مسائك جوري يا أنا...

ونكمل سالفة امس...
أأمممم وين وقفنا؟
صح تذكرت كنا نقول أني أنا تخمبقت وما رحت المدرسة عشان الشهادة.وخلاص في نظري ضااع المستقبل

قمت أوزع الألوان والاقلام على اخواتي على أساس اني قررت ما أروح المدرسة..حتى المقلمة والمسطرة الي يجي فيها ماي وصقلة سرحتها
وبعد اليوم السابع عرف الوالد(ربي يرحمه ويحسن إليه) اني أنا ما أداوم واني من أسبوع حزة رجعته فالبيت ابدا باللاعتكاف عشان ماي يشوفني(كان تفكير معوق..يعني بالعقل لمتى بتم متوارية)
المهم انا نادني وقالي انا رايح البس دشداشتي ولما اخلص القاك لابسة وجايبة شنطتك وتنتظريني عند الباب

قلتله مأبا اروح المدرسه بتعلقني من شعري..قال اباها تقلع عينك عشان تعرفي تلفي كتبك وأغراضك
لبست وطلعت لقيته برع البيت ينتظرني ..مسكني من ايدي ورحنا مشي..بغيته يرخي مسكته او يغير مكانها .ابد
صاك على أيدي صكة..وطول الدرب انا اتنشق وابكي داخل داخل..وعيوني تخرخر دموع
وصلنا ودشينا الصف..أول ماشافتني الابلة جات تركض: سلامات ياحاج ..ايش مالها حنايا؟
وليش ما كانت مداومه هذا الأسبوع *خبرها الوالد بالقصة وأني بسبب اهمالي الشهادة كلنها الهوش
أول ما سمعت الممعلمة الهوش وكتب وأكل اعتفست خارطه ويهها وقام يطلع من أذنينها دخان وعيونها شوي وبتطلع
قالت هذي مش اول مرة هالبنت تسويها..المشكلة أنها شاطرة وتستوعب ..وجلست تجيب بعمرها
عاد الوالد قالها عليك بها .بس سلمي العين عشان تشوفبها درب البيت..لا تقصري فيها.
كل هالشي وان سايلنت بس بداخلي أقول ياويلي ويلاه..بدل ما يقول للمدرسة مسحيها فوجهي وما بتعيدها بعده يزيد النار حطب

قالت الابلة خلاص ياحاج..توكل على الله واحنا مادايرين ندلع بناتنا..وتأكد ان بنتك فيد امينه بس انا دايرة اشد عليها شوي
ترخص الوالد وانا نظرتي تستنجد به..طلع ابوي ولا احتفل صوبي
شوي ولا المدرسة تناديني على السبورة وتطلع مسطره مترية خشب
قالت افتحي ايدك.فتحت ايدي وتلبخني على كل ايد 5ضربات محترمات
كانت المسطرة لما تنزل تسوي صوت فزززز كررراخ..عاد انا كملت بكاء بس صامت
رجعت مكاني..والغم اني جالسه الصف الأول مواجه الابلة
ما بنطولها وهي قصيرة
بس صار كل ما يوزعوا الشهايد انا مايعطوني(صاحبة سوابق وسجل اسود)
وأنا أقول احسن وفكة..عسى قبل تموت العنز بعدين يعطوني الشهادة
بس بيني وبينكم كان يحز فنفسي لما أشوف المعلمة توزع الشهايد ويصفقوا للمتفوقات وانا من بينهن بس ما يعبروني
كان بين العشر الأوائل دائما كان مركز لا يذكر وأعرف ان هذي مركزي
فنهايه الفصل وقبل الشهادة مال اخر السنه عطوني الشهادة بس ماكانت مثل الي قبل
طلعت السالفة إنهم كانوا ما محصلين بدل فاقد عشان يرصدوا فيها الدرجات
لان بهذاك الزمان الشهايد تنطبع من المديريه وماكان في الات تصوير بذاك الوقت
فما كان في حل الا يجيبولي شهادة مال أولاد فترة صباحية وسجلوا فيها اسمي ودرجاتي
وتتوالى القصص والاحداث مع الرياضيات لين كرهت هالمادة
صرت ما احبها ولا أحب مدرسينها...
ومن سخرية القدر ان الأيام دارت وتدربت فبنك التنمية ..كله أرقام وحسابات
وبعدها توظفت بوزارة الماليه بين الأرقام والحسابات


أبشركم ترى لحد اليوم ما حافظه من جدول الضرب الا جدول 5 و2و10
واني ما اعرف احل القسمة المطولة للحين
الشي الوحيد الي اعرفه هو المثلثات والزوايا


وسلامتكم