صار اللقا مسكيــن واحنا مساكيــن ؟؟؟

**ندى الوورد** · 04-04-2016, 12:33 PM

من جديد أضع بين أيديكم
ما راق لذائقة .. ندى الوورد ..

راقت قوافي الشعر والحال ماراق
والناي يبـكي قسوة الفقـد والبين

احِنْ له واشتاق.واشتاق.واشتاق
وتحِنْ ودموع الوله خانت العين

كنا جنون العشق في روح عُشَّاق
كنا لـقا الاهداب بعنـآق جفنين

حبل الوفا فينا عهودٍ وميثـاق
نبضة خفوقٍ واحده تسكن اثنين

حتى تساوت..لحظة فراق وعناق
صار اللقا مسكين واحنا مساكين

مثل الغريـق الي شْهَق لحظة اغراق
نضحك وخلف العوج جرح السكاكين

غبنا وغاب النور من ليل الاحداق
تاهت خطاوينا ولا ندري الْ وَين

تَقَطَّعَت حبل الوصل وانكسر ساق
وصار اللقا موعد ولا له عناوين

اظماك... . لكن منك مالاح براق
رحت وطيفك والسهرْ لين هالحين

واصبحت حزنٍ يَسْكن بصدر الاوراق
والامنيـات تموت مابين قوسيـن

لو الزمان يعود والحظ لو فاق
ويكون لي من مَدَّت البخت ثنتين

قتلت حزنك. واحْتَضَنْتِك بالاعماق
نحيا سوى ونموت واحنا حبيبين