بعض من نزفي

ولي عوده للرد على بقية الأخوه و الأخوات




عالم تناقض

الظلم من يد القريب ان حل نسيانه محال
والقلب لا جته السهام من الذي حبه هلك

تحيا غريب وكنهم ما يعرفوا كلمة" تعال "
ف دروبهم تمشي وهم عنك يدوروا ف الفلك

عالم تناقض لو تقدم دم قلبك ما تنال
إلا جحود ووجه عابس ثقل دمه يقتلك

غصنك اذا بعضه ثمر لافواهم لا شك مال
وان حل في كونك جفاف الكل يجهل منزلك

هذه عيوب اللي فطن للي خفى بصدر الرجال
بعض الفراسه للأسف للتجربه ما تمهلك

الصبر ما غيره ملاذ ان صارت همومك جبال
ما دام من يحسب يمينك عنها ما يسألك

واصل لوحدك رحلتك من دونهم شد الرحال
واحيا ف كونك لو علاك الهم بالعزه ملك

لا ترتجي من جور شمسك تسعفك منهم ظلال
لو طحت لا لا لا تظن ان الايادي تحملك

واخر كلام...اذا امتلى ظهرك ب طعنات النصال
ما توجعك الا اذا الطعنه ..."لواحد من هلك "

.................................................. .................................................. ............................


جيل الكلام



ذا سجين الليل أرداه الغرام
ما لقى من سجن محبوبه مفر

ذاك يهدي موتره كل إهتمام
يحرسه من صبح يومه للسحر

شيخ.. عن زهده تغنى ف الزحام
خلف أثواب التدين إستتر

من غدى للصدق في ربعه إمام
وافي ما يطعن إلا بالظهر

والشجاع... اللي ثبت صدق الهيام
ساق دمع الأم للزوجه مهر

أمثله من واقع إجتاحه ظلام
جيل بأخلاقه وعاداته كفر

جيل فعله ما وصل ربع الكلام
ما مشى في مسلك العزه شبر

ملتهي بالحلم غارق ف المنام
منتهي فكره كأنه في سكر

صغت بعض اللي أحسه ..والختام
ليتنا نجني من الماضي عبر

يوم عزم أجدادنا عدى الغمام
لين سيل المجد دنياهم غمر

.................................................. .................................................. .....................


ياكثر هالناس

انسان ..يتبعه عالم فرحتك لا غاب
وانسان ..فرحك يجيك ف لحظة غيابه

ما كل من صار حولك هالزمن ..أحباب
أبسط مثل للوضع ذا ...عيشة الغابه

لا تسأل الدهر ليش اللي تكرهه جاب؟!
دام الوصل للجميع مشرعه أبوابه

يا كثر هالناس ..وأكثر منهم الالقاب
نمام / خاين / منافق / قوم كذابه

ان صاب فيهم رجا ..ألفين غيره خاب
معظمهم اللي تستر داخل ثيابه

لا تهدي الناس من نظرة لها الاعجاب
يا كم عنوان خالف أسطر كتابه

ما يربط الفعل في هالوقت بالانساب
في هالبشر من يلوث مجد شيابه

من يحمل الورد او من كشر الانياب
يفضحهم الوقت لو الأوصاف تتشابه !!



.................................................. .................................................. ..........



أقبل علي شعرك



أقبل علي شعرك و أرخيت الأسماع
حكمه لنا حرفك بوعيه عرضها

أبيات فيها تجربة عمر و امتاع
تلقى بها أهل النصيحه غرضها

بوحك نبش الجروح من بين الاضلاع
و الذاكره م غبارها ذا نفضها

لا تبتئس والناس أشكال و أنواع
لو جار فيها صنف ...يوفي بعضها

مع دورة الأيام ...تتبدل أوضاع
بس الاوادم في يأسها مرضها

اترك من اللي به المروه على القاع
اللي دروب الناقصه تعترضها

والزم مجالس من لهم ف الشرف باع
من ف الشدايد طيحتك تنتهضها

بعض البشر لك للعلا كنها شراع
والبعض لو روحك ب يده قبضها

والخاتمه ...خلك لهالورد بياع
ل قلوب صار الطيب فيها نبضها

واللي كسى فيهم ردا الليل الأطباع
سنه معاشرهم ...ويسقط فرضها