مع اني مامن الناس الي تتابع برامج ومسلسلات في رمضان..لا بالليل ولا بالنهار..والحمدلله من سبع سنوات قدرت
امنع نفسي من التلفزيون...الا مراات لما نجلس نتقهوى والعيال يحطوا سبيستون او شعبيه الكرتون

بس ليله رمضان كنا ننتظر اذان العشاء ونتقهوى..وطبعا الاشبال مسوين حشره بالصاله وربشه
وكعقاب لهم قلت بغير قناتهم المفضله وحطيت ام بي سي
وكان فيها برنامج اسمه(الصدمه)..برنامج جدا مؤثر وحلو
موعده بعد الافطار يمكن بساعه..قررت اكسر القاعده واتابعه...لان فكرته حلوة


فكرة البرنامج مناقشه قضيه من قضايا المجتمع واثنين من الممثلين يتنكروا ويطرحوا المشكله امام الناس بمشهد تمثيلي استفزازي . يشوفوا ردة فعل الناس وهل بتتدخل ولا بتسكت على الغلط...وطبعا هالمشهد ينعرض باكثر من دوله مثل مصر والسعوديه والامارات ولبنان والعراق
برنامج انصح الجميع يتابعه


الحلقه الاولى كانت عن عقوق الوالدين
ممثل مسن يلعب دور الاب واخر شاب يلعب دور الابن وتبدا التمثيليه مع الكونتر لما الاب يترجى ابنه يشتريله حاجه والابن ينهره ويشده ويستخدم معه الفاظ نابيه والاب يوقف مكسور ..وبعدها بالغلط يوقع حاجات من على الرف ويبدا الابن يصرخ عليه ويطالبه ان يلم الى طاح بدون مايساعده ويمنع اي احد من الناس يساعده
طبعا ردات الفعل المتباينه بين النصيحه باللين ومطالبه الابن باحترام ابوه ومنهم الي عصب عليه وقاله انت ماتستاهل يكون ابوك والي بكى بصمت

مشهدين حركن مشاعري...
الاول لما شاب اماراتي عصب وماتحمل الي صار قام وطلع عشان بمسك اعصابه وبعد من خلص المشهد واتضح انه تمثيل قال: اتمنى اني يكون ابوي موجود واقضي معاه خمس دقايق من عمري...خمس دقايق اقايضها بعمري الي باقي


المشهد الثاني بالعراق ...شاب كان متوتر وهو يشوف الشاب يزف ابوه ويبهذله قدام االناس ومبين انه يحاول يضبط اعصابه ...فجاه قاله(انت شلون تحشي هيش ويا والدك)؟بس الشاب الممثل ما رد عليه وعطاه ظهره ...فما كان من هالشاب الغيور الا مسك الممثل وسطره 3 طراقات لحد ما طاح وبعدها هجم عليه وضربه لحد ما طاقم التصوير المتخفي لحق عليه وفرقهم

الحلقه الثانيه... عن اساءة الخدم
وكانت ردات فعل النساء قويه ومنصفه مع الخادمه المعنفه في مكان عام لدرجه ان وحده قالت للمخدومه انا بستدعي الشرطه وبشهد مع الخادمه


مع اني اعرف ان مجرد تمثيل بس تفاعلي مع الاحداث يثير غيرتي وحميتي على هالسلوكيات...ولما اشوف ردات فعل المجتمع والناس على الغلط اقول الحمدلله ان الناس فيها خير
ولو خليت خربت