف ماحوا
ويبيّن اللي فوق بالقمة ومن بالهاويه
بس المصيبه لوتكون إنسان تحت المستوى
مدري تكون من البشر وإلا من العتاويه
تدري .. تكون العله اللي مالها طب ودوا
لأجل كذا نشوف شلات الردى متخاويه
والناس يبقى بعضهم نجم ٍ على الدنيا ضوا
وإلا البقيه يجمعون ويحشرون بزاويه
قال الرسول المصطفى كل إمرئ ٍ وما نوا
وأنت أنو نيّه دام هالدنيا عروش ٍ خاويه
