(( الغيبه )) / الي ولدت زحمة افكار
منها غدت نفس الشقاوي عليله!!
منها.. / جنيت الضيق من ساق الاقدار
منها.. / لقيت الصبر حاجه ثقيله
توي دريت.. ان الزمن ((واحة امرار))
وان البحر له موج ما ينقويله
لو / العنى يقفي مع قول الاشعار
سقت ..القصايد كلها في سبيله!!
توك../ بديت البعد شوف اللذي صار
وشلون .. لوخطوة غيابك طويله!!
ياليل .. دام ان الخوي يهجر الدار
ماهو غريب البوح يطرد دخيله!!
وان شفتني ضايق .. وكني على نار
جبت الاحاسيس الحزينه وسيله
ولا راح ../ نصف الليل في وقت الاسحار
تلقى عنى قلبي وهمي قبيله!!
ولاذعذع الغربي / على جوف الاشجار
وقام الشجر ينفض بقايا شليله!!
تطري علي لحظة وداعك والاسرار
اللي لها بالقلب ذكرى جميله
البعد,, عادي,, في مفاهيم ,, الانظار
مير البلا.. شوق الخليل لخليله
ليت الامل.. طيرٍ ليا روّح وطار
يرجع../ ليا لوح له اللي يشيله
وليت العيون.. غيوم ياهلت امطار
ترحل.. ليا هلت بقايا مسيله
وشفت,, الندا .. وشلون يسكن بالازهار
ولا طاح نور الشمس يبدى رحيله!!
كذا حياة البعد في جوف الافكار
ترحل مع طيف الامل والوسيله
تعبت.. اصد امرار.. واستقبل اعذار
واسهر مع جفن السهر كل ليله!!
خذها حقيقه.. غلف,, البوح باسرار
وخل القصايد للمشاعر وسيله!!
البعد,, عادي,, في مفاهيم الانظار
مير البلا شوق الخليل لخليله