((((( والله قهرْ كلٍّ يشوفهْ )))))

**نسر البوادي** · 17-02-2016, 09:10 AM

والله قهرْ كلٍّ يشوفهْ ويلقاه
إلا أنا عَيَّا عليْ لا أشوفه

حتى ولا اْخـْفـِيْكُمْ إذا جيتْ أبنساه
أتعبْ لأني بسْ أناظرْ طيوفه

يعني تبون الجد احترتْ وياه
عجزت أحدّدْ في خيالي وصوفه

لكنْ عرفتْ إنـّه قليلين شرواه
لجل إنْ لون الثلجْ يشبهْ لجوفه

سبحان من بالدِّيْنْ كمَّل حلاياه
نفسه على الخيرات دايمْ شغوفة

هرجه عسل والطيب يملا حناياه
سَهْلَ التعامل ما بْطبعه كلوفه

راعي وفا يـِتـْعِبْ سواه بْسواياه
والجود ودّه ما يفارقْ كفوفه

إيه أكتب الأبياتْ له وأتمنـّاه
وأبياتْ شعري كلها له لـُهوفـَة

وإن جيت للفصحى فالاْلفاظ تفداه
لكن بـَسـَطـّرْ بيتْ واحدْ واَحُوفه

لا تـَضْجَرُوا إنْ قـُلْتُ : ما الحُبُّ لَوْلاه
فـَالحُبُّ شِعْرٌ ، وَهُوَ فِيْهِ حُرُوْفـَه

يبقى غلاهْ اللي بْقلبي تـَعَلاه
بالرّغـْمْ منْ صَدّهْ وكـَثـْرَةْ ظروفه .

ويْحـِقْ لهْ لو هو تغـَـلّى بلقياه
لكن صراحة : قهر ودي أشوفه