منصور رد:..وعليكم....السلام...
ذياب:...شخبارك يا ولد العم ؟
منصور حط الفوطة على ينب ومستغرب:...الحمدلله....
ذياب مشى الين وصل نص الغرفة:.....وينك ما ترد ؟؟؟ فيك شي ؟؟؟
منصور وتذكر اتصال عمه:.... ليش ؟؟...شي هناك ؟؟
ذياب وكان لابس غترة بيضة وكندورة بيضة... وفي ايده التيلفون والنظارة الشمسية...
ذياب:....كنت مار جريب من البيت واتصل بي الوالد يقول انك طلعت من المستشفى
من دون ما تخبر عمي حمد....عاد قلت بخطف عليك اشوفك ....
منصور ورد عقم كندورته:...هيه.... طلعت لانه كان راقد ما بغيت انششه.....
عن يكون ذاك رقم المستشفى !!!...اووففف ما رديت عليهم...!!
ذياب يشوف على منصور:...متأكد ان ما فيك ؟؟...
منصور شاف على ذياب:...لا ما فيني شي...بس تعب ... تعرف انت وقفة المستشفى...
ذياب شاف على منصور بنظرة...ومنصور يشوف عليه مستغرب وقفته...
صد ذياب على جون:....جون .. ممكن تتركنا شوي ...
جون عارف شو ورا ذياب وطلع عنهم....وسكر الباب وراه......
منصور مستغرب........وذياب ساكت يشوف على منصور...
منصور صد عنه وراح صوب الكراسي الي في غرفته ويلس وجان يقول:.... تعال......وقول شو عندك بعد انته..؟؟
ذياب كان يشوف على منصور بطريقة غريبة:.....شو هذا الي برع ؟؟؟؟؟؟؟
منصور:...الي شفته....شو بعد ..
ذياب:...أسألك شو هذا الي برع ؟؟؟؟؟؟؟
منصور يتمصخر عليه:....ماشي غرشة فيمتو طايحة من فوق ...
ذياب وبان عليه انه عصب لانه عارف انها غرشة خمر:...غرشة فيمتو ؟؟.. هاه ؟؟؟....
يعلك شو بقول عنك ....الريحة شااااالة المكان ....
منصور نش ومعصب:.......خلها تشل ......شو لك انت ؟؟؟ هاه ؟؟
ذياب قرب عند منصور:....من وين هالخمر ؟؟؟؟؟؟؟؟؟ وكيف جذا صار ؟؟؟؟؟
منصور صد عن ذياب وما تكلم.......
ذياب:.....ارمس..... شوووو لا يكووون تشرب ؟؟؟
منصور ساكت......
ذياب:.......تكلم......شو يايب لنا من مصاااايب بعد ...؟؟؟؟؟
منصور كان عاطي الظهر وبعدين رد وصد:....أنـــــا ؟؟؟
ذياب:..هيه انته ؟؟؟؟؟؟ .... منو غيرك فالبيت ؟؟؟؟
منصور منصدم:...انت شووو فيك علي ؟؟؟؟؟....
ذياب:...انا ما فيني شي عليك............بس ياخي مصختها .. بتقول من وين طانفنه هالخمر ولا لا ..؟؟؟
منصور بكل هدوء:.....هالغيرة الي فيك ودرها عنك...
ذياب وعصب:..شو ؟؟...أنا اغـــار ....؟؟...
منصور رد:... هيه تغار...... انا اعرف شكثر ابوي كان وياك اربع وعشرين ساعة ومخلنك مثل ولده واكثر،،
والحين وانا هني ......... الوضع مب مثل قبل...
ذياب يشوف على منصور. ....
منصور كمل:...فأرجوووك.......لا تظلمني بكلام....والسبب انك مب طايقني ., . .
ذياب تكلم:.... تسمي هذي غيرة ؟؟؟.... انت ولده وتطلع عنه بلا حس ولا خبر والمسكين
ييلس يدقدق عليك التيلفون وانت حضرتك ما ترد......... ويوم اييي احصلك مشغول بغرشة خمر ....
مسكين عمي ما يدري عن شي ... ولا لو منه جان ما نشدت عنك .. . .
منصور وعليه ابتسامة استهزاء:...صدجني يدري .... هو يدري عن كل شي... وانا الي ما آدري عن شي....
ذياب بدأ يتوه:....شو تقصد ؟؟؟
منصور شاف على ذياب بنظرة وكان يكلم نفسه:..."هذا الي بيعرف اذا كان ابوي يشرب..."
ذياب يشوف كيف منصور ساكت:.. تعرف شي ... انا طالع عنك... وانت صرف نفسك ....
ذياب وهو يمشي صوب باب الغرفة يريد يطلع وكان متضايج:...والله انه ما ترقع بخير يوم دخلك في
هذا البيت...... لعوزته وغربلته.....(يقصد ان منصور لعوز عمه حمد)
ويوم مسك قبضة الباب ...
منصور تكلم عاد:....ابوي ..... ابوي بعده يشرب ؟
ذياب منصدم ورد يشوف على منصور:... جني ما سمعت زين ؟؟.... شو تقول ؟
منصور على صوته:...خبرني ذياب ؟ كان شارب وهو مسوي حااااااااادث ولا لاااااااا ؟؟
ذياب ورد يمشي صوب منصور:....شو يالس تتحرطم انته ؟؟؟
ذياب عصب وقام يأشر بإيده صوب منصور:...كيف ترمس عن ابوك هذي الرمسة ؟؟؟
وحمى الموقف بينهم،،
منصور تقرب عند ذياب:.....بس خبرني شو مستوي ؟؟؟؟؟؟؟ وشو سالفة هالخمر في مكتبه ؟؟؟
ذياب يشوف في عيون منصور ومعصب:..... في مكتبه ؟؟؟....
منصور يشوف على ذياب.....
ذياب مستغرب:......وشو الي طيحها من فوق ؟؟؟
منصور:...انا ...........الي وريتها من فوق ......من حرقة في داخلي يوم شفتها.....
ذياب بعده مب مستوعب.......
منصور ورد قال: ...خبرني .....يشرب بعده ؟؟؟؟؟؟؟
ذياب وبصوت عالي:....لا يالنذل ......وبعدك تردهاااااا.....!!!!!!
منصور رد :...لااااااااا تقولي نذل ....اذا حد نذل ترا محد غيرك ...
ذياب ومد يده وكان يريد يضرب منصور بس منصور مسك ايده قبلها....
تلاقت نظراتهم ويا بعض...
منصور بانت عليه نظرة تعب وان الي ياه وايد..يريد يرتاح....وهالموضوع كبير من
انه يقدر يتحمله خصوصا في حالته هذي.....توه طالع من الموت...وبعده الين الحين ما اتعافى بشكل كامل...
ذياب وهو يمط يده بالقوة:...والله لو انك مب مريض جان شفتني زين اليوم شو بخدم بك...
يتبع>>
رد مع اقتباس