الصديق،،،،

**روح الحلا1** · 23-02-2016, 11:37 AM

كتبت أنا في تالي الليل بيتين

لعيون من يسوى جميع الخلايق
اللي معاهدني على الزّين والشّين
واللي بشوفه يصبح الفكر رايق
الصّاحب اللي منزله داخل العين
هو الخوي وقت السّعة والضّوايق.

يا سائلاً عنّي من القلب لبّيه

صوتك عزيز، وغصب عنّا نلبّيك
مثلك من الأجواد لا شكّ نغليه
ونفتح لك أبواب الخفوق ونحييك
وأشري رضى من يشتريني، وأرضيه
وأقول له بالرّوح والعين نشريك.

سر يا قلم واكتب من المدح ما طاب

في إلّي جزيل المدح يستاهلونه
ناس مزايين، والرّجا فيهم ما خاب
الرّوح والقلب فدى لهم لو يطلبونه
واكتب لهم شيك محبّة مفتوح الحساب
يسحبون من رصيد الغلا، وأبد ما ينقصونه.

اكتبه شعري، عسى شعري يجود

بالحروف اللي حلاها من حلاك
كلّ حرف ما بلغ وصفك حسود
لعنبو قاف عجز يلحق مداك.

لو أكتب إحساسي بالأشعار وأبديه

فيك المشاعر كيف بس اختصرها
قدرك كبير، ويعجز الشّعر يوفيه
كلّ القصايد فيك ينضب بحرها
أرفع يدّيني واسأل الله وأرجيه
ينجيك من شرّ الحياة وكدرها.

من رافقك والله حشا ما يخليك

لو عاشرك كل الدّهر ما يملك
أنا أشهد إنّي حرت، مدري وش أسمّيك
كلّ الخصال النّادرة ينتمن لك
الطّيب كنّه شابك إيديه في إيديك
إن كان له صاحب فهو صاحب لك.

والله ماني على مدح الرّياجيل بخيل

خاصةً لا جيت أمدح في زحول الرّجال
المشكلة مدحهم حمل لا شلته ثقيل
من ثقلها ما يقدر عليها كبار الجمال
حتّى لو تحاملت على حملها لا بدّ يميل
مال الجمل حيله على حمل الأثقال
أجل وش حيلة قلم بالقصايد يخيل
في معانيها صدق من مزون الخيال
قصيدة ما هي غزل فالطرف الكحيل
ولا هي عتاب وشكوة حال دون حال
قصيدة مدح في ذاك الشهم الأصيل.

الصّداقة كنز معناها جميل

من ملكها أشهد أنّه ملك
تعرف أوصافك من أوصاف الخليل
والصديق أحيان أقرب من هلك
من كلام المصطفى سقنا الدّليل
الجليس اثنين واحدهم هلِك
حامل المسك طبّن للعليل
صاحب ٍ للخير بدروبه سلك
لو تحسّ بضيق للضيقة يزيل
لو تغيب شوي عن الحال سألك
والجليس السّوء النّذل الرّذيل
نافخ الكير من الكير شعلك
ما يعين بخير خيره مستحيل
ما وراه إحسان يجهل بجهلك
لو تمر بسوء دوّر لك بديل
خاين ما شال هم ٍ لزعلك
الفضل لله والشكر الجزيل
يافؤادي خير من المولى شملك
البداية عين وآخرها سبيل
والوسط إبرة، وفكّر بمهلك.