زجـــاجة فارغة

[مائة بيسة]

10/9/2013
Tuesday
صباحكم خيرررر...صباحكم صحة...صباحكم أمل
فترة ماسولفت معاك خاصة اني بيوم الأحد كنت حيل مريضة
وطلعت بدري من الدوام والبارحة قعدت بالبيت احس حالي تعبانة
اليوم احسن والحمدلله بس شوي ارهاق فيني وألم ببطني...



طيب بحكي لكم عن يوم الخميس رديت من الدوام متأخر وحصلت فيمي حدها معصبة هع
اونه ماساعدتها بالشغل المهم دخلت الاغراض بالسيارة واخذت اغراضي ورحنا بيت
ابلة خديجة نأخذ بقية الاغراض ونأخذ تمتوم معانا ورحنا نأخذ الكيك من المخبز لانها تجهز بعد 6
بعدها ع طول رحنا الغبرة بيت خالتي زيانه وصلينا وتجهزنا
طبعا الكيكه خليناها عندها عسب لما تجي تجيبها


والحفلة سويناها بمنتزه الغبرة عند البحيرة والجو كان حلو لان قرب البحر



حطينا البالونات ع سور البحيرة وكانوا لونهم أزرق والبعض ربطناهم
تسلموا البنات هع هلكناكم تنفخون



وسوينا اكوب شموع مع شموع برقم صغار برقم3 وحطيناهم ع الارض
وطاولة ( الشموع تشبه هالفكرة بس نحن خليناها بكوب ( ممكن تحطون بااكياس البوب كورن)
وتسون الشكل اللي تبوه



ومنطاد ساعدني تمتوم وطيرنهم
وصح كان بنفس اليوم عيد ميلاده وفجأنه بكيكة من باسكن روبنز بالايسكريم
تخيلوا واحن نطيرهم اللي بالمنتزه الكل يطالع فوق وجاوا اجانب وقفوا عندنا
لما انطفت الليتات وكنا نشعل اخر منطاد وابدوا اعجابهم لوووول ( فكرتي طبعا)

​

والعشاء كان مكون من ( هودج/ برجر/شيبس/ خبز شباتي/ سلطة / صلصة بطاطا / بطاطا اورجو
ايسكريم/حمص/ بطاطس( ماجاين تعرفونه هع)/ اتشار/ كاتشب وفلفل

العصاير ( كوكتيل/ فيمتو/ بيبسي/ ديو / سفن اب)



والحفلة كانت حلوة
ونسيت اهم شي بالحفلة اجى اتوتو واول ماشفناه ياحرام طرشناه يأخذ الكول بوكس

والكيكة كانت لشخصية بابا سنفور والكل عجبته



ونجي للبارحة كان عيد ميلاد فيمي سوينا لهم مفاجأة كانت هي بالغرفة
رتبنا كل الامور وجهزنا العشاء طبعاَ كان من برع هع غير انا
قليت الشيبس وجهزت الشموع ع الكيكة
وكانت من الشكوليت
وعجبتها اهم شي

والعشاء كان مكون من
متبل/حمص/شيبس/سلطة مشكله/ دجاج/خبز
والعصاير ديو/سفن اب


وترقبوني بتاريخ 25 /9/ 2013 عندنا عيد ميلاد هينة
هع وايدين شهر 9 اذا عديت لكم بتنصدمون



نسيت اخبركم عن هدايا مالونس الكل جاب سيارات هع يعرفونه يحب السيارات
واول هدية فتحها كانت لمجنوووني وعجبته



وهدوني بهالسنة من أحلى محل عندي ذا بودي شوب ( ترايت يو ويل ليكت)

[مائة بيسة]

بخبركم بالمنتجات اللي استخدمها وتعجبني مااستغنى عنها



هالسكراب حده رهيب وريحته تخبل ...وتحسين جسمك مرة ناعم



جربت هالقفاز عجبني بحيث تحسين بعد الشور انك فريش عكس الليفات الثانية خشنة
وتأخذ جلدك وياها


طبعاَ فوائد الليمون الكل يعرفها جربيه ماراح تندمين وخاصة ع الكوع والرجل
يزيل الاوساخ وتحسين بفرق قبل وبعد الاستخدام



جربت نفس هالعطر بس كان بالشيا رايحته تهبل
تجنن




ريحة المانجو تغسلين يدك تحسين بالنظافة ورائحة المانجو تعطيك شعور بالنشاط



من عشاق هالعطر حده رهيييييب بس لاتفشين منه وايد ولادوم عسب ماتكون ريحتك نفس الشي يومياَ
انا مو دايما احطه عسب انا من النوع اللي بمرة امل من الريحة اذا تكررت علي وحتى اكرها



للاستحمام انصحك تستخدمين سائل ديتول هع انا استخدم هالنوعين


يالازرق ( اكتيف) الغامق او البرنقالي







وغسول الوجه شرط البرتقالي بعدها تحسين بنظافة البشرة



كنت استخدم اسكينول بالخيار لكن غيرته لليمون قبل النوم امسحي وجهك فيه والرقبة
وحتى بعد الميكب

[مائة بيسة]

في قصة شعر عاجبتني ( نص بوي) طرف طويل والطرف الثاني قصير هع اتخيل اجربها
الوالده بعديها بس.......اذا طبقت بخبركم


يارب خلهم يوصلون بالسلاااااامة يارب

[مائة بيسة]

11/9/2013
Wednesday
صباحكم خير...صباحكم عافية...صباحكم إحترام



البارحة كان لي ضيف بالدوام سعدت بزيارته رغم قصر الزيارة
المهم البارحة كنت ابي اخبر.... بخصوص الشك اللي يزعجني لكن فضلت مااتكلم مو لسبب
معين لكن فضلت اسكت مابي مبررات وكلام مامنه معنى...
ناس تجي وتشك فيك ليش وشو السبب ؟ انت ماتعرف رغم انك تحاول تسوي نفس ماهم يطلبون منك


البارحة يقولوا لي فونك مشغول ورقمي حده انشغل يمكن 3 دقايق مالونس يكلم امه
السؤال الحين متى كان اتصالهم عسب حصلوا مشغول وخذوا موقف.

الناس بعالمنا ( البعض) تبي تمشينا ع حسب مزاجها واحن لازم بس نفهمهم اما هم لا.



اليوم رسلت صورة بالايميل صورة لو طالعتوها بتحسون بألم خخخخ
انا حسيت بالالم قلت اخلي الجماعة يحسون نفسي من شريرة
لكن ابي اعرف هل احساسهم نفسي



اليوم كانت الزحمة فضيعة من ستي سنتر لغاية المطار ...كرهت هالدرب حدي
والزحمة تجيب اللوعان



مااطيق حد 24 ساعه يسألني شو تسوي يعني الواحد مايقدر يتنفس...انا بالنسبة لي هالسؤال يدل ع عدم ثقة
يالله ع هالدلع اللي فيهم




لزوار مدونتي الحلوين فقط

لا تحتاج المرآه لأشياء ماديه لا قيمه لها ; [♥]
فالحب عندها يساوي حياتها .. [♥]
فإذا شعرت أنها في حضن رجل يخاف عليها .. [♥]
تتنازل عن كل شئ من أجله [♥]


رائع....وهو كذلك

[مائة بيسة]

حلو لو الناس تصارحك بكل شي تدور بداخلها كنا بنكون بخيرررر

احياناَ نحس بالناس اللي حولنا فيهم شي او حتى متغيرين ولما نسألهم
يردوا علينا انهم بخير وماعليهم شر
لكن مانصدقهم لاننا ع يقين فيهم شي بس مايبوا يزعجونا
لكن بوجهة نظري هم مايسببون لنا اي ازعاج لان علاقتنا
ماراح تصير اقوى اذا كنا مانوقف جنب بعض

[مائة بيسة]

واخيرا باقي دقايق واروح البيت

ليتهم يفهمون اشكثر نحبهم ..مجنوني وينك تعال

[مائة بيسة]

في ناااس مميزين بحياتنا حياتهم كفاح وامل بالتطور ربي يديمهم لي يارب
قوووولوا امين



لاتعتمدون ع حد ( هليب يور سلف)



دقايق تفصلنا ع الحدث الاكبر ( خخخ الذهاب للمنزل)

[مائة بيسة]

يالله عفوك ورضاك ..من فينا مايتمنى الجنة ( عيل اسعى لها)




عجبتني اممممم



عجبتكم ( مو وايد) ابي افكار حلوة



من يتذكر هالرسوم...ماكان يعجبني ابدددددد

[مائة بيسة]

12/9/2013
Thursday

صباحكم خير ...صباحكم دعاء مستجاب...صباحكم وناسة لانها الخميس

الحمدلله الذي احينا بعد مااماتنا واليه النشور
سبحان الله وبحمده سبحان الله العظيم
أستغفرالله ولاحول ولاقوة إلابالله العلي العظيم



البارحة شو اخبركم عنه غير الشغل تنظيف ( لحد احس حالي تكسرت)
كرهت شغل البيت اللي مايخلص
اكره حد يقولي كلمة ماصخة...كل بعد شوي يقولك ماصخة يكدرك بصراحه
تو اذا سويت اي شي ينقالك ماصخ شو تكون ردة فعلك..



صوتي يوحي اني معصبة...انا مو معصبة بس ماكو سالفة اتكلم فيها

هاليومين يجيني صداع قرب عيوني ماادري اسبابه رغب ابتعدت عن اكل النودلز
وماالعب الايباد لكن هالصداع يجيني ...



شي غريب لما تظن انك حبيب و انك من الفرحة قريب ( هدوء وعواصف)
اتذكر هالمسلسل لما كنت بالكلية سنة أولى ...ايام رمضان
الحين يعاد ع قناة البحرين الظهر حوالي س1/2
مشاهدة طيبة



مجنوني وينك تعال....إشتقتلك




لزوار مدونتي لكم اجمل التحايا

[مائة بيسة]

رهيب ريلاكس


عجبني المناكير لكن ...........الجماعة ماترضى هع

مشتاقلك موت ياللي طول غيابك ( عذاب)
جوعانـــــة