1_16 (اﻷخيرة) ســـــــــــواآلــف بنـــــاآات / بقلم ضي الشمس

[Raba]

وش هنا عندكم مااروم اقرا كل شي

فاتك نصف عمرك عيل غلوي لحقي وقري ههه

[Raba]

صباحووو ..

باارت جداً جميل بس بصراحة كسرت بخاطري علوووش ..
معقوله في بنااات يسون كيه ولا بعدهن صف عااشر ..!
اهم شي انها طلعت من التهمه براءة ..

يسلمووو ضيووون وبإنتظااار البارت القااادم ^^

تعرفي انا ما متصوره ان إلي سوت كذا اونها من الاهل
احد يشهر باهله سبحان الله ناس عقولهم في صيمهم ،،
يسلم حالك تسلمي للمتابعه غاليتي يعطيك العافية وبارك الله فيك

[Raba]

صباح الخير
ضي هالمره تأخرت بالمرور ومنك العذر عزيزتي

البارت 13 كان رائع وقرار الأم في محله بأخذ الفون
بس ترى ما ينلامن مسكينان الحب عامل عمايل هههههههه

البارت 14 جدا جميل وأحداثه واقعيه للأسف يا ما صارت بالمدارس .. الفتن وتشويه سمعة البنات
رغم إن هالشي ابد مو صحيح ما أدري شو اللي يستفيدن منه
بس بكل تأكيد في النهايه لابد أن الحق يظهر

بإنتظار البارت القادم
ويالله قدمي الزواج .. اللبس البلوشي صار جاهز ههههههه

مساء الورد غاليتي منورة بصراحة فقدت مرورك
ههههههههه جهزية حج بــــــــــارت بكرة لاه مره جايبين فرقة درامس

يعطيك العافية غاليتي وبارك الله فيك اسعدني تواجدك وتفاعلك

[Raba]

البــــــــــــارت الــــخامـس عشـــــــــــــر

الحب هو انت قلبك نبضك عطائك
احبك بكل اللغات صديقي وصديقتي
احبك بكل اللغات زوجي حبيبي
احبك بكل اللغات غاليتي امي والغالي ابي
احبك بكل اللغات اخي واختي
وهل سيجف الحب حينما تملئون قلبي ؟!

مرت الايام وقرب الفاينل اجزام تعرفوا شو يعني فاينل اجزام لصف 12

يعني ما تنام في اليوم غير4 ساعات هذا اقصى حد وكل اللي

تسويه نوم وشرب واكل ومذاكر يعني فعلا الوضع استرس

وهذا وضع الجاسوسات كان من ساعة 5 مذاكر لحد ساعة وحدة بالليل

إلا علوش وميّ وفيّ ما شاء الله عليهن

ذيك الفترة شغلهم اكل شوكلاته ورقص ومذاكر يعني تعرفوا

اللي يبي يذاكر وتحس الشيطان واقف براسه يجيب له اغنية ورى اغنية

ولا من التعب يحس يبي بريك بس عشان يرقص يطبخ يسوي اي شيء

يستعرض مواهبه في ذيك الفترة الحرجة هههه

وها هو اول يوم اختبار قد اقبل على البنات

علوش: هاي يا بنات مستعدات

نوار: احس بخوف ياخي

نور: بعدني ما حاسه بشيء

مروش: عديمة احساس مبونك

نور : عينك

ميّ: امورك طيبة ما تغلبنا ورقة طال عمرك

فيّ: ربي يسهل علينا قولوا الادعية قبل لا تدخلوا وربي يسهلها

ميّ:ان شاء الله، علوش كيف اوضاعك

علوش: مثل اوضاعك طال عمرك انا ولا الورقة النذلة ذيك

ترن ترن ترن ورن الجرس

طبعا الشلة كلها بنفس اللجنة عشان بالاسماء

وناهيكم عن انواع الغش التي تحدث بس ترا البنات ما يغشن

بس يتأكدن من اجابتهن من بعضهن هههه

كان الاختبار مدته ساعتين ونص

ولما انتهى الاختبار تسمع البكاء والنحيب وانواع زقزقات العصافير

الا علوش وميّ وفيون ماسكات بطنهن من الضحك

ترا الضحك وسيلة تترجم الخيبة اللي يحسن بيها ههه

هو جدول الاختبارات كان في كل اسبوع 3 اختبارات والحمدلله عدت فترة الاختبارات

وبعد الاختبارات كانت ملكة ميّ ومحمد يوم الجمعة ويوم السبت حفلة تلبيس الدبلة

طبعا في بريك لهن اسبوع من المدرسة بس مال الثنوية يأخذوا اسبوع ثاني

من جيبهم هههه

كان ذاك اليوم عشان عفسه وكذا فميون ما واحت تتجهز بس كانت لابسه

لبس عماني مطور لونه احمر وشعرها كان رولات

و مرفوع اما الميكب كان الروج احمر شاذ والميكب

العين خفيف بس طالعه عسله ومزه

اما الجاسوسات كانوا معها لابسات كلهن دراعات مغربية

حتى فيون كانت لابسه مثل البنات بس تشكيلتها غير ومودليها مغربي

مطور وكلهن شعرهن مطلعاتنه والشعر رولات بس

ما عدا علوش كانت محجبه < مطوعتنا ذي

كانت الحفلة مره حلوه طبعا ميّ مستانسه ما عندها شعور فوادها

كما العافية انها ترقص ما قادرة تمسك نفسها كل شوي تنادي

فيّ عشان تنزلها ترقص وفيّ تسفها اخر شيء

رحمنها راحن كلهن الجاسوسات ونزلنها عشان ترقص معهن

واجاء محمد حبيب القلب وتوسط المكان وطبعا ما شاء الله عليه

كان لاعي

علوش: نفسي بس اعرف شو يقولوا ياخي؟؟

مروش: نفس شعورك احس هههه عندي فضول<تصدقوا حتى انا عندي فضول

اللي متزوجة تعلمنا شو تقولوا ههه

فيّ: يقولها طالعه حلوه

نور: يعني انتي فراس قالك كذا

فيّ بخجل : ايه

نوار: وشو قالك بعد؟؟؟

فيّ: ما يصدقن احد يفتح شيء بمره يبن يعرفن الاسرار

علوش: جاي فراس؟؟؟

فيّ: ما تشوفي استاذة نهى موجودة يعني من يجيبها

نور: من كذا كاشخه الحبيب هنا

فيّ: تصدقوا بعده ما شافني

مروش: بتغدرنا وتروح عنده

فيّ: اكيد بروح عنده عيل اطالع وجوهكن انتن

نوار: مالت عليش ربي يرزقنا

علوش بصوت عالي:آآآآآآآآمــــــــــــين

مروش ونور: يا رب

فيّ ضحكت وراحت عند فراس تسلم عليه

وانتهى اليوم وانتهى الاسبوع وجات المدرسة

طبعا النتيجة طلعت الحمدلله الجاسوسات جابوا كويس ونسبهم في التسعيين والثمانيين

يعني علوش وميّ وفيون ومروش نسبتهم في التسعيين

ونور ونوار كانت نسبتهم في الثمانيين

زلوخ نسبتها في الثمانين وكانت مقهورة من شلة الجاسوسات لانهن

جابن المراكز الاولى على الصف وهي جابت المركز الخامس

وكل بنات الصف فرحانات<حسد

عشان ان زلوخ ربي جازاها كانت حيل مغرورة

بينما الجاسوسات عادي شلة مرحه ما تحقد ولا تزعل ويساعدن اي احد ويغششن

مو مثل زلوخ اللي تحب تغش بس ما تغشش<ترا هالنقطة مهمه عند البنات عاد هههه

اول اسابيع من الفصل الثاني كان محاضرات ومستشاريين نفسيين حج صف 12

بعد النسبة والامور طيبة

وعاد بعد اسبوعين ابتدأ الكرف مرة

كانت استاذة الاسلامية دائم تتكلم عن الزواج وانها بتحضر

عروسات البنات وما ادروا شو من الكلام

ميّ عصبت ما تطيق فلسفة هالاستاذة يعني كل معلمات الاسلامية

ممتعات إلا هذي

ولما كانت تقول الاستاذة بحضر عرسكن مال غياظ

قالت ميّ: عيل استاذة بسوي اغاني تحضري

ا.الاسلامية : لا ما احضر اذا اغاني بس ما يمنع اجي الصباحية

مروش بهمس: يعني شبقه

الجاسوسات ماسكات ضحكتهن

ميّ: حياك الله بس عاد شكلنا بنسافر

أ.أسلامية : ما يخالف بزورك بعد العرس

ميّ: ان شاء الله الله يتمم على خير

أ.أسلامية: آمين ربي يوفقك

ميّ: امين ربي يسمع منك جميع

اما استاذة الرياضيات شادة حيلها تشرح وهي من عاداتها من تخلص

تقول بنات وصلت المعلومة ويردن البنات وصلت

وذاك اليوم الاستاذة تشرح في المماسات والدوائر

لما خلصت شارحه قالت : وصلت!!!!<قصدها المعلومة

كل البنات : وصلت استاذة

علوش: تكرسعت ما وصلت كان هناك مطب راس مروش

مروش : في عيونك

والصف نقع ضحك والاستاذة تضحك : ما تجوزي عن سوالفك علوش

علوش: نغير لكم الجو ترا هههه

الاستاذة : زين والله التغيير حلو

عند فيصل كان مواعد فراس طالعين كذا طلعة شبابية

بالاصل كان عندهم مشوار ضروري وعاد بعدين قرروا يستغلوا طلعتهم ويستانسوا

فرجعوا متأخر لبيت فراس

فراس: فيصل لا ترجع الحين البيت نام هنا والصباح رباح

فيصل : لا ما يصير انت ما معلم اهلك وهم انا ما علمتهم

فراس: يابوك عادي بعلمهم الصبح ما مشكلة

فيصل : وقت ثاني

فراس: نلعب بليستيشن وبكرة انت اجازة ترا ما عندك شيء

فيصل : بس عيل شورك وهداية الله

ذاك اليوم جلس فيصل بيت فراس وكانوا مستمتعين بين لعب البلستيشن واكل المطاعم

والعفسه كلها في المجلس المهم عاد لما اصبح الصبح

نهض فراس وراح استحم ع ساعة 11 وطلع السوق عشان يطلب

غداء ويجيب فواكة للبيت

اما نهى فحسبالها فراس نايم في المجلس وللحين ما قام

راحت حتى تصحيه ولقته نايم (طبعا اللي نايم فيصل مش فراس) اول

شيء تنادي عليه : فروس قوم بسك نوم يا الكسول قوم روح السوق

فيصل مغطي وجه ومطلع رجله وساكت

نهى ما خلته : فروس يعني ما تقوم لاه ؟؟!!

فيصل للحين ساكت

نهى راحت تنز شعر رجله < ولا وحده تجرب في اخوها

لا يقوم يصكك في الجدار ههه

ما تقوم يعني وجالسه في رجله

فيصل ما قدر يستحمل وفتح البطانية : انا ما فروس انا فيصل

نهى منصدمة صرخت : اااااه

فيصل : اووووش اوووش سكتي لا يجي فروس

نهى ركضت المطبخ تدور وين جبهتها ما لقت نفسها غير بوجه فراس

فراس: شفيك تصرخين

نهى وهي تاخذ نفس وما عارفه شو تقول وبتلعثم : س س سسن ن نوووورة

فراس: الله يلعن بليسك ترا فضحتينا بصراخك عاد ما سنورة و ترا احد في البيت هنا فيصل

نهى وبعدها تأخذ نفس: ووو تو تو تو تتكلم

فراس: تراكم ناييمين كنتوا ما عبالي صاحيين

نهى هدت شوي : تمام نزيد غداء

فراس: خلاص طلبت من المطعم بس سوا سلطة وعصير وفوالة وانا

جايب خضار وفواكة

نهى : طيب

اما فيصل : الله يلعن بليسها عاد ما حركات عليها

عورتني بس انها حلوه اخت فراس ما عبالي كذا تطلع عسولة

ولا نهى تفكر: انا شسويت !! وابيلي ضاع مستقبلي لا بعدني

جالسه عليه وانز شعره شو بيقول يا رب ما يخبر فراس

وجهزت السلطة وكل شيء وصنعت لهم حلويات

ثم اتصلت على فراس حتى يجي يأخذ الفطور والفواله

يفطروا اول ثم يتغدوا

اما فيصل قرر انه يرجع البيت ويكلم ام نوفل تخطب له أستاذة نهى

وفعلا كلها اسبوع حتى راحوا يخطبوا نهى اللي كانت مندهشه

على اللي سوته في فيصل بعده يبيها استلموا الرد بالموافقة واول ما جاهم الرد

بعد اسبوعين امتلك عليها فيصل والعرس بس تخلص المدرسة الانها مدرسة

بيتزوجها <مستعجل فيصل على شو ما ادري

ع فكرة يوم الملكة دخل عندها وجلس عندها

قالها : تتذكري يوم نزيتي شعر رجلي بس مردورة < لازم يفشلوا الواحد

ما في امل يكونوا رومنسيين بعد المواقف اللي تفشل ههه

نهى حمر وجها واخضّر واصفّر من الخجل والفشله وكله ونزلت راسها : اسفة

فيصل : بس ترا كنتي مزه بدون شيلة

نهى تضحك ومنزله راسها: خلاص عاد

فيصل: فديته اللي يخجل انا

نهى: فيـــــــــــــــصيل

فيصل: عيون فيصل

نهى: خلاص

فيصل: ليه تستحي تراك زوجتي < طيب زوجتك بس مو من اول لقاء

عاد حبوب ما تكون نزقه هههه

نهى : بعدني ما تعودت عليك يمكن

فيصيل : عادي حبيبتي بتتعودي علي

نهى : ان شاء الله

الجاسوسات كانوا مستانسات على اللي صار وفيّ حيل فرحانه لان نهى صديقتها

وحميتها وزوجة عمها صارت هههه

اما علوش : انا متى بيجي دوري ياخي كلهم تزوجوا

مروش: مع مستعجله هالبنت بيجي دورش صبري خلي يجي دورنا معاك اول

ميّ: يا العيارة ما احد تزوج بعده

علوش: ابي اضمن مستقبلي يا ميّ ضبطيلي حمييك

ميّ: بحاول ولا يهمك

علوش: هذي الصديقة الفعلية بصراحة ما مروش عندها كدوس اخوان ولا

قالت تتبرع فيهم حال صديقاتها

مروش: فعينك خلني القاهم ذولي لاخوان ترا إلا 3 واحد صغير وواحد كله مسافر طيار

باقي لي خلود ما قال يبي يتزوج ولا ازوجك اياه

وبعدين التو يابوك يختاروا وحدهم

علوش: هيه نعم صدقتي يختاروا وحدهم

نور : مهتلكات نعم انكن

علوش: سنة الحياة

نور: ربي يزوجكن كلكن الزوج الصالح

علوش من فوادها : آآآآمـــــــــــــين

وكلها كم شهر وجاء الفاينل اجزام بس عاد هالمرة كان الوضع مقلق

اكثر هنا الفرصة الاخيرة للي تبي تعدل نسبتها

وفي نفس الفترة محمد جاته بعثة دكتوراة في بريطانيا

محمد اتصل على ميّ بعد دوامه

محمد: هلا ميون حبيبتي كيفك

ميّ: هلا حياتي الحمدلله طيبة كيفك انت

محمد: انا بخير دام حبيبي بخير

ميون: عساك دوم يا عمري كيف كان يومك

محمد: الحمدلله مبسوط مره انتي كيفك مع الدراسة ذاكرتي ؟؟

ميون: ايه حبي الحين خلصت الاحياء الحمدلله

محمد: الحمدلله ابيك تجيبي نسبة حلوه واعلى من السمستر اللي طاف

ميون : ان شاء الله يا رب ها ما علمتني ليه مبسوط

محمد: ممممم جاني عرض بعثة دكتوراه

ميون : من جد !!

محمد: ايه

ميون: وين؟؟

محمد: بريطانيا

ميون : يا حياتي ألف ألف مليون مبارك لك هالخبر مره حلو

محمد: فديتك حبيبي يبارك في عمرك

ميون: شو بتروح ؟!

محمد: شو بنروح ؟؟

ميون: ايه عادي

محمد: خلاص عيل بثبت عليها

ميون: ايه حبيبي وانا ان شاء الله بختار بعثة وبنكون مع بعض

محمد: ولو ما طلعت لك بعثة بتروحي معي؟؟

ميون: اكيد بروح معك واخلي ابوي يساعدني بها الموضوع عاد ويعدل

بعثتي من داخلية لخارجية

محمد: انتي شدي حيلك عشان ندرس نفس المكان

ميون: ان شاء الله حبيبي ربي يوفقك

محمد: ويوفقك ويحفظك ولا يحرمني منك

ميون: امين ولا منك يا رب

ميووون مره مستانسه على محمد وكان لها دافع انها تجتهد في الفاينل حتى

تروح بعثة معه وفعلا هذا اللي صار بس ما بنستبق الاحداث

في اخر يوم مدرسة كان البنات مسوين حفلة لصف ويوم تخرج ولابسات ملابس

التخرج وميكب وتصوير والامهات جايات وصار تكريم للمعلمات والطالبات

والامهات بس عاد مروش ما كان عبالها ان الامهات يجو فما خبرت امها

وكانت حزينة نوعا ما تتكرم وامها ما موجودة

المهم بعد الحفل التخرج جلسوا البنات يصوروا وصار العزاء في الصف

من صف خامس لصف 12 كانوا مع بعض وهالسنة راح

الكل يروح في طريق ويمكن ما راح يشوفوا بعض الا في المناسبات

يعني هذا اخر تجمع لهن وجايبات كيك وطالبات من المطعم مندي

وجلسن جلسة جماعية يآكلن ويودعن بعض حتى رن الجرس لطلقة

واجاء الفاينل اجزام اللي كان مبين ان البنات جايات بحماس وودهن نسب اعلى

وكلها فترة وخلصت اختبارات الثنوية وطلعت النتائج والكل ناجح

والكل مقبول بعد في مكان

فيّ مقبولة بجامعة السلطان تخصص هندسة بترول (زي فراس)

ميّ مقبولة في الجامعة في بريطانية ( تخصص علم النفس والاعصاب)

علوش مقبولة جامعة السلطان تخصص الهندسة الزراعية

نور مقبولة معهد التمريض في مسقط

نوار مقبولة في جامعة السلطان تخصص قانون

مروش مقبولة في الكويت تخصص الفيزياء الطبية

الحلقة الاخيرة راح تكون في البارت ال16

انتظرونا

[روانـــــووو]

السلام عليكم ...
بارت جميل جدآ ومفرح للجميع ماشاء الله من زواج ونجاح أما أستاذة نهى هههههه راحت هيبتها إذا فيصل بيقول لخواتها عن أول لقاء بينهم بصراحة أحسها خبلة هالآدمية نفس البنات دوم تغلط بين فراس وفيصل ..مسكينة علوووش الوحيدة اللي بقت من الشلة وجالسة تلمح عندهم كدس خوان وما يتبرعوا ههههه بس أحسن لها تكمل دراستها

يعطيك العاااافية يارب .. بارت ممتع

[رايق البال]

هلا فيك ضي ..
مت من الضحك على حركة السنوره ^^ وحركات الثانويه العامه وجوها الصعب ههههه الوضع مع البنات يختلف بصراحه لأنهن كثير يشدن حيلهن اما احنا بكل صراحه عادي نعم ولا كأن ثانويه معنا والغش ابداع كان ههههههه ..
بارت جميل للغايه ونهايات جميله لبعض الاحداث كانت وحرام يتبرعوا لها علووش تبي تتزوج البنت ههههه بس حلو انها تكمل دراستها ملحوق عليه الزواج ..
بإنتظار البارت القادم والاخير بكل شوق
الف شكر لجهدك وابداعك وتفاعلك الجميل
طابت مساءاتك ...

[اموووره]

صباحووو

بااارت كثييير حلووو ضيون ^^
وانا بعد عجبتني سالفه السسسنوره هههه ..
هههه بصراحة ضيون تعليقاتك تضحك ..
بإنتظااار البارت الأخير ..
يعطيك العاافية

[حبي خالص]

صباحك إبداع كإبداع قلمك عزيزتي

ههههههههههه عاد ما سنوره تصرخ نهى هالكثر
ما تنلام كبيره هههههههههه

ذكرتيني بأيام الثانويه والحاله النفسيه اللي نعيشها
والله من التعب ننام على الكتب .. وعاد باليوم اللي فيه إختبار فيزياء
النوم كله كوابيس وأحل مسائل بالنوم يالله بالعقل بس
بس في بنات ما يخافن مدري ليش صراحه
أذكر مره كان في إختبار تربيه إسلاميه
وأول ما طلعت للباص جلست جنب بنت كان تقولي هاه ^^ حبي خالص ^^ ترى اسمي هذا
حافظه كل السور؟؟ قلت لها إيه الحمد لله .. قالت أنا آخر آيه ما حفطتها ما اتوقع بتجينا بالإختبار
لأنها الأخيره قلت لها ما تضمني شي.. المهم دشينا القاعه وأول ما استلمت ورقه الإختبار
عيني دمعة من الضحك ومن جانب آخر أحاتي البنت صراحه .. وحصلت هزبه من المراقبه ..عبالها انهبلت
.. يا ويلاه نفس الآيه ههههههههههههههه
من خلص الاختبار أسالها شو عملتي بالآيه .. قالت كتبت آيه ثانيه حافظتها على الأقل يمكن يعطوني نص الدرجه
أيام وذكريات على كثر ما عانينا فيها الإ انها حلوووه

يعطيك العافيه عزيزتي
وبإنتظار الحلقه الأخيره من الفلم التركي
ما نبيها زي نهاية الأفلام الهنديه لازم البطل يموت خلصت دموعنا
نبي نضحك يوووخي

[Raba]

السلام عليكم ...
بارت جميل جدآ ومفرح للجميع ماشاء الله من زواج ونجاح أما أستاذة نهى هههههه راحت هيبتها إذا فيصل بيقول لخواتها عن أول لقاء بينهم بصراحة أحسها خبلة هالآدمية نفس البنات دوم تغلط بين فراس وفيصل ..مسكينة علوووش الوحيدة اللي بقت من الشلة وجالسة تلمح عندهم كدس خوان وما يتبرعوا ههههه بس أحسن لها تكمل دراستها

يعطيك العاااافية يارب .. بارت ممتع

وعليكم السلام ورحمة الله وبركاته غاليتي
ههههه لا تسوي فيها عاد شرأيك اقولك هالموقف حقيقي بس السنورة عاد من راسي جبتها ههههه ،، بس قصة حلوه
ياخي لكن ما أقدر أستوعب اقول حج اهلي كيف تم التعارف ههه ،، يعطيك العافية عزيزتي وبارك الله فيك شاكرة لك متابعتك

[Raba]

هلا فيك ضي ..
مت من الضحك على حركة السنوره ^^ وحركات الثانويه العامه وجوها الصعب ههههه الوضع مع البنات يختلف بصراحه لأنهن كثير يشدن حيلهن اما احنا بكل صراحه عادي نعم ولا كأن ثانويه معنا والغش ابداع كان ههههههه ..
بارت جميل للغايه ونهايات جميله لبعض الاحداث كانت وحرام يتبرعوا لها علووش تبي تتزوج البنت ههههه بس حلو انها تكمل دراستها ملحوق عليه الزواج ..
بإنتظار البارت القادم والاخير بكل شوق
الف شكر لجهدك وابداعك وتفاعلك الجميل
طابت مساءاتك ...

والله كان ودي اطول لحد الحلقة 20 عشان اروي لكم جميع الأحداث بس عاد ظروف الدراسة والاسايمنات خلاني اختصر كل الخاتمة يا رب تنال إعجابكم عاد ،،
اما السنورة تراها موصوفه كحيوان أليف ههههه
يعطيك العافية عزيزي وبارك الله فيك شاكرة متابعتك