( ... ❤ كان لي عندك حكايه ❤ ... )

[رايق البال]

قصيده :
نفسي اسألك ؟
رابط القصيده

http://omaniaa.co/showthread.php?t=41237&highlight=

يسعد مساكم / صباحكم
لكل الأحبه اهدي بوح قلمي والظاهر القريحه هالايام مطنشتني شوي ههههه سبق نشر هالنص هنا في 13 / 12/ 2011 ...

نفسي اسألكْ
وشْ آخرةْ حبي إلكْ ..!؟
راحْ تقتربْ ...
ولا الهوى بعدهْ حبيبي
(م ) اشْغلكْ ...!؟
ولاجرّبتْ مثلي سهرْ
واشواقْ تاخذني وتمرّْ
وليل(ن ) طويلْ
فيه إتْخّيلني مثلْ
مانا ليالي اتْخيّلكْ ..!
لك اعترفْ ...
ان الحزن فيني طغى
والشوق عمره ماطفى
ولا غبت عني ياغلاي
كلها دقايق بس واجيكْ
وانا ابتسملكْ واحتويكْ
واقول لكْ ...
ماقلّتلكْ ..!؟
انه فراقكْ ...
هدّني ...
ماقلّتلكْ ..!؟
يامن هويتْ ...
حسْ بي وخذني للأمان
كافي دلالْ
بسّْك تعالْ
ولاّ وربّي اللي خلقْ
وبقدرتهْ ...
الطفلْ في مهْدهْ نطقْ
لا اذوّقكْ نار الغرامْ
واشّْعلْ فتيلهْ والهيامْ
واحرمّْكْ لذاّت المنامْ
وارقصّْ الشيطانْ لكْ ..!
للموت احبكْ واهْتويكْ
انت الغرام اللي اقول
وانته هوايا والميول
وكلّي إلكْ
يامن انا لك مملكه
وبْخافقي ...
إنت الملكْ ...
انت الملكْ ...
انت الملكْ ...!

اخوكم / رايق البال

[رايق البال]

ياربي غباااررر
الظاهر نسيتها المدونه

[رايق البال]

بقلمي قصة / ديك ابو محمود
نشرت هنا سابقا حسب هالرابط

http://omaniaa.co/showthread.php?t=3202&highlight=


يسعد صباحكم / مساكم
هلا بالجميع ...

من جديد نلتقي أيها الاحبه وقصه بسيطه من قلمي ...
كنا ولازلنا نسكن في منطقه جيراننا فيها ولله الحمد معاملتهم جميله معنا ومع الجميع ...
وكان من ضمن الجيران الطيبين جارنا ابو محمود ..
رجل كثير كان طيب وكانوا عياله مثله في الطيبه والأخلاق الرفيعه ... مره وانا طالع من البيت بعد المغرب رايح عند الشباب اسهر شفته ولما هو شافني متحرك بسيارتي قام يأشر لي بإيده عشان أوقف ...
وقفت ونزلت من سيارتي وسلمت عليه ..
انا : هلا أبو محمود يسعد مساك .. شخبارك ؟
ابومحمود : الحمد لله كلنا بألف خير .. كيفك انت ؟
انا : الحمد لله .. آمر أبو محمود بشو اخدمك ؟ تبي تروح مكان او شو فخاطرك بالضبط .. قول لي؟
أبو محمود : لا سلامتك .. بس تدري خلاص بيتنا جهز والحمد لله ( كان يبني بيت في بلده ومستأجر البيت اللي ورانا على طول ) وعاد من شفتك الحين
قلت اسلم عليك .. تدري راح ننتقل بعد أسبوعين وجايز ما اشوفك بعدين عشان اسلم عليك ..
انا : اووه جهز بيتكم ماشاء الله ؟ الف مبروك وربي يجعله بيتا عامر بوجودكم يارب .. والله يابو محمود فراقكم صعب لأننا تعودنا عليك وعلى عيالك
الطيبين مثلك وماودنا كان تروحوا بس مالبيد حيله ..
أبو محمود : تسلم والله واحنا بعد ماودنا نروح تعودنا عليكم وعلى المنطقه بس تعبنا ماديا من الإيجار وخلاص دام بنينا بيت احسن ننتقل نعيش فيه مع اننا راح
نفتقدكم ..
انا : واحنا بعد راح نفتقدكم أبو محمود .. و(كملت وانا ابتسم ) .. وراح افتقد الديك بعد ..
أبو محمود وهو مستغرب : أي ديك ؟ مافهمت قصدك ؟
انا وابتسامتي تزيد : هالديك اللي بسطح بيتكم .. ياخي ماصار ديك هذا والله .. انا اللي اعرفه ان الديك يصقع او يصيح عند كل آذان للصلاه ..
يعني على عدد الصلوات بس هالديك مصخها ههههههه من يقوم الفجر لين ينخمد نصايف الليول وهو ماعنده الا كوكووع وكوكووع .. كوكووع وكوكوووع ..!! ..
كأنه بس هو الديك الوحيد الموجود بالمنطقه هههههه ..
أبو محمود وهو ميت من الضحك : الله ياخذ ابليسك .. قتلتني من الضحك نعم ههههههه ..
انا : صدقني والله ولعلمك كأنه يتعمد يعاندني ..!! أرجع من الدوام الظهر وأقول الحين بتغدا وبنام شوي بس اظل ساعه اتقلب لين يجيني نوم بسبب هالديك وصقيعه كل شوي وبالليل نفس الشي لما ارجع من سهرتي اظل ساعه أحاول انام بسبب الربشه اللي مسونها وصياحه .. لا ومرات يقفز من فوق سطح بيتكم ويوقف في جدار حوش بيتنا وعاد انت تعرف ان غرفتي مقابله بيتكم وساعتها يتمشى هو على الجدار ويبدع ف صياحه عشان يقهرني اكثر وانا فيني اللي فيني من القهر منه ههههههه .. تصدق بقولك شي جايز تستغرب منه ..
أبو محمود وهو يضحك : ايش هو .. قول ؟
انا : لعدة مرات افكر اجيك عشان اكلمك اشتري هالديك من عندك
أبو محمود : ليش عاد ؟
انا : شو ليش أبو محمود ..!!؟ أبا اخليه بالغرفه واقفل الباب والدرايش واجلس اطارده لين اهدّ حيله وبعدين اخنقه وابرد قلبي من القهر اللي فيني منه ههههه ..
أبو محمود وهويضحك : اهااا كذي السالفه هههههه ... خلاص بريحك منه ولايهمك وبشله لما بنطلع من البيت ههههههه ..
بعد أسبوعين انتقل أبو محمود وعم الهدوء بعد رحيل الديك ..
بس سبحان الله بعد مرور عدة أيام افتقدت صياحه وربشته وبالفعل أشياء كثير بحياتنا أحيانا تضايقنا بس لما نفقدها نرجع نشتاق لها ونفتقدها .. بدليل كان هذاك الديك رابشني ...
صح انه جنن بي بس والله كان مسوي جو بدل هالهدوء الحين ههههههه ...
انتهى .. بقلمي

اخوكم / رايق البال

[رايق البال]

شهر ونص تقريبا نعم ولا مامريت صوب هالمدونه
بالله عليكم مال مدونات انا هههههه

[رايق البال]

قصه بقلمي / ياترجع الخمسه ريال .. يا ؟
رابط القصه

http://omaniaa.co/showthread.php?t=9697&highlight

يسعد مساكم/ صباحكم
هلا بالجميع ...

عوده جديده لقلمي وقصه لاتخلو من الفكاهه كالعاده وطبعا اتوقع الآخ العزيز عابر سبيل راح يقول اعرفك راعي مشاكل رايق بس والله هي الظروف اللي تخليني بهالمواقف شو اسوي يعني ههههههه ..
احنا مجموعة شباب تربطنا صداقه عميقه ببعض من ايام الدراسه وبعضنا مع بعض بالعمل والبعض الآخر في جهات حكوميه اخرى يشتغلون ..
تعودنا نلتقي كل اسبوع في احد المطاعم بمسقط نسولف ونعيد ذكرياتنا ونخطط لرحله لبلد او منطقه معينه وبعد العشا والسهره كل مننا يرجع لبيته ..
من ضمن الاصدقاء كان واحد شوي ماسك ايده ( بخيل يعني شوي ههههه ) وكنا دايم نعلّق عليه وخاصه انا اجنن به ..
نادر يتصل بنا وكل تواصله بس عن طريق المسجات لو استجد شي او عشان نرتب للسهره او نروح رحله .. الخ ..
يوم من الايام فجأه جاني اتصال منه وجلس يسولف ويضحك وماخذ راحته على الآخر وانا مستغرب من تصرفه ..!
بعدما خلص اتصاله جلست افكر مع نفسي واحلّل هالتصرف وماقدرت اوصل لنتيجة معينه ..
بعد يومين التقيت بالشباب بالمطعم وظلينا نتظر صاحبنا يوصل ..
وانا معهم فتحت سالفة اتصاله بي واستغرابي منه لأن كلنا نعرفه نادر يتصل ..
تفاجئت ان الكل اتصل فيهم هذاك اليوم اصلا مو بس انا ..!
هنا قلت لهم : شوفوا شباب .. سالفة ان فلان يتصل بي انا مستغرب منها بصراحه لأن كلنا عارفين بخله وكنت ناوي اسأله بس استحيت .. بس طالما انه اتصل فيكم كلكم معناها السالفه فيها شي .. والله مابخليه اليوم لين اعرف السبب ..
الشباب بصوت واحد : حرام عليك .. خليه شو تبي منه ؟ يمكن حس والله هداه وتغيّر ..!
انا : لالا ماتغيّر .. السالفه فيها شي صدقوني وماراح ارتاح لين اعرف ..
الشباب : تمام .. عيل عليك به ..
طلبنا عصير طازج لكل مننا وكلها ربع ساعه ووصل صاحبنا ..
احنا كلنا مبتسمين بإنتظاره والشباب كل منهم يهمس لي : وصل ترا صاحبك .. عليك به ..
انا : تم ولايهمكم .. قال تغيّر قال هههههه ..
وصل صاحبنا وكان معصب وايد ومن شكله واضح انه متضايق ..
سألته بكل براءه : سلامات الحبيب .. شو فيك؟ عسى ماشر ؟
صاحبنا : لا عادي .. مافي شي
انا : شو عادي ..؟ ترا واضح عليك انك متضايق ..! وبعدين تعال قولي .. ياترى شو سبب هذاك الكرم الحاتمي المفاجئ اللي نزل عليك فجأه ههههه واتصلت بي وبكل الشباب هذاك اليوم حسبما خبروني .. اعترف يالذيب لايكون طحت على كنز واحنا ماندري ههههههه ..
صاحبنا : ارجوك لاتذكرني .. اللي فيني فيني ترا ..!
احنا بصوت واحد وعاد زاد الفضول فينا : ليش؟ شو صار ؟ احكيلنا ..
صاحبنا : الله يسلمكم وانا بالبيت جالس العب بالفون فجأه جاني تحويل بقيمة ( خمس ريال ) من رقم مجهول ..!
استغربت وظليت انتظر ربع ساعه ربما يرسل انه غلطان بالتحويل او شي بس مارسل لي ... وعقبها عاد قلت فرصه اسلم على الشباب وقمت اتصل فيكم واحد واحد ..
انا : اهااا كذي السالفه ..!! وانا اقول ليش متصل بي هذاك اليوم .. اتاريك محصل رصيد ببلاش .. عيني ياعيني ناس لها حظوظ فعلا هههههه
صاحبنا بعصبيه : اسكت انت اسكت .. اصلا محد بيجنن بي غيرك ولا كلهم ساكتين إلا انته يبو لسانين تسأل مية سؤال ..
انا : خلاص توبه والله مابقول شي .. كمل السالفه هههههه
صاحبنا : بعدما اتصلت فيكم كلكم وراحن تقريبا اكثر من ريالين فجأه جاني اتصال من نفس هذاك الرقم وكان المتصل حرمه ..
الحرمه : مساء الخير اخوي .. لو سمحت انا حولّتلك بالغلط من ساعه ( 5 ريال ) رصيد ..
صاحبنا : بالفعل وصل هالمبلغ واستغربت من الرقم لأنه مو مخزن معي وظليت انتظر ربع ساعه لعل وعسى صاحب الرقم يتصل او يرسل يستفسر بس ماجاني لا اتصال ولا مسج منه ..
الحرمه : انا انشغلت شوي وعلى بالي المبلغ تحوّل لأختي .. بس هي من شوي اتصلت فيني وقالت ماوصلها الرصيد ولما شيكت مره ثانيه على الرقم عرفت اني حولت المبلغ بالغلط .. والحين لو سمحت اريد ترجع لي المبلغ اللي حولته لك ..
صاحبنا : بالفعل هذا حقك اختي ... بس والله مدري شو اقولك ..!؟
الحرمه : شو يعني ؟ مافهمت قصدك ..!
صاحبنا : الله يسلمك لما شفت محد سأل عن المبلغ توقعته واحد من الربع طلع رقم جديد وكان يبي يفاجئني بالرصيد وعاد تدري قمت اتصل بالشباب اسلّم عليهم .. صار لي زمان ما اتصلت فيهم ..
الحرمه : لا والله ؟ تتصل بالشباب هاا برصيدي انا؟ ياسلااااااااام ..!!
صاحبنا : هذا اللي حصل وماكان قصدي والله وخلاص ولايهمك راح ارجع لك المبلغ الباقي واظن في حدود ريالين باقي بس منه .. تدري مع الشباب شوي خذتنا السوالف وماحسيت بالوقت ههههههه
الحرمه : ياسلاااااام ؟ عيني ياعيني سوالف هاا ماخذ راحتك وايد ماشاء الله..!! شوف هي كلمه ورد غطاها .. ياترجع الخمسه ريال اللي حولتهن لك بالغلط .. يا ادعي عليك وتحمل بهن ليوم الدين ..
صاحبنا : لا ارجوك كله ولا هالكلام .. خلاص بتصرف وبرجعهن لك ..
الحرمه : تمام .. عيل انتظر ولا تتأخر وايد قال خذتني السوالف قال ..! ..
تصرف صاحبنا ورجع لها الرصيد حسب المبلغ اللي كانت محولتنه له ..
انا وعيني تنظر للشباب وميت من الضحك : ماقلتلكم السالفه فيها شي هههههه .!!؟ عشان تصدقوني بس مره ثانيه لما اقول شي ..
صاحبنا وهو معصب : والله ان زدت كلمه غيرها .. بروح ترا عنكم وبزعل
الشباب بصوت واحد : ياخي اسكت عنه حرام عليك .. اللي فيه يكفيه .. صدق انه محد يتوهج فيك انته ..
انا : خلاص بسكت بس والله ترا كنت امزح ولا انتوا كلكم عارفين ان غلاكم عندي واحد ههههه ويالله عاد فرفشوا وطلبوا عشا ميت من الجوع احس نفسي والله ..
الشباب : تم .. الحين بنطلب عشا خلاص ..
طلبنا عشا وتعشينا وكملنا سوالفنا وضحكنا وصاحبنا معنا يضحك بعدما نسيناه السالفه ودفعنا عنه كالعاده هههههههه ..

انتهى .. بقلمي
اخوكم / رايق البال

[رايق البال]

الإدارة العليا للسبلة العمانية
رئيس طاقم الإدارة العليا ورئيـس المرشحـين والرئيس المباشر لسبلة رواق الشعر والخواطر والقصص والشيلات

---

تاريخ التسجيل Aug 2010
الدولة فهالدنيا
الجنس 1
المشاركات 52,921

ترقيت ههههه ولو ان القابي كشاعر وكاتب قصص وخواطر راحت

[رايق البال]

قصه بقلمي / العالم الجليل ونائبه
رابط القصه
http://omaniaa.co/showthread.php?t=51774&highlight=

يسعد صباحكم / مساكم
هلا بالجميع ..

نلتقي مرة اخرى ايها الاحبه وقصه بقلمي يغلب عليها الطابع الكوميدي ربما لكوني لا اميل كثيرا للتراجيدي والكوميديا السوداء وغيرها من انواع القصص ..
في احد القرى كان هناك يعيش شاب ..
هالشاب كان صايع ضايع لا صلاه ولا عباده ولا شغله ولا مشغله ..
لحد يوم من الايام قرر يرحل عن قريته على امل يشوف قريه يستقر فيها وتتحسن اوضاعه وتتعدل ..
ومن قريه لقريه ومن بلد لبلد لحد ماوصل لقريه كان ناسها بسطاء للغايه وعددهم قليل وكلهم اميين ..
لما وصل مدخل القريه التقاه شخص وعزمه للغدا ببيته لما عرف انه غريب وهو يقدم له واجب الضيافه سأله صاحبنا بكل عفويه : مالاحظت بقريتكم مسجد ..! انتوا وين تصلوا ؟
تنهد الرجل وهز راسه بأسى وقال : للاسف احنا ناس جهله واميّين ومانعرف نصلي ولا نعرف آيه من القرآن ..!
هنا عاد صاحبنا اظهر الجديه على وجهه ومعالم الغضب وقال : يعني شوو ؟ شو هالكلام اللي اسمعه منك ؟ لا حول ولا قوة الا بالله العلي العظيم .. هذي صلاه وعباده مايصير هالكلام ..!
الرجل انحرج وقام يبوس راسه على باله انه شيخ جليل وعالم وقور هههههه ويستسمح منه ويقول : اعذرنا الشيخ والله احنا ماودنا نكون كذي بس ترانا مانعرف شي والحمد لله اللي جابك لقريتنا عشان تعلمنا اصول الدين وتكون امام تصلي بنا وراح نتكفل بأكلك وشربك وسكنك ... ارجوك وافق عشان اروح ابشر اهل القريه .
صاحبنا تورط وهز راسه وهو يقول بخاطره : ياربي شو هالورطه اللي انا تورطتها ..!؟ انا بروحي ما اعرف اصلي ولا حافظ آيه من القرآن هههههه .. شسوي الحين بهالموقف ..؟
هو يكلم نفسه والرجل يطالعه وينتظر رده بفارغ الصبر ..
بعد شوي عدّل صاحبنا من جلسته وقال بكل هدوء : والله ياخي هذي مسؤوليه كبيره ولكن راح اقبلها وان شاء الله اوفق فيها وانا انسان ادوّر الاجر وعسى الله يتقبل مني ..
الرجل فرح وقام يبوس راسه مره وهو يجلّه ويقدره وطلع بسرعه وبشر اهل القريه وخبرهم باللي صار ..
فرحوا اهل القريه وجوا كلهم يسلموا على هالعالم الجليل ويشكروه على هالجميل اللي راح يسويه وصاحبنا يتكلم بهدوء ووقار بأنه يبغى بس الاجر ..
وبعد السلام وعبارات الشكر اللي انهالت على صاحبنا قال لهم بكل ثقه وهدوء ان الصلاه راح تبدأ من بكره لأنه اليوم واصل ومرهق من الدرب .. وكان هو طبعا يبي يجلس مع نفسه ويرتب الموضوع يخاف يتورط ههههه ..
لما حانت الصلاه باليوم الثاني وقف قدامهم كإمام وهم خلفه وقام يقول اي كلام يخطر بباله وبآخر الكلام يقول الله اكبر واهل البلد يرددوا وراه مساكين على بالهم هذي هي الصلاه ..
استمر على هالوضع عدة ايام وفجأه لمعت بعقله فكره جهنميه وقال الحين اهل القريه دام مايعرفوا شي وعلى بالهم اللي اقوله هو آيات قرآنيه ليش ما استغل الوضع؟ تعبت كل يوم نفس الاكل تقريبا ولابد اتصرف فهالموضوع ..
لما حانت الصلاه وقف كالعاده امام لهم وقام يقول .. ( ايها الناس اطعموا اليوم معلمّكم الدجاج وبعض الفواكه .. الله اكبر ..) ..
بعد الصلاه جاب له غداه الشخص اللي عليه الدور وتفاجأ ان غداه هالمره نفس اللي حدده لما كان يصلي بهم ..
فرح صاحبنا وقال ياليتني من الاول كذي سويت كان كل يوم غداي غير وعشاي غير ههههه ..
استمر شهور على هالوضع كل يوم يحدد لهم اللي يبي ياكله وهم مساكين يسووه له ..
لحد يوم من الايام كان يصلي بهم الظهر وقال ( اليوم اطعموا معلمّكم السمك واللحم وفاكهة من الموز والرمان .. الله اكبر ) ..
فجأه ..
سمع صوت شخص من آخر الصف يتحمحم ويقول : سبحان الله ..
دار راسه صاحبنا لأن هذا معناه حد فاهم موجود من ضمن اهل القريه او شخص غريب وصل القريه وعارف كيف الصلاه والقرآن ..
فكر بسرعه وهمس بقلبه ياربي شو هالورطه ؟ شسوي الحين لو طلع هالشخص فاهم؟ راح انكشف وانفضح اكيد .. وهو يفكر بسرعه فجأه جته فكره وقال بقلبه .. لقيتها لقيتهاا .. راح اعيد القراءه مره ثانيه بنفس الكلام ولو كرر كلامه وتحمحم معناه شكّي في محله ولازم اتصرف بسرعه ولو ماقال شي معناه الوضع عادي وماعلي خوف ..
كرر اللي قاله وهو قلبه يرجف من الخوف واذنه على آخر الصف يبي يشوف ردة فعل هذاك الشخص ..
تحمحم الرجل هذاك مره ثانيه وقال : سبحان الله ..
هنا عاد تأكد صاحبنا ان هالرجل فاهم ولازم يتصرف بسرعه عشان ماينكشف ..
وبسرعه جته فكره جهنميه وقال راح انفذها وعسى بس يفهمها ..
قال بكل خشوع وهدوء ( يا ايها المتحمحمون لا تتكلمون لكم رزق مما يعطون من ثيران بلا قرون .. الله اكبر ) ..
قالها وقلبه تزيد رجفته من الخوف يبي بشوف شو راح يكون موقف هذاك الرجل وردة فعله ..
فجأه سكت الرجل والشيخ صاحبنا ارتاح وتنفس الصعداء على قولتهم بعدما تطمّن ان الرجل فهم قصده هههههه وانتهت الصلاه وقاموا يسلموا على بعض ولما التقت عين الرجل بعين الشيخ الجليل كل واحد فيهم تبسّم لصاحبه وغمز بعينه هههههه ..
صاحبنا قال لأهل القريه اليوم غدا هالشخص الغريب معي ..
رد اللي عليه الدور : تمام شيخنا ولايهمك وضيفك ضيفنا كلنا ..
راحوا اهل القريه كل واحد لبيته والشيخ والرجل مع بعض راحوا ..
قال صاحبنا للرجل : والله انك فعلت خير لما سكت ولا كنت بتورط ..
رد الرجل : تراني فهمت قصدك عشان كذي سكت مع انه دار راسي من الكلام اللي تقوله بالصلاه..! خبرني شو سالفة هالقريه واهلها ؟ وشو هالصلاه الغريبه؟
رد صاحبنا : انا بعد دار راسي لما سمعتك تتحمحم وتقول سبحان الله وقلت ف خاطري ياربي من وين هذا طلع لي بعد ..!؟ انا صار لي سنين ومنين ضاحك على هذولا وبالاخير يجي هذا ويكشفني وانفضح ..! ويطلّعني من النعيم اللي انا عايش فيه ههههه ..! وقلت خليني اسوي هالحركه لعل وعسى يفهم ويسكت والحمد لله انك فهمت الحركه وسكت ولا كان ياويلي منهم ههههه ولد الحلال هذولا ثيران وبصراحه انا واحد صايع ضايع وهم على بالهم اني عالم وشيخ جليل وعاد انا من شفت كذي وضعهم قلت شو مكلفني اتعب عمري ؟ خليني معهم مرتاح .. ماكل شارب نايم من ظهر هالثيران لا واحدد اللي ابيه بعد ههههه ..
ضحك الرجل وقال : اهاا .. كذي السالفه عيل ؟ وانا اقول ليش كذي يقول لما يصلي بهم ههههه؟ ..
ضحك صاحبنا ورد عليه : الحين عاد دام تعارفنا وتفاهمنا .. شو رأيك اخبرهم بأني اخترتك نائب لي؟ وانت شايف كيف انا مرتاح واموري طيبه هههههه ..
ابتسم الرجل وقال : افا عليك تم .. حد يرفس النعمه بريوله ههههه ..!
صاحبنا ضحك ورد عليه وقال : خلاص عيل ولايهمك .. راح ارتب الموضوع اليوم ان شاء الله ..
قبل الصلاه قال الشيخ لأهل القريه اليوم بعد الصلاه لاتروحوا اريد اكلمكم بموضوع مهم ..
ردوا عليه تم شيخنا ولايهمك انت تأمر امر ..
بعد الصلاه وكل واحد من اهل القريه ينتظر بفارغ الصبر كلام الشيخ ..
تنحنح الشيخ وعدّل من جلسته وقال بكل هدوء ووقار : يا اخوان الانسان تحكمه ظروفه وانا اليوم معكم وقايم بواجبي ..
قاطعوه اهل القريه وردوا بصوت واحد : احنا نشهد والله ان لولاك انته كنا في ظلام نعيش ..
رد الشيخ بوقاره المعهود وهدوءه وقال : جزاكم الله خير .. الموضوع اللي اريد اكلمكم فيه هو اني انسان اولا واخيرا .. جايز امرض او اموت او ارحل او اي شي يصير وحرام بعد كل الجهد اللي بذلته ترجعوا للجهاله وعصر الظلام .. عشان كذي راح اخلي هالرجل الغريب نائب لي ويكون بدالي لو صار لي شي لاسمح الله وتطمنوا انا اختبرته وماشاء الله عليه طلع رجل تقي وورع وحافظ القرآن صم مثلي طبعا .. شو قلتوا ؟
ردوا اهل القريه : الله يعطيك طولة العمر وعسانا ماننحرم منك شيخنا .. ومن بعد كلامك احنا مالنا كلمه .. كلمتك على قدام وجزاك الله خير دوم تفكر بمصلحتنا .. وقاموا يبوسوا راسه ويشكروه وهو يردد استغفر الله .. استغفر الله ماله داعي الشكر يا اخوان انا منكم وفيكم وانا انسان ادوّر الاجر ..
كل هالاحداث تصير قدام هذاك الرجل وهو ساكت ويهز راسه ويقول بقلبه ( حسبي الله على ابليسك اسميك داهيه نعم ماينقدر عليك هههههه ) ...
وعاش صاحبنا ونائبه في القريه معززين مكرمين المده اللي كانت لهم بالحياه ..
انتهى ..
بقلمي
اخوكم / رايق البال

[رايق البال]

فن الزهيريات / المسبع ( نصين للرايق )
رابط الموضوع

http://omaniaa.co/showthread.php?t=28531&highlight=

يسعد صباحكم / مساكم
هلا بالجميع ...
قدمت منذ فتره طويله نصوص عديده لفن المسبّع كما يعرف بالسلطنه وتحديدا بالمنطقه الشرقيه وبعض مناطق الباطنه او الزهيريات كما يطلق عليه في بعض دول الخليج والموال كما يعرف ببعض الدول العربيه مثل مصر وبعض دول الشام كما قدمت شرح وتوضيح عن هذا الفن والموروث الجميل الذي فقط يتكون من 7 ابيات وربما لذلك تم تسميته بالمسبّع ..
وهو فن يعتمد على التلاعب اللفظي بالكلمه بحيث ان الكلمه لها عدة معاني مع انها نفس الكلمه وبنفس عدد حروفها كما ان الثلاث الابيات الاولى تكون على قافيه واحده لنفس الكلمه مع اختلاف معناها بالتأكيد كل مره والابيات الثلاث التي بعدها تكون قافيتها على كلمه اخرى مع اختلاف معناها ايضا اما قافية البيت الأخير فتكون بنفس كلمة قافية الابيات الثلاثه الاولى ..

نصين سبق نشرهما لي منذ فتره طويله هنا واعود مجددا لنشرهما مع التوضيح البسيط بالالوان والعبارات واتمنى ان ينال رضاكم ...

النص الاول :

اوصل لداره ونادي بوصفه وسمّي ( ناديه بإسمه )
وصلّي على المصطفى ان شفته وسمّي (قول بسم الله الرحمن الرحيم)
واحذر شراب العسل مخلوط به سمّي ( السم الزعاف )
قوله المولّع حشى ماكان لك سالي ( لم ينساك )
وكيف يسلاك واسمك ياهوى سالي ( اسم البنت وطبعا مجرد اسم لايمت لي بصله لاتوهجونا بتوقعات غير صحيحه ههههه)
ولا مر يوم(ن) وعنك القلب ماسالي ( لم يسأل عنك )
واسمع ردوده وقبل توادعه سمّي ( قول بسم الله الرحمن الرحيم )

النص الثاني :

يزداد شوقي اذا مالليل هلّ وجن ( اقبل/ جاء )
واقطع دروب(ن) خشاها كل انس وجن ( مخلوقات الجن)
ولاهمني فيه من قال المولّع جن ( فقد عقله )
للحب ناسه وللميدان خيّاله ( اصحابه وفرسانه )
واللي يحبه خفوقي دوم ب خياله ( فكره وعقله )
ويفّز قلبي اذا مالاح ب خياله ( اقبل بشخصه وشكله )
ويزيد شوقي اذا مالليل هلّ وجن ( اقبل/ جاء )

اخوكم / رايق البال

[رايق البال]

هلا بالجميع ..
راح اقدم خاطره + قصيدتين + 4 قصص كتبتهن زمان وللأسف صارن بالارشيف مع 90% من مواضيعي منذ انتسابي للسبله في 2010 ..
ياخي سالفه هذي روح الارشيف وجلس دور هناك ههههه وعاد انا بلاوي كاتب سواء كانت قصص او خواطر او قصايد ..
عمليه جدا متعبه بكل امانه انك تجلس تقلب كل الصفحات وبكل اقسام الرواق عشان تحصل قصيده انت كتبتها او خاطره او قصه ههههههه

[رايق البال]

قصه بقلمي / حلوى المدير العام
رابط القصه بالارشيف

http://archive.omaniaa.co/showthread.php?t=728872

يسعد صباحكم / مساكم
هلا بالجميع ..
عوده اخرى لقلمي وقصص صارت لي زمان والبلاوي اللي طبعا كنت اسويها ههههههه ...
زمان الله يسلمكم كنا مجموعة شباب نشتغل في دائره بالقطاع العام بإحدى المديريات ( ولازلت طبعا في نفس المديريه وان كانت هناك تنقلات تشمل الكل بشتى الدوائر كما هو متبع لإزدياد عنصر الخبره ) ..
كنا انا و10 موظفين في صاله كبيره وكل مننا يؤدي وظيفه معينه ( صادر .. وارد .. اجازات .. علاقات .. طباعه .. ارشيف .. الخ ) وكان مدير الدائره الدائره ونائبه بغرف مستقله ويفصل بيننا وبينهم باب ..
كنا انا والشباب بصراحه نربش وايد وخاصه انا وواحد من الشباب اسمه احمد ..
كثير مدير الدائره ينزعج من اصواتنا وربشتنا بس كان انسان كثير طيب بصراحه ويجي ينصحنا ويقول .. شباب هدوّا شوي وركزوا في عملكم ...
يوم من الايام اتصلت سكرتيرة المدير العام بمدير الدائره وقالت له .. المدير العام يبي الموظف احمد والموظف .. ( انا وبكل فخر ههههه ) .. وطبعا خبرته السبب بس هو ماخبرنا ليش المدير العام يبينا ..
دخل علينا مدير الدائره وقال : احمد و.. روحوا للمدير العام يبيكم الحين ..
تحركنا انا وصاحبي احمد واحنا بالممر كنا نسولف ونتسائل ياترى شو يبي مننا ؟ .. غريبه ..!
وصلنا عند السكرتيره وسلمنا عليها وسألتنا ..
: من اللي راح يدخل اول ؟
رديت عليها انا : انا راح ادخل بالاول
قالت لي : تمام .. عيل انت يا احمد انتظر بالصاله ومن يطلع ... ادخل انت ..
رد احمد : تمام ولايهمك ..
دخلت انا وبقلبي وعقلي الف سؤال وسؤال .. ( شو يبي ياترى ؟ عمره ماطلبنا من قبل نجيه المكتب ..! .. الخ من تساؤلات ) ..
سلمت عليه وقال لي : استريح بالكرسي ..
جلست وفجأه .. قام هو من كرسيه ونظر لي وقال : الحين انتوا وصاحبك احمد ايش هالربشه والازعاج اللي مسوينها بالمكتب هاااه ؟ على بالكم ماعندي خبر ..!؟ لا انتوا اللي تشتغلوا زين ولا عاطين الموظفين اللي معاكم فرصه يشتغلوا من الازعاج اللي مسوينه ..
شوف .. هذي آخر مره انبهك ولو كررتها راح اضطر اوجه لك انذار .. ماصارت هذي .. مصختوها انتوا ..!.
طبعا كان يقول لي هالموشح اللي يثلج الصدر هههههه وانا ساكت ومنصدم ..
من خلص قال لي : خلاص استوعبت اللي قلته ؟
قلت له : ايوا والسموحه منك على تقصيرنا وان شاء الله ماراح تتكرر ..
رد علي وقال : طيب بنشوف .. خلي زميلك احمد الحين يدخل ..
طلعت وانا افتح الباب للخروج رسمت ابتسامه بالغصب على وجهي عشان اوهم احمد بشي نويت عليه ..
احمد كان ينتظر خروجي بفارغ الصبر طبعا عشان يعرف شو صار وليش كان المدير العام يبينا ..
طلعت وشافني احمد ابتسم وبسرعه قام وسألني : هااه بشر ؟ شو كان يبي مننا ؟ ..
رديت عليه وبهدوء اعصاب وابتسامه ولا اروع ههههه .. : مفاجأه .. تصدق !؟
احمد : مفاجأة شو .. حرام عليك لاتلعب بأعصابي وقول لي شو كان يبي ؟
نظرت له وكلي ثقه وابتسامتي تزيد وقلت : يااه يا احمد .. شو رحب فيني المدير العام وقام يشكرني وقال انتوا وزميلك احمد نموذج للشباب الواعد والموظفين الأكفاء وانه وايد راضي علينا .. حتى لعلمك جايز يمنحنا علاوه على الجهود اللي باذلينها بالشغل ..
كنت اقول هالكلام له وانا اشوفه ياحراام مصدق وفرحان وابتسامته تزيد هههههه وكل شوي يقاطعني ويقول : والله كذي قال ؟ الله يبشرك بالخير كنت خايف انا والله من هاللقاء المفاجيئ معه ..
قلت له : لاتخاف افا عليك راح تسمع موشح ولا اروع زي منا سمعت هههههه .. يالله روح ادخل عليه انا راح اسبقك للمكتب ..
دخل احمد وانا ميت من الضحك بس ماسك اعصابي ههههه .. وانا رايح للمكتب شفت بالممر مدير الدائره .. اول ماشافني ابتسم وقال : هااه ؟ اكلتوا من حلوى المدير العام اللي كان مجهزنها لكم ؟
انا سكتت .. وهو كمل كلامه .. لما انا انصحكم مانفع معكم .. تستاهلوا اللي جاكم منه ..
وصلت المكتب وقلت للشباب : الشيمه مسكوا احمد لأن اكيد ناوي على شر من يرجع .. وخبرتهم السالفه وماتوا من الضحك ..
شوي إلا وانا اسمع احمد جاي وهو يقول : وينه هذا وينه ؟ ابي اشوفه بس .. علاوات بيعطينا علاوات هااه ؟ .. الله اكبر عليك بس ..!! هههههه ...
دخل احمد وناوي يضربني بس طبعا الشباب جلسوا يهدوّه وانا وراهم ميت من الضحك ... والحمد لله هدت اعصابه هههههه

انتهى

اخوكم / رايق البال