[ودي أكون أي شخص ثاني]

حلقة مفقودة بعنوان (حمـــــــــد)




منصور تكلم بصوت خفيف:...خلني جي .... خلني ...... شـــ..ـــوي


ذياب كان مب عارف شو يسوي وجان يطلع وزقر على جون،،، ويوم دخل جون
وشاف على منصور جان يخاف هو الثاني،،تقرب وحاول يكلم منصور ومنصور
كان في وعيه بس تعبان........تعاضدوا وشلوه الين وصلوه السرير....

ذياب يتكلم بسرعة:....لازم نوديه المستشفى....

منصور وهو يشوف حواليه:....لا مـ..ــا..يحتاي ..

جون اتصل بدكتور العايلة الخاص الي يداوم في المستشفى الخاص (نفس المستشفى المرقد ابوه فيه)
وخبره بالي في منصور..وقال لهم بيطرش لهم سيارة اسعاف او انهم على طول ييبونه عنده
لانه مدوام ساعتها وهناك بيشوفونه زين.....


من جهة ثانية ذياب طلع تيلفونه وبالمرة اتصل بأبوه وخبره ان منصور تعبان،،،
وجان يطلع ضاحي بسرعة من بيته وعلى طول وصل بيت حمد.......ويوم دخل على منصور
وشافه صدج تعبان... وبكلمة منه شلوا منصـــور المستشفى...ذياب وضاحي في سيارتهم ومنصور وجون في سيارة.....

طلعوا مباشرة على المستشفى ..وفي نفس الوقت اتصل ضاحي على حمد وطمنه بأن منصور بخير...
طمنه هو الثاني لان الي فيه كافيه...

وقبل ما يوصلون المستشفى:
وفي سيارة ذياب:

ذياب خبر ابوه انه تهاد ويا منصور.....

ضاحي انهد على ذياب:........وانت ما تيووووز..... ما مطرشنك تتنازع ويا الولد..

ذياب ساكت ويشوف على الطريج...

ضاحي يتنازع:...ما تشوفه شرات اليتيم....منو عنده ؟ خبرني؟؟؟... ابوه طاح عنه ولو عنده ما خلى قشاشة تطيح عليه....

ذياب حاول يهدي ابوه:...ابوي....ابوي......

ذياب تكلم:...ابوي ما تنازعت وايد وياه بس تهادينا شوي....

ضاحي:...وشو له ؟؟؟ خبرني ؟؟

ذياب كذب وماقدر يخبر ابوه عن غرشة الخمر:..ماشي ضايج بي....ليش ما يرد على الاتصالات....
وبعدين ابوي تراه هو تعبان من أول ....لا تيلس ترد كل شي علي...

ضاحي وكلمة قالها:....اشوفك عيدها غير هالمرة.......

سكتوا دقيقة..

ذياب شاف على ابوه:....بو هلال...ولا تزعل.....منصور ولد عمي ومالي البد منه....بس ترا ما اعرف شو اييني...

ضاحي ساكت...

ذياب متلوم وما يريد يزعل ابوه:....وراسك الغالي اني اعزه ومن معزة عمي حمد....

ضاحي بعده في سكوته...

ذياب يشوف على ابوه بإبتسامة:...هاه عاد عطنا ويه شوي....ابويه!


ضاحي:...اوففف منك...مادري على منو طالع...بس ادري بك ما تطيق منصور ...ليش انه خذ عنك عمك حمد!

ذياب شاف على ضاحي،،

ضاحي:...اعرف شكثر كنت ويا عمك قبل.....بس مهما كان هذا ولده...


ذياب خذه الصمت.....وصح انه عصبي لكن هذا من غيرته...وتراه كان الاقرب من خوانه لعمه حمد
حتى ان حمد كان معتبرنه مثل ولده واكثر...والحين وجود منصور خذ منه عمه....وصار ما يشوفه وايد......
عشان جي كانت بينه وبين منصور حساسيات....بس اليوم كان غير وتغير شي داخل ذياب من صوب منصور...
يمكن الي صار في البيت العود....الدمعة الي شافها في عين منصور.....دمعة خوف منصور من انه يفقد ابوه......




يتبع>>