إنتو مال بلادين !

[سارة الوهيبي]

المناقشة :

تشوف فيه (إهانة ) لما حد يقولك هالجملة بعد ان تخطئ بفعل شي ما ?

مع نفسه بنت بلاد بكل ثقة اقولها ،،،لان بصراحة اشوف لهجتي مش قحية مثلهم ولا متصنعه مثلهم ،،، والسكان الاصلين في مسقط معروفين وكلامهم قحي أو بلوشي وزدجالي ولواتي اما البقية اصلهم من البلدان وسكنوا في مسقط من كذا فترة ،،، فمسقط اصلا مزيج من ناس من مختلف البلدان عشان كذا تشوف بعضهم اذا ما أكثرهم متصنعين بالكلام او كلامهم صار خليط من اللهجات ،،،
وبصراحة أحس نحن مال بلدان عندنا تكافل اكثر كحقوق الجار وكلنا لبعض عكس مسقط أهلي يا دوب يعرفوا جيرانهم من الحله الثانية ولهم سنين هناك هذا يحسب لنا فخر ،،،،
وحتى لو أحد خطأني أو قالي مال بلدان وأنا سويت غلط مع أني ما أذكر بس أرد عليه قصف ،،، بالنهاية ترانا من عمان وعندنا ثقافات مختلفة ولهجات مختلفة وتجمعنا أرض واحترام ،،، أحس ما في فائدة من هالكلام !!!
عشان نقلل قيمة الشخص بنظرهم نذكر مولده فين (ترا ما تقليل ذا هذا فخر ) ؟! ولا شو الهدف ؟!

مالدافع اللي يخلي مثل هالاشخاص يقولو هالجملة !
يحسبوا نفسهم مطورين ولا هم الصح شوفت نفس لا أكثر ولا أقل ،، بعد الي يقول سالفة مالها معنى ماله هدف ما إنسان صاااحي او فاضي؟!

هلا حبيبتي،،انا من مسقط وقبيلتي مسقطية مثل قبايل ثانية مسقطية اصلية واصيلة ما فينا عرق منا ولا مناك ومعنا بالفعل بلوش وعجم ولواتيا وغيرهم بس مو بنفس توصيفك نحن ليومك بينا صلات وتواصل امس بعد رايحة عرس في الحارة ههههه لا يعني بجد مسقط مو نفس ما متصورين عندنا حارات ومناطق نفس ستايل مناطقكم بالضبط وفيه مناطق لنا بس القبايل الاصلية بالعكس اللي مشوهينها اللي يفتكروها لاس فيجاس يجيوا يسكنوا هنا ويتجردوا من اصلهم ومناطقهم ولا اللي يجيوا لغرض الدراسة وهيك عبالهم هنا حرية كونوا شوي مصداقيين و واضحين درست في الجامعة وثلاثة ارباع اللي معي مو من مسقط الامور اللي تصير تشيب الراس يعني الخلل في بلدانهم لا طبعا تربية الشخص او اسباب2شخصية ايش دخل مناطقهم وقبايلهم واعيد نحن الحمد لله مو كذا وياما نسمع اتهامات ويظلمونا كلم فيكم الخير والبركة هالشيء اكيد ونحن ما احسن عنكم في كل مكان الشين والزين
وحتى اللهجة كل منطقة لها ستايل معين اصلا القبيلة الوحدة تشوفي ناس فعلا قح وناس معتدلين ...